ວັນທີ 02 ພຶດສະພາຜ່ານມາ ເຈົ້າໜ້າທີ່ກຳລັງປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ໄດ້ອອກກວດກາລາດຕະເວນຕາມເສັ້ນທາງຕ່າງໆ ພໍມາຮອດເສັ້ນທາງຕັດໃໝ່ບຶງທາດຫຼວງ ເມືອງໄຊເສດຖາ ພົບເຫັນກຸ່ມໄວລຸ້ນຈຳນວນ 6 ຄົນ ຂີ່ລົດຈັກກວນເມືອງ ສ້າງຄວາມເນື່ອງນັ້ນ ແລະ ເຮັດໃຫ້ສັງຄົມບໍ່ເປັນລະບຽບຮຽບຮ້ອຍ ໂດຍສະເພາະແມ່ນລະເມີດຕໍ່ຄຳສັ່ງເລກທີ 06/ນຍ, ເຈົ້າໜ້າທີ່ຈິ່ງໄດ້ນຳມາສຶກສາອົບຮົມ ແລະ ເຮັດບົດບັນທຶກໄວ້ເປັນຫຼັກຖານ ແລະ ມອບໃຫ້ຜູ້ປົກຄອງນຳໄປສຶກສາອົບຮົມ, ຖ້າຫາກພົບເຫັນພວກກ່ຽວກະທຳຜິດອີກ ແມ່ນຈະປະຕິບັດຕາມຂັ້ນຕອນລະບຽບກົດໝາຍ.
ກຸ່ມໄວລຸ້ນດັ່ງກ່າວມີ: ທ້າວ ແກ້ວວິໄຊ, ອາຍຸ 14 ປີ, ບ້ານໂພນພະເນົາ ເມືອງໄຊເສດຖາ; ທ້າວ ພອນປະເສີດ, ອາຍຸ 14 ປີ, ບ້ານສະພານທອງໃຕ້; ທ້າວ ນິຕິສອນ, ອາຍຸ 16 ປີ, ບ້ານສະພານທອງ ທັງ 2 ຢູ່ເມືອງສີສັດຕະນາກ; ທ້າວ ອັກຄະເດດ, ອາຍຸ 16 ປີ, ບ້ານນາໄຊ ເມືອງໄຊເສດຖາ; ທ້າວ ກິດສະນະ, ອາຍຸ 13 ປີ, ບ້ານນາຊາຍໃຕ້ ເມືອງນາຊາຍທອງ ແລະ ທ້າວ ນົບພະກອນ, ອາຍຸ 13 ປີ, ບ້ານໜອງວຽງຄໍາ ເມືອງໄຊທານີ ນະຄອນຫຼວງວຽງຈັນ
ພວກກ່ຽວໄດ້ປະຕິຍານຕໍ່ເຈົ້າໜ້າທີ່ວ່າ: ຈະບໍ່ເຂົ້າຮ່ວມ ຫຼື ຂີ່ລົດກວນເມືອງອີກນັບແຕ່ມື້ນີ້ເປັນຕົ້ນໄປ, ຖ້າຫາກວ່າພວກກ່ຽວຍັງດື້ດ້ານຂັບຂີ່ລົດກວນເມືອງ ແລະ ດັດແປງສະພາບລົດອີກ ແມ່ນໃຫ້ເຈົ້າໜ້າທີ່ດໍາເນີນຄະດີຕາມລະບຽບກົດໝາຍ ແລະ ຍິນດີໃຫ້ຍຶດລົດເປັນຂອງລັດ.
ປກສ ນະຄອນຫຼວງວຽງຈັນ
