ຄະນະສະເພາະກິດ ໄດ້ແຈ້ງໃຫ້ຮູ້ວ່າ ຮອດປັດຈຸບັນ ມີຄົນເຈັບທີ່ນອນຕິດຕາມອາການຢູ່ໂຮງໝໍມິດຕະພາບ 5 ຄົນ (ຍິງ 4) ໃນນັ້ນໄດ້ກວດຄືນ 3 ຄົນ ໃຫ້ຜົນລົບ 2 ຄົນ, ໝາຍຄວາມວ່າບໍ່ພົບພະຍາດໂຄວິດ-19 ແລະ ວັນທີ 27 ພຶດສະພາ 2020 ນີ້ ຈະມີການກວດຄືນເປັນເທື່ອທີ 2 ຖ້າວ່າຜົນກວດອອກມາເປັນລົບອີກ ກໍ່ຈະອະນຸຍາດໃຫ້ກັບບ້ານ.
ກ່ຽວກັບການເຝົ້າລະວັງພະຍາດໂຄວິດ-19 ຢູ່ຕາມຈຸດຜ່ານດ່ານຕ່າງໆ ຮອດເວລາ 17 ໂມງຂອງວັນທີ 25 ພຶດສະພາ 2020 ມີຄົນເຂົ້າມາປະ ເທດລາວທັງໝົດ 1,934 ຄົນ ໂດຍຜ່ານດ່ານສາກົນຕ່າງໆໃນຂອບເຂດທົ່ວປະເທດ ໂດຍມີຜູ້ອອກແຮງງານລາວ, ຈີນ, ຄົນຂັບລົດຂົນສົ່ງສິນຄ້າ ແລະ ນັກສຶກສາລາວ, ໃນແຕ່ລະດ່ານມີການວັດແທກອຸນຫະພູມຮ່າງກາຍ ແລະ ບໍ່ພົບຜູ້ໃດທີ່ມີອາການເປັນໄຂ້.
ທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງຂ່າວໃນມື້ວັນທີ 26 ພຶດສະພາ 2020 ວ່າ: ຜູ້ອອກແຮງງານລາວ ແລະ ຈີນທັງໝົດນີ້ແມ່ນໄດ້ເກັບຕົວຢ່າງມາກວດຫາເຊື້ອພະຍາດໂຄວິດ-19 ແລະ ນໍາສົ່ງໄປຈໍາກັດບໍລິເວນ ທີ່ໄດ້ ກໍານົດໄວ້ໃນບັນດາແຂວງຕ່າງໆ ເປັນໄລຍະເວລາ 14 ວັນ. ສະເພາະວັນທີ 25 ພຶດສະພາ ນີ້ບໍ່ພົບຜູ້ຕິດເຊື້ອເພີ່ມ.
ຂ່າວ: ວຽງຈັນທາຍ
