ພະແນກການເງິນແຂວງຈໍາປາສັກຈັດພິທີປູກຕົ້ນໄມ້ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ

ພະແນກການເງິນແຂວງຈໍາປາສັກໄດ້ຈັດພິທີປູກຕົ້ນໄມ້ ຢູ່ທີ່ວິທະຍາໄລການເງິນພາກໃຕ້ ໃນຕອນເຊົ້າວັນທີ 29 ພຶດສະພາ 2020 ນີ້ໃຫ້ກຽດເຂົ້າຮ່ວມມີ ທ່ານ ປອ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ທ່ານ ເມກສະຫວັນ ພົມພິທັກ ປະທານສະພາປາຊາຊົນແຂວງ,ບັນດາທ່ານການນໍາແຂວງ,ນະຄອນ,ເມືອງ,ພະແນກການກົມກອງອ້ອມຂ້າງແຂວງ,ພະນັກງານທະຫານຕໍາຫຼວດ,ຄູອາຈານນັກສຶກສາ,ຕະຫຼອດຫົວໜ່ວຍທຸລະກິດຕ່າງໆເຂົ້າຮ່ວມ.

ທ່ານ ສົມບູນ ເຮືອງວົງສາ ຫົວໜ້າພະແນກການເງິນແຂວງໄດ້ກວ່າວ່າ: ການຈັດພິທີປູກຕົ້ນໄມ້ໃນຄັ້ງນີ້,ເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ໃຫ້ມີບັນຍາກາດ ແລະມີເນື້ອໃນຄວາມໝາຍສໍາຄັນຢ່າງເລິກເຊິ່ງ,ເປັນການສ້າງສະພາບແວດລ້ອມທີ່ດີ ແລະ ພື້ນທີ່ສີຂຽວໃຫ້ແກ່ວິທະຍາໄລການເງິນພາກໃຕ້ ກໍຄືນະຄອນປາກເຊ ແຂວງຈໍາປາສັກໃຫ້ຫຼາຍຂຶ້ນ.ຕົ້ນໄມ້ທີ່ນໍາມາປູກໃນຄັ້ງນີ້ມີປະເພດໄມ້ດູ່,ໄມ້ແຄນ,ໄມ້ເກດສະໜາ,ໄມ້ໃຫ້ໝາກ ແລະ ໄມ້ປະດັບຊະນິດອື່ນໆລວມຈໍານວນ 197 ຕົ້ນ,ລວມມູນຄ່າທັງໝົດ 53 ລ້ານກີບ.ຊຶ່ງແມ່ນການປະກອບສ່ວນຂອງພະນັກງານ,ຫົວໜ່ວຍທຸລະກິດ ທັງພາກລັດ ແລະເອກະຊົນ.

ພາຍຫຼັງກ່າວພິທີປຸກຕົ້ນໄມ້ຢ່າງເປັນທາງການ, ທ່ານ ປອ ວິໄລວົງ ບຸດດາຄໍາ ເຈົ້າແຂວງຈໍາປາສັກ,ທ່ານ ເມກສະຫວັນ ພົມພິທັກ ປະທານສະພາປາຊາຊົນແຂວງ ພ້ອມດ້ວຍບັນດາທ່ານການນໍາພະແນກການ,ກົມກອງ,ນະຄອນ,ເມືອງ,ຄູອາຈານ ແລະນັກສຶກສາທີ່ເຂົ້າຮ່ວມກໍໄດ້ພ້ອມກັນປູກຕົ້ນໄມ້ຢ່າງເປັນຂະບວນຟົດຟື້ນ.

ຂ່າວຈາກ: ເກດສະໜາ ແກ້ວສຸວັນນະແສງ