ອັດຕະປື: ໃນວັນທີ 23 ມິຖຸນາ 2020 ນີ້ ກອງບັນຊາການທະຫານແຂວງອັດຕະປື ໄດ້ຈັດຕັ້ງການເຜີຍແຜ່ແຜນການຄວາມພ້ອມ, ຄວບຄຸມ, ຕອບຕ້ານ ແລະ ແກ້ໄຂໄຟພິບັດທາງທຳມະຊາດ ປະຈຳປີ 2020 .
ໂດຍການເຂົ້າຮ່ວມ ຂອງ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ ອັດຕະປື ປະທານ ປ້ອງກັນ, ຄວບຄຸມ ແລະ ແກ້ໄຂໄຟພິບັດຂັ້ນແຂວງ ມີ ພັນເອກ ບຸນຈັນ ສີຫາວົງ ຫົວໜ້າການທະຫານ ຜູ້ຊີ້ນຳ, ຄວບຄຸມ, ຕອບຕ້ານ ແລະ ແກ້ໄຂໄຟພິບັດຂັ້ນກອງບັນຊາການທະຫານແຂວງອດຕະປື . ມີບັນດາທ່ານໃນຄະນະພັກກອງບັນຊາການທະຫານແຂວງ, ກອງບັນຊາການຕຳຫຼວດແຂວງ ພ້ອມດ້ວຍບັນດາທ່ານທີ່ຖືກແຕ່ງຕັ້ງ ໃນ 5 ເມືອງ ແລະ ກົມກອງທີ່ຂື້ນກັບກອງບັນຊາການທະຫານແຂວງເຂົ້າຮ່ວມ.
ພັນໂທ ແສງສຸລີ ເມກເມືອງໄຊ ຄະນະພັກກອງບັນຊາການ, ຮອງຫົວໜ້າຫ້ອງເສນາທິການ ໄດ້ຜ່ານແຜນການ, ການກະກຽມ, ດ້ານກຳລັງ, ດ້ານພາຫະນະ ແລະ ດ້ານອຸປະກອນຮັບໃຊ້ຕ່າງໆ ການແຕ່ງຕັ້ງ, ມອບໝາຍໜ້າທີ່ ແລະ ຄວາມຮັບຜິດຊອບ ກ່ອນໄຟພິບັດບໍ່ທັນເກີດ, ເມື່ອເກີດຂື້ນແລ້ວ ແລະ ພາຍຫຼັງຊີ້ນສຸດລົງ, ໃນຄວາມເຂັ້ມງວດຄົບຊຸດ, ຖືກຕ້ອງຕາມຂໍ້ກຳນົດ ແລະ ຄຳສັ່ງສະບັບເລກທີ 732 ລົງວັນທີ 3 ເມສາ 2020 . ຂອງກົມໃຫຍ່ເສນາທິການ ກອງທັບ ຄະນະພັກ – ຄະນະບັນຊາແຕ່ລະຂັ້ນ ປະສານສົມທົບກັບອົງການປົກຄອງ,ຂະແໜງການຢູ່ພື້ນທີ່ ກົມກອງຕັ້ງຢູ່, ສຳຫຼວດຈຸດພິເສດ ພື້ນທີ່ຈຸດທີ່ຕັ້ງກຳນົດໃນແຜນການ, ໃນເມື່ອເກີດມີນ້ຳຖ້ວມ ສາມາດເຄື່ອນຍ້າຍ ຄົນ, ສັດ ແລະ ວັດຖຸມີຄ່າໄປທີ່ຈຸດກຳນົດໄວ້ໃຫ້ທັນ ແລະ ປອດໄພ .
ການຈັດຕັ້ງກຳລັງເປັນ 4 ພາກສ່ວນ, ພາກສ່ວນ ບັນຊາ, ພາກສ່ວນ ກຳລັງກອບກູ້ ຊ່ວຍເຫຼືອ, ພາກສ່ວນຮັບປະກັນ ແລະ ກຳລັງສຳຮອງ . ການຈັດຕັ້ງກະກຽມ ກຳລັງທະຫານຮາບ 622 ສະຫາຍ, ໂຮງໝໍແຂວງ, ເມືອງ ແລະ ໂຮງໝໍກອງບັນຊາການທະຫານແຂວງ ຈຳນວນ 7 ແຫ່ງ, ກຳລັງວິຊາສະເພາະ, ດ້ານພະລາທິການ – ເຕັນິກ ແລະ ກໍ່ສ້າງເຄຫາສະຖານ 60 ສະຫາຍ, ຄະນະຊີ້ນຳລວມ ແລະ ພາກສະໜາມ25 ສະຫາຍ . ດ້ານພາຫະນະ ລົດຂົນສົ່ງ 15 ຄັນ, ລົດນ້ອຍ 8 ຄັນ, ເຮືອກູ້ໄຟ 2 ລຳ, ເຮືອຫາງ 10 ຄັນ ແລະ ເຄື່ອງອຸປະກອນຮັບໃຊ້ ເປັນຕົ້ນ ຜ້າເຕັນ, ເສື້ອຊູຊີບ, ເສື້ອກັນຝົນ, ເກີບໂບກ ແລະ ເຄື່ອງໃຊ້ອື່ນໆທີຈຳເປັນ .
