ທ່ານ ປອ. ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຂຶ້ນຊີ້ແຈງຕໍ່ຄໍາຖາມເຈາະຈີ້ມກ່ຽວກັບນະໂຍບາຍ ແລະ ມາດຕະການຊ່ວຍເຫລືອແຮງງານລາວ ທີ່ໄດ້ຮັບຜົນກະທົບຈາກການລະບາດຂອງພະຍາດ(ໂຄວິດ-19) ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ໃນຕອນເຊົ້າຂອງວັນທີ 25 ມິຖຸນາ 2020 ເປັນຕົ້ນ ແມ່ນການໄດ້ຕິດຕາມຄຸ້ມຄອງຜູ້ອອກແຮງງານລາວຢູ່ພາຍໃນ ແລະ ມາຈາກຕ່າງປະເທດ, ການສ້າງນະໂຍບາຍ ແລະ ນິຕິກຳ, ລວມທັງນະໂຍບາຍປະກັນສັງຄົມເພື່ອແກ້ໄຂຜົນກະທົບໃນໄລຍະການລະບາດ, ນະໂຍ ບາຍອຸດໜູນວ່າງງານສະເພາະໃຫ້ຜູ້ປະກັນຕົນ ໃນລະບົບປະກັນສັງຄົມພາກວິສາຫະກິດ ແລະ ອື່ນໆ.

Image may contain: 2 people, people standing

ທ່ານ ຄໍາແພງ ໄຊສົມແພງ ໃຫ້ຮູ້ຕື່ມວ່າ: ຜ່ານການປະສານສົມທົບກັບພາກສ່ວນກ່ຽວຂ້ອງ ໂດຍສະເພາະກະຊວງປ້ອງກັນຄວາມສະຫງົບ ແລະ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂພະຍາດ ໂຄວິດ-19 ຢູ່ແຕ່ລະແຂວງໄດ້ມີພົນລະເມືອງລາວເດີນທາງກັບຄືນຈາກຕ່າງປະເທດ ໂດຍຜ່ານຊ່ອງທາງຕ່າງໆເຊັ່ນ: ດ່ານສາກົນ, ດ່ານທ້ອງຖິ່ນ, ດ່ານປະເພນີ ແລະ ອື່ນໆ ຊຶ່ງສາມາດເກັບກໍາຂໍ້ມູນຜູ້ທີ່ເຂົ້າມາຜ່ານດ່ານສາກົນໃນຂອບເຂດທົ່ວປະເທດ ແຕ່ວັນທີ 20 ມີນາ ຫາ ວັນທີ 15 ມິຖຸນາ 2020 ໄດ້ທັງໝົດ 117.843 ຄົນ; ສໍາລັບຜູ້ອອກແຮງງານລາວທີ່ກັບຈາກປະເທດໃກ້ຄຽງ (ໄທ) ມີທັງໝົດ 56.852 ຄົນ, ຍິງ 46.628 ຄົນ ແລະ ເດັກນ້ອຍ 1.229 ຄົນ. ກະຊວງ ຮສສ ກໍໄດ້ເອົາໃຈໃສ່ປະສານງານ ກັບກອງເລຂາຄະນະສະເພາະກິດ ຂອງກະຊວງການຕ່າງປະເທດ, ກະຊວງທີ່ກ່ຽວຂ້ອງ, ສູນບໍລິການຈັດຫາງານ ແລະ ບັນດາບໍລິສັດຈັດຫາງານ ໃນການຕິດຕາມ ຮັບຜູ້ອອກແຮງງານລາວພ້ອມເກັບກໍາຕົວເລກຂອງພົນລະເມືອງລາວທີ່ເດີນທາງມາຈາກປະເທດໄທ ຢູ່ຕາມດ່ານສາກົນ ແລະ ດ່ານທ້ອງຖິ່ນ ເພື່ອນໍາເຂົ້າໄປສູ່ສູນກັກກັນ ແລະ ສົ່ງກັບຄືນທ້ອງຖິ່ນ. ນອກຈາກນີ້, ຍັງຕິດຕາມຊຸກຍູ້ ແລະ ໃຫ້ການຊ່ວຍ ເຫລືອຜູ້ອອກແຮງງານລາວ ຢູ່ບັນດາແຂວງທີ່ມີດ່ານຊາຍແດນຕິດກັບປະເທດໃກ້ຄຽງ ເຊັ່ນ: ແຂວງຄໍາມ່ວນ, ສະຫວັນນະເຂດ ແລະ ຈໍາປາສັກ. ພ້ອມກັນນັ້ນ, ກໍໄດ້ສະໜອງຂໍ້ມູນຂ່າວສານແກ່ຜູ້ອອກແຮງງານ ແລະ ໃຫ້ການຊ່ວຍເຫລືອ ໃນສິ່ງທີ່ຈໍາເປັນ ໂດຍສະເພາະແມ່ນອາຫານ, ນໍ້າດື່ມ, ຜ້າອັດປາກ ແລະ ນໍ້າຢາລ້າງມືຢູ່ບັນດາສູນກັກກັນແຫ່ງຕ່າງໆ.
ກະຊວງແຮງງານ ແລະ ສະຫວັດດີການສັງຄົມ ໄດ້ປຶກສາຫາລື ແລະ ປະສານສົມທົບກັບສູນກາງສະຫະພັນກໍາມະບານລາວ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ສູນຄົ້ນຄວ້ານະໂຍ ບາຍກະຊວງແຜນການ ແລະ ການລົງທຶນ, ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ສະມາຄົມອຸດສາຫະກໍາຕັດຫຍິບ ແລະ ພາກສ່ວນທີ່ກ່ຽວຂ້ອງຂອງນະຄອນຫລວງວຽງຈັນ ຄົ້ນຄວ້າອອກນິຕິກໍາລຸ່ມກົດໝາຍ, ນະໂຍບາຍ ແລະ ມາດຕະການຊ່ວຍເຫລືອຕໍ່ຜູ້ປະກອບການ, ຜູ້ອອກແຮງງານລາວ ແລະ ຜູ້ດ້ອຍໂອກາດທີ່ທຸກຍາກທີ່ໄດ້ຮັບຜົນກະທົບ ຈາກການແຜ່ລະບາດພະຍາດໂຄວິດ-19.
ຢ່າງໃດກໍຕາມ, ບັນດາ ສສຊ ຍັງໄດ້ຢ້ຳຕື່ມກ່ຽວກັບການແກ້ໄຂບັນຫາກ່ຽວກັບກອງທຶນປະກັນສັງຄົມ ແລະ ປະກັນສຸຂະພາບທີ່ຍັງບໍທັນຊັດເຈນ ແລະ ຈະແຈ້ງເທື່ອ. ພ້ອມນີ້ ຍັງມີບັນຫາກ່ຽວກັບການກຳນົດລະບຽບ ແລະ ການປະຕິບັດນະໂຍບາຍຕໍ່ຜູ້ມີຜົນງານ.

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ


ຂ່າວ: ມະນີທອນ, ພາບ: ເກດສະໜາ

LEAVE A REPLY

Please enter your comment!
Please enter your name here