ນະໂຍບາຍຂອງໄຟຟ້າລາວ ຕໍ່ສັງຄົມເພື່ອຫລຸດຜ່ອນຜົນກະທົບຈາກ COVID-19 !
ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ໄດ້ໃຫ້ສໍາພາດຕໍ່ນັກຂ່າວ ເມື່ອວັນທີ 20 ພຶດສະພາ 2020 ກ່ຽວກັບການກໍານົດນະໂຍບາຍໃຫ້ສັງຄົມ ເພື່ອຊ່ວຍຫລຸດ ຜ່ອນຜົນກະທົບຈາກການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ COVID-19 ວ່າ: ຕະຫລອດໄລຍະຜ່ານມາ, ລັດວິສາຫະກິດໄຟຟ້າລາວ ແມ່ນໄດ້ມີນະໂຍບາຍຕ່າງໆເພື່ອຊ່ວຍເຫລືອສັງຄົມມາໂດຍຕະຫລອດ, ບໍ່ວ່າຈະເກີດເຫດການໄພພິບັດທາງທໍາມະຊາດຕ່າງໆເຊັ່ນ: ໄພນໍ້າຖ້ວມ, ໄພແລ້ງ ກໍໄດ້ຫລຸດຄ່າກະແສໄຟຟ້າໃຫ້ກັບພາກສ່ວນທີ່ໄດ້ຮັບຜົນກະທົບໜັກ.
ສໍາລັບໃນໄລຍະເກີດການລະບາດຂອງພະຍາດ COVID-19 ນີ້ ກໍພໍດີຖືກກັບໄລຍະທີ່ລັດຖະ ບານໄດ້ມີແຈ້ງການໃຫ້ຂະແໜງການກ່ຽວຂ້ອງ ຕ້ອງປັບປຸງໂຄງສ້າງລາຄາໄຟຟ້າໃໝ່ ແລະ ການກໍານົດລາຄາໄຟຟ້າໃໝ່ ຊຶ່ງເຫັນວ່າ ຜູ້ຊົມໃຊ້ສ່ວນຫລາຍນັບທັງພາກທີ່ຢູ່ອາໄສ ແລະ ບໍ່ແມ່ນພາກທີ່ຢູ່ອາໄສກໍແມ່ນໄດ້ມີສ່ວນຫລຸດຈາກລາຄາເດີມ ແຕ່ 2-35% ສະເລ່ຍແລ້ວປະມານ 6% ຫລື ຕົກເປັນເງິນລວມປະມານ 300 ກວ່າຕື້ກີບຕໍ່ປີ.
ສະນັ້ນ ຈຶ່ງຖືເອົາການປັບປຸງລາຄາໃໝ່ນີ້ເປັນນະໂຍບາຍລວມອັນໜຶ່ງ. ນອກນີ້ ກໍໄດ້ມີນະໂຍບາຍເລື່ອນຊໍາລະໜີ້ຄ່າກະແສໄຟຟ້າ ພາກທີ່ຢູ່ອາໄສຈາກປົກກະຕິແມ່ນໃນໄລຍະເວລາ 7-30 ວັນ ເພີ່ມຂຶ້ນເປັນ 7-45 ວັນ ແລະ ພາກສ່ວນບໍ່ແມ່ນທີ່ຢູ່ອາໄສ ຈາກປົກກະຕິແມ່ນ 7-15 ວັນ ກໍເພີ່ມຂຶ້ນເປັນ 7-30 ວັນ ຫລັງຈາກມື້ໄດ້ຮັບບິນຄ່າໄຟຟ້າ ຫລື ກໍລະນີຜູ້ທີ່ມີສັນຍາກໍແມ່ນເພີ່ມໃຫ້ອີກ 15 ວັນ ໃນໄລຍະ 3 ເດືອນ ຄື: ເດືອນພຶດສະພາ, ມິຖຸນາ ແລະ ກໍລະກົດ 2020.
ພິເສດຍັງໄດ້ກໍານົດນະໂຍບາຍຫລຸດຄ່າຊົມໃຊ້ໄຟຟ້າ ສໍາລັບທີ່ຢູ່ອາໄສຂອງບັນດາແພດໝໍ ທີ່ປະຕິ ບັດໜ້າທີ່ວຽກງານຕໍ່ສູ້ຕ້ານກັບການລະບາດພະຍາດ COVID-19 ລົງອີກ 15% ເປັນໄລຍະເວລາ 3ເດືອນ, ປັດຈຸບັນ ຂະແໜງການຂອງຕົນພວມເລັ່ງປະສານສົມທົບກັບ ກະຊວງສາທາລະນະສຸກ ແລະ ໂຮງໝໍແຂວງຕ່າງໆເພື່ອໃຫ້ສາມາດຈັດຕັ້ງປະຕິບັດນະໂຍບາຍດັ່ງກ່າວໄດ້ໂດຍໄວ.
ຂ່າວ: ສຸພາສະຫວັນ ສີຊະນະມຸງຄຸນ.
ຂປລ
---------------
ຢ່າລືມກົດຕິດຕາມເພຈ All in LAOS
------------------------------
