ວາງສີລາລຶກໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ ທີແຂວງຈໍາປາສັກຢ່າງເປັນທາງການ

ໃນຕອນເຊົ້າວັນທີ 18 ມິຖຸນາ 2020 ນີ້,ທີເຂດພັດທະນາ ບ້ານຄອນໄຫຼ ນະຄອນປາກເຊແຂວງຈໍາປາສັກໄດ້ມີພິທີວາງສີລາລຶກໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ ຢ່າງເປັນທາງການ.

ທ່ານ ໄຊສີ ສັນຕິວົງ ກໍາມະການສູນກາງພັກ #ລັດຖະມົນຕີກະຊວງຍຸຕິທໍາ,ທ່ານ ເມກສະຫວັນ ພົມພິທັກ ຮອງເລຂາພັກແຂວງ #ປະທານສະພາປະຊາຊົນແຂວງ,ມີບັນດາທ່ານການນໍາຈາກກະຊວງ, ແຂວງ, ພະແນກການກົມກອງອ້ອມຂ້າງ, ບໍລິສັດຮັບເໝົາກໍ່ສ້າງ, ຄູອາຈານ ແລະນັກສຶກສາເຂົ້າຮ່ວມ.

ໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ທີ່ຈະກໍ່ສ້າງນີ້ມີຂະໜາດກ້ວາງ 10 ແມັດ,ຍາວ 68 ແມັດ,ເປັນອາຄານ 2 ຊັ້ນ,ປະກອບດ້ວຍ 10 ຫ້ອງຮຽນ ຈາກນີ້ກໍຈະມີຫ້ອງການ,ຫ້ອງປະຊຸມ ສິ່ງອໍານວຍຄວາມສະດວກອື່ນໆ.ຊຶ່ງມີມູນຄ່າກໍ່ສ້າງທັງໝົດ 4 ຕື້ 898 ລ້ານກີບ

ໂດຍແມ່ນກະຊວງຍຸຕິທໍາເປັນເຈົ້າຂອງໂຄງການ ແລະ ຮັບເໝົາກໍ່ສ້າງໂດຍ ບໍລິສັດກໍ່ສ້າງຂົວ – ທາງ ແລະຕິດຕັ້ງໄຟຟ້າຄົບວົງຈອນ ໄຊສົມບູນ, ຕາມແຜນການ ແລະສັນຍາຈະກໍ່ສ້າງຈະໃຫ້ສໍາເລັດພາຍໃນ 12 ເດືອນ ຫຼື 1 ປີ ນັບແຕ່ມື້ວາງສີລາລຶກກໍ່ສ້າງເປັນຕົ້ນໄປ.

ໂຄງການກໍ່ສ້າງອາຄານສະຖາບັນຍຸຕິທໍາພາກໃຕ້ ທີແຂວງຈໍາປາສັກຖ້າກໍ່ສ້າງສໍາເລັດອໍານວຍຄວາມສະດວກໃຫ້ແກ່ການຮຽນ-ການສອນ ກໍຄືການກໍ່ສ້າງບຸກຄະລາກອນທາງດ້ານກົດຫໝາຍໃຫ້ແກ່ແຂວງຈໍາປາສັກ,ສາລະວັນ,ເຊກອງ,ອັດຕະປື ເວົ້າລວມກໍຄື 4 ແຂວງພາກໃຕ້ຫຼາຍຂຶ້ນ.

ໂດຍ: ເກດສະໜາ ແກ້ວສຸວັນນະແສງ