21.5 C
Laos
Tuesday, October 26, 2021

ຈັບແມ່ຫວຍອອນລາຍເລາະຕົ້ມຕູນ ເງິນ 1.5 ຕື້ກວ່າກີບ

ຂ່າວເດັ່ນອາທິດນີ້

ໃນວັນທີ 28 ພຶດສະພາ 2020 ນີ້ ພັທ ສອນເພັດ ວິຈິດ ຮອງຫົວໜ້າກອງບັນຊາການ ປກສ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວວ່າ: ພາຍຫຼັງໄດ້ຮັບຄໍາຮ້ອງຟ້ອງຈາກປະຊາຊົນຈໍານວນໜຶ່ງ ເລື່ອງການສໍ້ໂກງຊັບຂອງພົນລະເມືອງ ຈາກນັ້ນ ເຈົ້າໜ້າທີ່ພວກເຮົາຈຶ່ງໄດ້ກວດກາ ແລະ ເກັບກໍາຂໍ້ມູນຫຼັກຖານ ເຊິ່ງເຫັນວ່າຄົບອົງປະກອບໃນການດຳເນີນຄະດີ ຈຶ່ງໄດ້ກັກຕົວນາງ ລັດສະນິພອນ ຫຼື ເຈີ້ນ, ອາຍຸ 30 ປີ, ອາຊີບຄ້າຂາຍ ຢູ່ບ້ານ ໂພນຄໍາ ເມືອງສີໂຄດຕະບອງ ນະຄອນຫຼວງວຽງຈັນ ມາດໍາເນີນການສືບສວນ.

ນາງ ລັດສະນີພອນ ໄດ້ໃຫ້ການຍອມຮັບສາລະພາບວ່າ: ໄດ້ສໍ້ໂກງຊັບຂອງພົນລະເມືອງແທ້ ໂດຍໄດ້ເລີ່ມໂຄສະນາໂພດການຫຼິ້ນຫວຍທາງອອນລາຍລົງເຟດບຸກມາແຕ່ຕົ້ນເດືອນ ພະຈິກ 2019; ຊິ່ງຂໍ້ຄວາມທີ່ໂພດລົງນັ້ນແມ່ນໄດ້ບອກກ່ຽວກັບການເຂົ້າຫຼິ້ນຫວຍ ແລະ ໃຫ້ດອກເບ້ຍສູງເພື່ອ ດຶງດູດຈິດໃຈຄົນມາຫຼີ້ນ ນັບແຕ່ 25 ລ້ານກີບ, 50 ລ້ານກີບ ແລະ 100 ລ້ານກີບ ເຊິ່ງເຮັດໃຫ້ມີປະຊາຊົນຫຼົ່ງເຊື່ອເປັນຈໍານວນຫຼາຍ ແລະ ໄດ້ໂອນເງິນເຂົ້າບັນຊີທະນາຄານຂອງຜູ້ກ່ຽວ.

ຈາກນັ້ນ, ກໍໃຫ້ລູກຫວຍເປຍຫວຍໃສ່ດອກເບ້ຍ, ເມືອລູກຫວຍເປຍໄດ້ ຜູ້ກ່ຽວພັດບໍ່ຈ່າຍເງິນໃຫ້ລູກຫວຍເລີຍ; ເຊິ່ງລວມຍອດເງິນທີ່ຜູ້ກ່ຽວໄດ້ຈາກລູກຫວຍ ແມ່ນ 1.548.500.000 ກີບ; ສ່ວນເງິນທີ່ໄດ້ມາກໍ່ເອົາໄປໃຊ້ຈ່າຍໃນຊີວິດປະຈຳວັນ.

ພັທ ສອນເພັດ ວິຈິດ ຍັງໃຫ້ຮູ້ຕື່ມອີກວ່າ: ປັດຈຸບັນຜູ້ເສຍຫາຍເຂົ້າແຈ້ງຄວາມມີທັງໝົດ 7 ຄົນ ແຕ່ຍັງມີລູກຫວຍອີກຈໍານວນ 100 ກ່ວາຄົນ ທີ່ຍັງບໍ່ໄດ້ເຂົ້າມາໃຫ້ຄໍາໃຫ້ການຕໍ່ເຈົ້າໜ້າທີ່ ສ່ວນຜົນເສຍຫາຍຍັງບໍ່ສາ ມາດປະເມີນຄ່າໄດ້.

ຕໍ່ກັບຄະດີດັ່ງກ່າວ ເຈົ້າໜ້າທີ່ໜ່ວຍງານວິຊາສະເພາະ ປກສ ເມືອງສີໂຄດຕະບອງ ນະຄອນຫຼວງວຽງຈັນ ຈະໄດ້ສືບຕໍ່ເປີດກ້ວາງຂະຫຍາຍຜົນ ຫາກຸ່ມແກ້ງພັກພວກ ມາດໍາເນີນຄະດີຕາມລະບຽບຂອງກົດໝາຍ; ຖ້າຫາກຜູ້ເສຍທ່ານໃດ ໄດ້ຕົກເປັນເຫຍື່ອຄະດີນີ້ ຂໍໃຫ້ເຂົ້າມາໃຫ້ການຕໍ່ເຈົ້າໜ້າທີ່ ເພື່ອເປັນຫຼັກຖານໃນການດໍາເນີນການສືບສວນ.

ປກສ ນະຄອນຫຼວງວຽງຈັນ

- Advertisement -
- Advertisement -

ເລື່ອງລາວຫຼ້າສຸດມື້ນີ້