ພຽງເດືອນດຽວມີຜູ້ເສຍຊີວິດແລ້ວ 71 ຄົນຈາກອຸປະຕິເຫດບົນທ້ອງຖະໜົນ ທີ່ເກີດຂຶ້ນ 435 ຄັ້ງ ໃນທົ່ວປະເທດ, ຊຶ່ງນະຄອນຫລວງວຽງຈັນຍັງເປັນອັນດັບໜື່ງທີ່ເກີດອຸປະຕິເຫດຫຼາຍກວ່າແຂວງອື່ນໆ ໂດຍມີອຸປະຕິເຫດເກີດຂຶ້ນ 64 ຄັ້ງເຮັດໃຫ້ມີຜູ້ເສຍຊີວິດ 11 ຄົນ.
ພະແນກຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ລາຍງານໃນ ວັນທີ 13 ພຶດສະພາ 2020 ວ່າ ສະເພາະເດືອນເມສາ 2020 ທົ່ວປະເທດໄດ້ເກີດມີອຸບັດເຫດບົນທ້ອງຖະໜົນ 435 ຄັ້ງ ແລະ ໄດ້ເຮັດໃຫ້ມີຄົນເສຍຊີວິດທັງໝົດ 71 ຄົນ (ຍິງ 8 ຄົນ), ໄດ້ຮັບບາດ ເຈັບ 557 ຄົນ (ບາດເຈັບເລັກໜ້ອຍ 243 ຄົນ, ສົມຄວນ 227 ຄົນ ແລະ ສາຫັດ 87 ຄົນ). ນອກນັ້ນໄດ້ເຮັດໃຫ້ມີພາຫະນະເປ່ເພທັງໝົດ 719 ຄັນ (ເປ່ເພເລັກນ້ອຍ 320 ຄັນ ສົມຄວນ 376 ຄັນ ແລະ ໃຊ້ການບໍ່ໄດ້ 23 ຄັນ).
ທ່ານ ພັທ ເພັງສະຫວັນ ທໍາມາບູນ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ກ່າວຕໍ່ທີມຂ່າວວຽງຈັນທາຍ ມື້ເຊົ້ານີ້ວັນທີ 14 ພຶດສະພາ 2020 ວ່າ: ເຖິງແມ່ນວ່າໃນເດືອນເມສາ ເປັນໄລຍະທີ່ມີມາດຕະການຄວບຄຸມ ແລະ ປ້ອງກັນການແຜ່ລະບາດຂອງພະຍາດ ໂຄວິດ-19 ກໍ່ຕາມ ແຕ່ທົ່ວປະເທດຍັງໄດ້ເກີດມີອຸປະຕິເຫດເກີດຂຶ້ນຕາມທ້ອງຖະໜົນເປັນຈໍານວນຫຼາຍ ຍ້ອນຍັງມີການສັງສັນກິນເຫຼົ້າ-ເບຍ ຊຶ່ງເປັນການລະເມີດຄໍາສັ່ງຂອງນາຍົກລັດຖະມົນຕີ ກ່ຽວກັບມາດຕະການການຕ້ານ ແລະ ຄວບຄຸມການແຜ່ລະບາດຂອງພະ ຍາດໂຄວິດ-19, ຊຶ່ງການດື່ມຂອງມືນເມົານີ້ແມ່ນສາເຫດຫຼັກທີ່ກໍ່ໃຫ້ການເກີດອຸບັດເຫດ ນອກນັ້ນຍັງເກີດຈາກການຂັບຂີ່ໄວເກີດກຳນົດ, ບໍ່ເຄົາລົບກົດລະບຽບຈະລາຈອນ ແລະ ອື່ນໆ.
ຂ່າວ: ວຽງຈັນທາຍ
ພາບປະກອບ: ໜ່ວຍກູ້ໄພ ມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ 1623
