ເພື່ອສືບຕໍ່ຫັນເອົາວຽກງານເກັບລາຍຮັບເຂົ້າງົບປະມານແຫ່ງລັດເຂົ້າສູ່ລະບົບທັນສະໄໝເທື່ອລະກ້າວ,ພ້ອມທັງຮັບປະກັນໃຫ້ແກ່ການເກັບລາຍຮັບບັນລຸຕາມແຜນການ ແລະ ລື່ນແຜນການທີ່ມອບໝາຍໃຫ້.
ໃນວັນທີ 16 ມິຖຸນາ 2020 ທີ່ພະແນກການເງິນ ນະຄອນຫຼວງວຽງຈັນ, ສ່ວຍສາອາກອນປະຈໍານະຄອນຫຼວງວຽງຈັນຮ່ວມກັບທະນະຄານການຄ້າຕ່າງປະເທດລາວ ມະຫາຊົນ, ໄດ້ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຜ່ານລະບົບທະນາຄານປະຈໍາປີ 2020.
ໂດຍການເຂົ້າຮ່ວມຂອງທ່ານ ສີລິລາດທົງສິນ ທອງເພັງ ຫົວໜ້າພະແນກການເງິນ ນະຄອນຫຼວງວຽງຈັນ, ທ່ານ ວົງທອງ ຄໍາກິແກ້ວ ຮອງຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນ, ມີທ່ານ ຄໍາຕັນ ສີສູນທອນ ຮອງຫົວໜ້າພະແນກບໍລິການລູກຄ້າລາຍໃຫ່ຍ ທະນາຄານການຄ້າຕ່າງປະເທດລາວ ມະຫາຊົນ ພ້ອມດ້ວຍຄະນະ, ມີບັນດາພະນັກ ງານ, ຂະແໜງສ່ວຍສາອາກອນ ນວ , ພະແນກການເງິນ ນະຄອນຫຼວງວຽງຈັນ ເຂົ້າຮ່ວມ.
ໂອກາດນີ້, ທ່ານ ວົງທອງ ຄໍາກິແກ້ວ ຮອງຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນໃຫ້ຮູ້ວ່າ: ວຽກງານພັດທະນາເສດຖະກິດສັງຄົມແຫ່ງຊາດແມ່ນວຽກງານໜຶ່ງທີ່ສໍາຄັນ ແລະ ເປັນພຶ້ນຖານໃຫ້ແກ່ຄາດໝາຍຂອງການພັດທະນາ, ການປະຕິບັດພັນທະເຂົ້າງົບປະມານແຫ່ງລັດແມ່ນໜ້າທີ່ຂອງທຸກພາກສ່ວນນັບທັງອົງການຈັດຕັ້ງພັກ–ລັດ, ອົງການຈັດຕັ້ງມະຫາຊົນ, ຫົວໜ່ວຍທຸລະກິດ ແລະ ພົນລະເມືອງລາວທຸກໆຄົນຕ້ອງມີສ່ວນຮ່ວມ.
ສະນັ້ນ, ການເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຜ່ານລະບົບທະນາຄານປະຈໍາປີ 2020 ເພື່ອປຸກລະດົມ, ກະຕຸກຊຸກຍູ້ ແລະ ອໍານວຍຄວາມສະດວກໃຫ້ບັນດາອົງການຈັດຕັ້ງລັດ, ພະນັກງານລັດຖະກອນໄດ້ມາເສຍຄ່າທໍານຽມທາງ ແລະ ພາສີທີດິນປະຈໍາປີ 2020 ໃຫ້ເປັນຂະບວນຟົດຟື້ນ, ສໍາຄັນກໍ່ແມ່ນການສ້າງຂະບວນການໃຫ້ເປັນແບບຢ່າງນໍາໜ້າສະແດງເຖິງສະຕິຕື່ນຕົວ, ຄວາມສະໝັກໃຈທີ່ປະກອບສ່ວນເຂົ້າງົບປະມານໃຫ້ແກ່ລັດກໍ່ຄືການສ້າງສາພັດທະນາປະເທດຊາດ.
ສະນັ້ນ, ຂໍເຊີນຊວນອົງການຈັດຕັ້ງທຸກພາສ່ວນ, ພະນັກງານລັດຖະກອນ ພໍ່ແມ່ປະຊາຊົນພ້ອມກັນມາປະ ກອບສ່ວນມອບພັນທະເຂົ້າງົບປະມານແຫ່ງລັດດ້ວຍການເສຍຄ່າທໍານຽມທາງ ແລະ ພາສີທີ່ດິນ, ຮັບປະກັນໃຫ້ໄດ້ໝາກຜົນ ແລະ ຕາມລະດັບຄາດໝາຍ. ສ່ວນແຜນການຕໍ່ໜ້າຈະເປີດຂະບວນການດັ່ງກ່າວນີ້ອີກ 13 ຈຸດທົ່ວນະຄອນຫຼວງໃນປີ 2020 ນີ້.
ຂ່າວ: ອາພັດສະລາ ຈັນທະວົງ
