ໃນທ້າຍອາທິດຜ່ານມາ ຢູ່ທີ່ຫ້ອງປະຊຸມ ພະແນກ ຍທຂ ແຂວງອຸດົມໄຊ ໄດ້ມີກອງປະຊຸມ ຄະ ນະຊີ້ນຳ ໂຄງການກໍ່ສ້າງເສັ້ນທາງລົດໄຟລາວ – ຈີນ ຊ່ວງຜ່ານແຂວງອຸດົມໄຊ ໂດຍການເປັນປະ ທານຂອງ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ຫົວໜ້າຄະນະຊີ້ນຳໂຄງການກໍ່ສ້າງເສັ້ນ ທາງລົດໄຟ ລາວ – ຈີນ.
ການດໍາເນີນກອງປະຊຸມໃນຄັ້ງນີ້ ກໍເພື່ອຮ່ວມກັນສະຫຼຸບ,ຕີລາຄາ ແລະ ສັງລວມ ຄວາມຄືບຫນ້າຂອງການຈັດຕັ້ງປະຕິບັດວຽກງານ ໂຄງການກໍ່ສ້າງ,ຍົກໃຫ້ເຫັນຈຸດດີ,ຈຸດອ່ອນ,ຂໍ້ຄົງຄ້າງ ໃນໄລ ຍະຜ່ານມາ ແລະ ວິທີປັບປຸງ, ແກ້ໄຂ ໃນຕໍ່ຫນ້າ ແນໃສ່ເຮັດໃຫ້ໂຄງການດັ່ງກ່າວ ສໍາເລັດຕາມກຳ ນົດເວລາ ແລະ ມີປະສິດທິພາບ ໃນນັ້ນແມ່ນໄດ້ຮັບຟັງການລາຍງານສະພາບລວມ ຄວາມຄືບຫນ້າຂອງໂຄງການກໍ່ສ້າງ ຕົວຈິງ ເຊິ່ງມາຮອດປັດຈຸບັນນີ້ ເຫັນວ່າ ວຽກງານແຕ່ລະດ້ານແມ່ນສໍາເລັດເປັນສ່ວນຫລາຍແລ້ວ ໂດຍສະເພາະແມ່ນ 3 ຫນ້າວຽກຫລັກ ຄື ວຽກງານເຈົ້າອຸໂມງ ທັງ 3 ສັນຍາ ລວມທັງຫມົດ 32 ອຸໂມງ ມີຄວາມຍາວທັງຫມົດ 84,869 ກິໂລແມັດ ສາມາດເຈາະສຳເລັດ ແລ້ວ 28 ອຸໂມງ ຫລື 82,747 ກິໂລແມັດ ເທົ່າກັບ 97,5% ຂອງຄວາມຍາວທັງຫມົດ ຊ່ວງຜ່ານແຂວງອຸດົມໄຊ ຍັງບໍ່ທັນສຳເລັດ 4 ຈຸດ, ວຽກງານກໍ່ສ້າງເສົາຂົວທາງລົດໄຟ ລວມທັງຫມົດ 716 ຕົ້ນ ມາຮອດປັດຈຸບັນແມ່ນກໍ່ສ້າງສຳເລັດທັງຫມົດ ແລ້ວ ເທົ່າກັບ 100% ແລະ ວຽກງານ ດິນຕັດ – ວຽກຖົມຄັນ ທາງລົດໄຟ ສາມາດປະຕິບັດສໍາເລັດແລ້ວ 97,91% ສັງລວມແລ້ວ ການກໍ່ສ້າງເສັ້ນທາງລົດໄຟ ລາວ – ຈີນ ຊ່ວງຜ່ານແຂວງອຸດົມໄຊ ທີ່ມີຄວາມຍາວລວມທັງຫມົດ 126,6 ກິ ໂລແມັດ ໂດຍສະເພາະແມ່ນ ຫນ້າວຽກທັງ 3 ດ້ານນີ້ ສາມາດຈັດຕັ້ງປະຕິບັດສຳເລັດແລ້ວ 93,27%.
ນອກນັ້ນ ກອງປະຊຸມຍັງໄດ້ ສະຫຼຸບການເຄື່ອນໄຫວວຽກງານດ້ານອື່ນໆ ອີກ ໂດຍສະເພາະແມ່ນວຽກງານຂອງຫ້ອງການປະສານງານ,ວຽກງານປ້ອງກັນຊາດ – ປ້ອງກັນຄວາມສະຫງົບ,ການຈ່າຍຄ່າຊົດເຊີຍຜົນກະທົບ ແຕ່ລະງວດ ລວມທັງສະພາບບັນຫາ ທີ່ເກີດຂຶ້ນກັບໂຄງການ ແລະ ການໄກ່ເກ່ຍແກ້ໄຂ ຂອງແຕ່ລະເມືອງທີ່ເສັ້ນທາງລົດໄຟຜ່ານ ເປັນຕົ້ນແມ່ນ ເມືອງນາຫມໍ້,ເມືອງໄຊ ແລະ ເມືອງງາ ພ້ອມທັງມີການປຶກສາຫາລື ເພື່ອຊອກຫາແນວທາງໃນການແກ້ໄຂ ແລະ ເຄື່ອນໄຫວໃນຕໍ່ໜ້າ ໃຫ້ມີປະສິດທິພາບ ແລະ ສຳເລັດຜົນຕາມລະດັບຄາດຫມາຍ.
ກອງປະຊຸມດັ່ງກ່າວ ມີທ່ານ ບຸນລອດ ອ່ອນພະຈັນ ຄະນະປະຈໍາພັກແຂວງ, ປະທານສະພາປະຊາຊົນແຂວງ, ຕາງໜ້າກອງບັນຊາການ ປກຊ – ປກສ, ພະແນກການກ່ຽວຂ້ອງ ແລະ ເຈົ້າເມືອງ ທັງ 3 ເມືອງ ທີ່ມີໂຄງການກໍ່ສ້າງເສັ້ນທາງລົດໄຟ ລາວ – ຈີນ ຜ່ານ ຄື ເມືອງນາຫມໍ້, ເມືອງໄຊ ແລະ ເມືອງງາ ເຂົ້າຮ່ວມ.
ຂ່າວ: ຄານມະນີ ຮຽນດໍຈັນ
