ເມືອງເງິນ ແຂວງໄຊຍະບູລີ ໄດ້ຈັດພິທີສະເຫລີມສະຫລອງ ວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ, ວັນສາກົນລຶບລ້າງການໃຊ້ແຮງງານເດັກ ແລະ ວັນສິ່ງແວດລ້ອມໂລກ ໃນວັນທີ 28 ພຶດສະພາ 2020 ນີ້ ຢູ່ທີ່ອ່າງເກັບນ້ຳຫ້ວຍນານ້ອຍ ເມືອງເງິນ ແຂວງໄຊຍະບູລີ.
ເມືອງເງິນ ແຂວງໄຊຍະບູລີ ໄດ້ຈັດພິທີສະເຫລີມສະຫລອງ ວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ, ວັນສາກົນລຶບລ້າງການໃຊ້ແຮງງານເດັກ ແລະ ວັນສິ່ງແວດລ້ອມໂລກ ໃນວັນທີ 28 ພຶດສະພາ 2020 ນີ້ ຢູ່ທີ່ອ່າງເກັບນ້ຳຫ້ວຍນານ້ອຍ ເມືອງເງິນ ແຂວງໄຊຍະບູລີ.
ທ່ານ ສອນສຸກ ພວງແກ້ວ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໃນນາມປະທານພິທີ ໃຫ້ກຽດກ່າວເປີດພິທີໂດຍໄດ້ຍົກໃຫ້ເຫັນຄວາມໝາຍຄວາມສຳຄັນ ແລະ ຄຸນປະໂຫຍດຫລາຍຢ່າງທີ່ຕິດພັນກັບສິ່ງທີ່ມີຊີວິດ ເພື່ອແນໃສ່ສ້າງຄວາມອຸດົມສົມບູນຂອງປ່າໄມ້ ແລະ ຊີວານານາພັນ ເຊິ່ງໃນແຕ່ລະປີ ພັກ ແລະ ລັດຖະບານລາວເຮົາ ໄດ້ຖືເອົາວັນທີ 1 ມີຖຸນາ ເປັນວັນປູກຕົ້ນໄມ້ແຫ່ງຊາດ ໂດຍສະເພາະພົນລະເມືອງລາວ ທຸກຄົນຕ້ອງໄດ້ເຮັດພັນທະ ແລະ ປະກອບສ່ວນເຂົ້າໃນການປູກໄມ້ປູກປ່າ ແລະ ຕິດພັນກັບວັນເດັກນ້ອຍສາກົນ ເພື່ອສ້າງໃຫ້ນ້ອງນ້ອຍນັກຮຽນຮູ້ຈັກອະນຸລັກຮັກປົກປັກຮັກສາປ່າໄມ້ໃຫ້ຫລາຍຂຶ້ນ.
ປີ 2020 ເມືອງເງິນ ຈະສູ້ຊົນປູກໄມ້ໃຫ້ໄດ້ 43,40 ຮຕ, ຟື້ນຟູປ່າທຳມະຊາດໃຫ້ໄດ້ 3.120 ຮຕ. ໄມ້ທີ່ຈະນໍາມາປູກໃນປີນີ້ມີ ໄມ້ຝາງແດງ, ໄມ້ສ້ຽວ, ໄມ້ແຕ້ຂ່າ , ໄມ້ຂົມຝາດ ແລະ ໄມ້ປະດັບຕົວເມືອງ ທັງໝົດ 23.064 ເບ້ຍ ເຊິ່ງໃນນີ້, ເບ້ຍໄມ້ທີ່ກ້າໄດ້ຢູ່ພາຍໃນເມືອງ 11.510 ເບ້ຍ, ບໍລິສັດໄຟຟ້າຫົງສາ ສະໜອງໃຫ້ 11.554 ເບ້ຍ.
ຈາກນັ້ນ, ທ່ານ ທອງສຸກ ຈັນປະເສີດ ຫົວໜ້າຫ້ອງການກະ ສິກຳ ແລະ ປ່າໄມ້ ເມືອງ ກໍ່ໄດ້ຂຶ້ນຜ່ານຂໍ້ຕົກລົງຂອງ ທ່ານເຈົ້າເມືອງ ວ່າດ້ວຍການແບ່ງປັນເບ້ຍໄມ້ ແລະ ເນື້ອທີ່ປູກ ໃຫ້ບ້ານຈຳນວນ 22 ບ້ານໃນທົ່ວເມືອງ ນຳໄປປູກໃນຂອບເຂດຮັບຜິດຊອບ ແລະ ຟື້ນຟູປ່າທຳມະຊາດໃຫ້ໄດ້ຕາມລະດັບຄາດໝາຍທີ່ວາງໄວ້
ພາຍຫລັງສຳເລັດພິທີເປັນທາງການແລ້ວ ທາງຄະນະປະທານ, ແຂກ ກໍ່ໄດ້ຮ່ວມກັນປູກຕົ້ນໄມ້ ຢູ່ອ່າງເກັບນ້ຳຫ້ວຍນານ້ອຍ ອີກດ້ວຍ.
ໂດຍ: ອິນແປງ ແຫວນຄຳ
