ຂປລ. ກອງປະຊຸມປຶກສາຫາລື ອາຊຽນ-ອົດສະຕຣາລີ ຄັ້ງທີ 32 ແບບທາງໄກ ທີ່ກະຊວງການຕ່າງ ປະເທດ ນະຄອນຫລວງວຽງຈັນ, ໃນວັນທີ 18 ພຶດສະພາ 2020, ສອງຝ່າຍໄດ້ເປັນເອກະພາບກັນຕໍ່ທິດທາງແຜນການຮ່ວມມືໃນຕໍ່ໜ້າ ໂດຍສະເພາະການສືບຕໍ່ຈັດຕັ້ງປະຕິບັດ ແຜນປະຕິບັດງານ ອາຊຽນ-ອົດສະຕຣາລີ ໄລຍະ 2020-2024 ຊຶ່ງຈະສຸມໃສ່ບາງຂົງເຂດບູລິມະສິດຕື່ມ ເປັນຕົ້ນ ການຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ, ຄວາມໝັ້ນຄົງທາງຄອມພິວເຕີ, ການເຊື່ອມຈອດອາຊຽນ, ສັນຍາການຮ່ວມມືເສດຖະກິດຮອບ ດ້ານລະດັບພາກພື້ນ ຫລື RCEP, ອຸດສາຫະກຳ 4.0, ການຮັດແຄບຄວາມແຕກໂຕນດ້ານການພັດທະນາ, ການສຶກສາ, ສາທາ, ການໄປມາຫາສູ່ລະ ຫວ່າງປະຊາຊົນກັບປະຊາຊົນ, ບັນຫາການປ່ຽນແປງຂອງດິນຟ້າອາກາດ, ການຮ່ວມມືໃນຂອບແມ່ນ້ຳຂອງ ແລະ ອື່ນໆ.
ເຂົ້າຮ່ວມກອງປະຊຸມຄັ້ງນີ້, ໂດຍທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ພ້ອມຄະນະ ຊຶ່ງພາຍໃຕ້ການເປັນປະທານຮ່ວມ ຂອງ ມາເລເຊຍ ແລະ ອົດສະຕຣາລີ. ເຂົ້າຮ່ວມກອງປະຊຸມຄັ້ງນີ້ ຍັງມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫຍ່ອາຊຽນ ແລະ ວິຊາການກ່ຽວຂ້ອງຈຳນວນໜຶ່ງ. ກອງປະຊຸມໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດການຮ່ວມມືອາຊຽນ-ອົດສະຕຣາລີ ໃນໄລຍະຜ່ານມາ ໂດຍກວມ ລວມເອົາທັງສາມເສົາຄ້ຳການສ້າງປະຊາຄົມອາຊຽນ ຄື: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະ ທຳ-ສັງຄົມ. ພ້ອມນີ້, ກອງປະຊຸມຍັງໄດ້ປຶກສາຫາລື ແລະ ແຈ້ງໃຫ້ກັນຊາບ ກ່ຽວກັບສະພາບການ ກໍຄືມາດຕະການ ແລະ ບົດຮຽນທີ່ດີຂອງແຕ່ລະປະເທດສະມາຊິກອາຊຽນ ແລະ ອົດສະຕຣາລີ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19.
ພິເສດ, ກອງປະຊຸມຄັ້ງນີ້ໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເພື່ອປະກອບສ່ວນເຂົ້າໃນການຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ ກໍຄື ໃນໂລກ ເປັນ ຕົ້ນແມ່ນການສືບຕໍ່ສົ່ງເສີມລະບົບການຄ້າຫລາຍຝ່າຍ, ໂຄງສ້າງພາກພື້ນ ທີ່ອາຊຽນເປັນຜູ້ນຳພາ, ເອກະສານແນວຄວາມຄິດອາຊຽນ ວ່າດ້ວຍ ອິນໂດ-ປາຊີຟິກ ແລະ ບັນຫາອື່ນໆ.
ກອງປະຊຸມໄດ້ເຫັນດີ ຈັດກອງປະຊຸມທາງໄກ ໃນລະດັບລັດຖະມົນຕີຕ່າງປະເທດ ອາຊຽນ-ອົດສະຕາລີ ວ່າດ້ວຍການຕ້ານການແຜ່ລະບາດຂອງພະຍາດ ໂຄວິດ-19 ໃນວັນທີ 4 ມິຖຸນາ 2020 ແລະ ຍັງໄດ້ກະກຽມໃຫ້ແກ່ ກອງປະຊຸມລັດຖະມົນຕີຕ່າງປະເທດອາຊຽນ ກັບ ອົດສະຕຣາລີ ທີ່ຈະມີຂຶ້ນໃນເດືອນສິງຫາ 2020 ນີ້ ທີ່ ສ.ສ. ຫວຽດນາມ ອີກດ້ວຍ.
