ເຈົ້າແຂວງບໍ່ແກ້ວ ສັ່ງເມືອງຕົ້ນເຜິ້ງກວດກາ ແລະ ຖອນ ປ້າຍໂຄສະນາ ທີ່ບໍ່ຖືກລະບຽບ!

ໂດຍປະຕິບັດຕາມທິດຊີ້ນໍາຂອງທ່ານເຈົ້າແຂວງບໍ່ແກ້ວ. ກໍ່ຄືທິດຊີ້ນໍາຂອງຄະນະບໍລິຫານງານພັກເມືອງ ຕົ້ນເຜິ້ງ ໃນວັນທີ 3 ມິຖຸນາ 2020 ນີ້ ບັນດາຫ້ອງການທີ່ກ່ຽວຂ້ອງຂອງເມືອງ ນໍາໂດຍ ທ່ານ ແສງເພັດ ຈິດຕະພົງ ກຳມະການພັກເມືອງ ຫົວໜ້າຫ້ອງການ ໂຍທາທິການ ແລະ ຂົນສົ່ງເມືອງ ສົມທົບກັບ ປກສ – ປກຊ ແລະ ຄະນະຄຸ້ມຄອງເຂດເສດຖະກິດພິເສດສາມແຂວງບໍ່ແກ້ວ

ຈຶ່ງໄດ້ລົງຮື້ຖອນປ້າຍໂຕສະນາທີ່ບໍ່ຖືກຕ້ອງຕາມລະບຽບວັດທະນະທໍາ ແລະ ລະບຽບໂຍທາ ເຊັ່ນ ປ້າຍທີ່ບໍ່ມີພາສາລາວ, ປ້າຍທີ່ມີພາສາຕ່າງປະເທດຢູ່ເທິງພາສາລາວ, ປ້າຍທີ່ຂະໜາດຂອງລາວພາສາລາວນ້ອຍກວ່າພາສາຕ່າງປະເທດ, ປ້າຍທີ່ສີພື້ນ ແລະ ສີຕົວໜັງສືບໍ່ຖືກຕ້ອງຕາມລະບຽບການທີ່ກະຊວງ ຖວທ ກຳນົດ, ປ້າຍທີ່ຕິດຕັ້ງກວມເອົາເຂດສະຫງວນທາງຫຼວງ, ຢູ່ຕິດຂອບທາງ ຫຼື ຫ່າງຈາກຂອບທາງບໍ່ເຖິງ 6 ແມັດ

ເຊິ່ງເຮັດໃຫ້ບັງປ້າຍເຄື່ອງໝາຍຈະລາຈອນ ຫຼື ກີດຂວາງໄລຍະການເບິ່ງເຫັນໃນເວລາຂັບຂີ່, ແລະ ຮູບພາບໂປ້ເປືອຍ ລາມົກອານາຈານ ບໍ່ສອດຄ່ອງກັບວັດທະນະທໍາ – ຮີດຄອງປະເພນີອັນດີງາມຂອງຊາດ ລ່ວມທັງໝົດ 89 ປ້າຍ ຢູ່ເຂດເຊື່ອມຕໍ່ ລະຫວ່າງເມືອງ ຕົ້ນເຜິ້ງ ແລະ ເຂດເສດຖະກິດພິເສດສາມຫຼ່ຽມຄໍາ.

ທັງນີ້ກໍ່ເພື່ອເຮັດໃຫ້ເມືອງຕົ້ນເຜິ້ງມີຄວາມເປັນລະບຽບຮຽບຮ້ອຍ ການຕິດຕັ້ງປ້າຍໂຄສະນາຖືກຕ້ອງຕາມລະບຽບການ ແລະ ມີລັກສະນະຊາດ ຕາມທິດຊີ້ນໍາຂອງທ່ານເຈົ້າແຂວງ ກໍ່ຄືຂອງຄະນະບໍລິຫານງານພັກເມືອງ ຕົ້ນເຜິ້ງ.