ຄະນະສະເພາະກິດ ນອກຈາກການຕິດຕາມສະພາບການລະບາດລະບາດພາຍໃນປະເທດແລ້ວ ຍັງໄດ້ຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ, ເຊິ່ງເຫັນວ່າຍັງມີການເພີ່ມຂຶ້ນໃນແຕ່ລະວັນ, ດັ່ງນັ້ນຈຶ່ງຮຽກຮ້ອງໃຫ້ທຸກຄົນມີສ່ວນຮ່ວມໃນການປ້ອງກັນພະຍາດໂຄວິດ-19 ເພື່ອບໍ່ໃຫ້ກັບມາລະບາດໃນຮອບທີ 2.
ຄະນະສະເພາະກິດ ໄດ້ລາຍງານໃຫ້ຊາບໃນຕອນບ່າຍມື້ນີ້ວ່າ ມາຮອດ 6 ໂມງເຊົ້າ ຂອງວັນທີ 1 ມິຖຸນາ 2020, ທົ່ວໂລກມີທັງໝົດ 213 (ປະເທດ/ເຂດ), ມີການຢັ້ງຢືນຜູ້ຕິດເຊື້ອພະຍາດໂຄວິດ-19 ຈໍານວນ 6 ລ້ານກວ່າຄົນ, ເຊິ່ງເພີ່ມໃໝ່ 109,941 ຄົນ ແລະ ເສຍຊີວິດແລ້ວ 373,677 ຄົນ ກວມເອົາ 5.97% ຂອງຜູ້ຕິດເຊື້ອທັງໝົດ.
ສະເພາະກຸ່ມປະເທດອາຊຽນ ມີການຢັ້ງຢືນຜູ້ຕິດເຊື້ອພະຍາດໂຄວິດ-19 ທັງໝົດ 91,179 ຄົນ ແລະ ເສຍຊີວິດແລ້ວ 2,773 ຄົນ, ສະເພາະມື້ວານນີ້ ມີຜູ້ເສຍຊີວິດ 47 ຄົນ.
ສະນັ້ນ ຈຶ່ງຮຽກຮ້ອງໃຫ້ທຸກຄົນໃນທົ່ວປະເທດຈົ່ງສືບຕໍ່ຮ່ວມກັນເປັນເຈົ້າການປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ ເພື່ອບໍ່ໃຫ້ເກີດການລະບາດຮອບໃໝ່ຂຶ້ນມາ.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 31 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 7,180 ຕົວຢ່າງ ແລະ ກໍ່ເປັນ 50 ມື້ແລ້ວທີ່ບໍ່ພົບຜູ້ຕິດເຊື້ອໃໝ່ຢູ່ ສປປ ລາວ.
ປະຈຸບັນ, ມີຜູ້ນອນຕິດຕາມ ຢູ່ໂຮງໝໍມິດຕະພາບ 3 ຄົນ, ໃນນີ້ຍິງ 2 ຄົນ, ທັງໝົດມີອາການປົກກະຕິ ຈະໄດ້ຕິດຕາມເກັບຕົວຢ່າງມາກວດຈົນກວ່າບໍ່ພົບເຊື້ອຈຶ່ງຈະພິຈາລະນາໃຫ້ອອກໂຮງໝໍ.
ຂ່າວ: ວຽງຈັນທາຍ
