ຕົ້ນເດືອນ ກໍລະກົດ ນີ້, ສະຫາຍ ພັນໂທ ປອ ສອນໄຊ ຈັນຍາລາດ ຮອງຫົວໜ້າຫ້ອງການເມືອງ ກອງພົນທີ 1 ໄດ້ນຳພາຄະນະອະນຸກຳມະການກວດກາກອງວັດທະນະທຳ ແລະ ຕົວແທນກອງວັດທະນະທຳ 7 ຫົວໜ່ວຍກົມກອງຂອງກອງພົນທີ 1 ໄດ້ເຄື່ອນໄຫວກວດກາແລກປ່ຽນບົດຮຽນການສ້າງກົມກອງວັດທະນະທຳຢູ່ກອງພັນ 705 ທີ່ຂຶ້ນກັບກອງພັນໃຫຍ່ 11 ເຊິ່ງໃຫ້ການຕ້ອນຮັບຢ່າງອົບອຸ່ນຂອງສະຫາຍ ພັນເອກ ພອນມີໄຊ ສີວົງຊຳ ຮອງເລຂາຄະນະພັກຫົວໜ້າການເມືອງກອງພັນໃຫຍ່ 11 ແລະ ສະຫາຍພັນໂທ ຄຳແພງ ມີລາວັນ ຫົວໜ້າການເມືອງກອງພັນ 705 ພ້ອມ ຄະນະ.
ໃນພິທີ, ຄະນະຜູ້ແທນກອງພົນທີ 1 ກໍໄດ້ຮັບຟັງການລາຍງານ ຫຍໍ້ຈາກສະຫາຍຫົວໜ້າການ ເມືອງກອງພັນ 705 ກ່ຽວກັບ ການກຳເນີດ-ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວຈັດຕັ້ງປະຕິບັດພາລະບົດບາດໜ້າທີ່ຄວາມຮັບຜິດຊອບຂອງກົມກອງໃນການປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຜົນສຳເລັດໃນການປັບປຸງກໍ່ສ້າງກົມກອງໃນແຕ່ລະດ້ານ, ເຮັດໃຫ້ກົມກອງກາຍເປັນກົມກອງຕົວແບບ, ກອງວັດທະນະທຳ-ນັກຮົບວັດທະນະທຳຫຼາຍສະໄໝຈາກນັ້ນ, ສອງຝາຍກໍໄດ້ປຶກສາຫາລືແລກປ່ຽນບົດຮຽນດ້ານດີທີ່ຕັ້ງໜ້າ ແລະ ຂອດຄົງຄ້າງຕ່າງໆ,ຄວາມເອົາໃຈໃສ່ຂອງຄະນະພັກ-ຄະນະບັນຊາໃນການຊີ້ນຳປັບປຸງກໍ່ສ້າງກອງວັດທະນະທຳ-ນັກຮົບວັດທະນະນຳຕິດພັນແໜ້ນກັບວຽກງານກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ, ກອງປອດໃສປອດໄພປອດຄະດີ ແລະ ຂອບເຂດວຽກງານອົງການຈັດຕັ້ງມະຫາຊົນຊາວໜຸ່ມ 4 ບຸກ, ແມ່ຍິງ 3 ດີ ແລະ ວຽກງານອື່ນໆ ທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ. ເປັນການແລກປ່ຽນຄວາມຮູ້, ແລກປ່ຽນປະສົບການ ເພື່ອພ້ອມກັນນຳເອົາບົດຮຽນອັນດີນຳໄປປັບປຸງແກ້ໄຂ ແລະ ພັດທະນາບັນດາກົມກອງຂຶ້ນກັບກອງພົນທີ 1 ໃຫ້ເຕີບໃຫຍ່ເຂັ້ມແຂງເພື່ອສູ້ຊົນສ້າງໃຫ້ໄດ້ກົມກອງຕົວແບບ, ກົມກອງວັດທະນະທຳ-ນັກຮົບວັດທະນະທຳ, ຕາມທິດຊີ້ນຳຂອງກະຊວງປ້ອງກັນປະເທດກໍຄືຄະນະພັກກອງ ພົນທີ 1 ວາງອອກ.
ການເຄື່ອນໄຫວຢ້ຽມຢາມພົບປະແລກປ່ຽນບົດຮຽນໃນຄັ້ງນີ້, ເປັນການຫັດແໜ້ນຄວາມສາມັກຄີທີ່ເປັນມູນເຊື້ອມາແຕ່ດົນນານ, ສ້າງໄດ້ຄວາມຮັກແພງ, ໄມຕີຈິດມິດຕະພາບອັນດູດດື່ມ ແລະ ເປັນການເພີ່ມພູນຄູນສ້າງມູນເຊື້ອອັນດີງາມດັ່ງກ່າວໃຫ້ສູງຂຶ້ນເລື້ອຍໆໂອກາດນີ້, ທາງຄະນະພັກ-ຄະນະບັນຊາກອງພັນ 705 ກໍໄດ້ນຳພາຄະນະຜູ້ແທນກອງພົນທີ 1 ເຄື່ອນໄຫວຢ້ຽມຢາມຄ້າຍຄູ, ຫ້ອງການ, ບັນດາເຮືອນນອນ, ເຮືອນຄົວລວມ ແລະ ສະຖານທີ່ທຳການຜະລິດ ປູກຝັງ-ລ້ຽງສັດຂອງກົມກອງຕື່ມອີກ.
ໂດຍ: ກໍ ແດນດອກກ້ຽງ
---------------
ຢ່າລືມກົດຕິດຕາມເພຈ All in LAOS
------------------------------
