ນະຄອນຫຼວງວຽງຈັນ: ໃນຕອນເຊົ້າຂອງວັນທີ 25 ມິຖຸນາ 2020, ໃນກອງປະຊຸມສະໄໝສຳມັນ ເທື່ອທີ 9 ຂອງສະພາແຫ່ງຊາດຊຸດທີ VIII, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ກຽດຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດຫລາຍບັນຫາໂດຍສະເພາະກ່ຽວກັບ ນະໂຍບາຍ ແລະ ມາດຕະການເກັບ ລາຍຮັບ, ການແກ້ໄຂຂອດອຸດຕັນໃນການສົ່ງອອກສິນຄ້າ ເພື່ອເຮັດໃຫ້ຜູ້ປະກອບການມີຄວາມສະດວກ ແລະ ວ່ອງໄວຂຶ້ນ ພາຍໃຕ້ ການເປັນປະທານຂອງທ່ານ ນາງ ປານີ ຢາທໍ່ຕູ້ປະທານສະພາແຫ່ງຊາດ ແລະ ເຂົ້າຮ່ວມ ຂອງທ່ານ ທອງລຸນສີສຸລິດ ນາຍົກລັດຖະມົນຕີແຫ່ງ ສປປ ລາວ.
ທ່ານ ສົມດີ ດວງດີ ໄດ້ໃຫ້ຄຳຊີ້ແຈງວ່າ: ສຳລັບການສົ່ງອອກສິນຄ້າ ໃນໄລຍະຜ່ານມາເຫັນວ່າຍັງມີບັນຫາໂດຍສະເພາະການສົ່ງອອກສິນຄ້າຂອດສຸດທ້າຍກໍແມ່ນ ພາສີຢູ່ດ່ານ ກ່ອນຈະຮອດດ່ານພາສີກໍຍັງມີຫລາຍຂັ້ນຫລາຍຕອນ ແລະ ມັນກໍໄດ້ພົວພັນກັບຫລາຍພາກສ່ວນທີ່ກ່ຽວຂ້ອງ ຊຶ່ງຈະຕ້ອງໄດ້ຮ່ວມມືກັນແກ້ໄຂ.
ສຳລັບຂະແໜງພາສີພວກເຮົາຈະພະຍາຍາມເຮັດທຸກຢ່າງ ເພື່ອອຳນວຍຄວາມສະດວກ ໂດຍສະເພາະແມ່ນຜູ້ປະກອບການທີ່ມີເອກະສານຄົບຖ້ວນຕາມລະບຽບການ ແລະ ຕາມກົດໝາຍທີ່ ກຳນົດ ຊຶ່ງພວກເຮົາແມ່ນໄດ້ແຈ້ງລະອຽດໝົດແລ້ວກ່ອນຈະສົ່ງອອກຕ້ອງມີເອກະສານຄົບຖ້ວນ.
ຖ້າຫາກວ່າຜູ້ປະກອບການມີເອກະສານຄົບຖ້ວນຕາມທີ່ກຳນົດຈະເຮັດໃຫ້ການສົ່ງອອກບໍ່ມີບັນຫາ ແລະ ບໍ່ໄດ້ໃຊ້ເວລາດົນຢູ່ໃນດ່ານພາສີ, ແຕ່ວ່າບາງອັນທີ່ຍັງຊັກຊ້າກໍຍ້ອນວ່າຢູ່ໃນດ່ານຍັງມີຫລາຍພາກສ່ວນເປັນຕົ້ນຖ້າເປັນສິນຄ້າກະສິກຳ ກໍຈະມີພາກສ່ວນກະສິກຳເຂົ້າມາກ່ຽວຂ້ອງ, ສິນຄ້າກ່ຽວປະເພດຢາກໍຈະມີພາກສ່ວນກະຊວງສາທາລະນະສຸກ ພ້ອມກັນນີ້ມັນກໍຍັງມີ ກະຊວງອຸດສະຫະກຳການຄ້າ ກ່ຽວຂ້ອງນຳອີກ.
ສະນັ້ນ ບັນຫາຈຳນວນໜຶ່ງພວກເຮົາກໍຈະໄດ້ນຳເອົາໄປປຶກສາຫາລືກັນເພື່ອນຳ ໄປແກ້ໄຂ ເພື່ອໃຫ້ມັນມີຄວາມເປັນເອກະພາບກັນ.
ຂ່າວ: ມະນີທອນ, ພາບ: ເກດສະໜາ
