ວັນທີ 25 ເມສາ ຄົນເຈັບທີ່ຕິດເຊື້ອພະຍາດໂກວິດ 19 ໄດ້ຮັບອານຸຍາດໃຫ້ອອກໂຮງໝໍອີກ 3 ຄົນ 13 ມື້ຜ່ານມາ ສປປ ລາວ ບໍ່ມີຜູ້ຕິດເຊື້ອເພີ່ມ .
ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ ຄວບຄຸມໂກວິດ 19 ຖະແຫລງໃນຕອນບ່າຍ ວັນທີ 25 ເມສານີ້ ເຖິງສະພາບການລະບາດຂອງພະຍາດ ໂກວິດ 19 ຢູ່ລາວວ່າ:ໃນວັນທີ 24 ເມສາ 2020, ໄດ້ເກັບຕົວຢ່າງມາກວດທັງໝົດ 50 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 17 ຄົນ, ແຮງງານລາວທີ່ກັບມາຈາກ ປະເທດໄທ 26 ຄົນ ແລະ ມີຜູ້ຕິດເຊື້ອນອນຢູ່ໂຮງໝໍມິດຕະພາບ 7 ຄົນ ,ຜົນກວດທັງໝົດ 50 ຄົນ ບໍ່ພົບເຊື້ອ. ໝາຍຄວາມວ່າໃນວັນທີ 24 ເມສາ 2020 ບໍ່ມີກໍລະນີໃໝ່.
ຈໍານວນຜູ້ສໍາຜັດໃກ້ຊິດກັບຜູ້ຕິດເຊື້ອທັງໝົດ ທີ່ໄດ້ຕິດຕາມ ແຕ່ວັນທີ 9 ມີນາ ຮອດ 24 ເມສາ 2020 ມີ 313 ຄົນ ເຊິ່ງເປັນຜູ້ສຳຜັດໃກ້ຊິດ ກັບຜູ້ທີ່ຕິດເຊື້ອ ໂຄວິດ-19 ຈໍານວນ 19 ກໍລະນີ, ຜູ້ທີສໍາຜັດໃກ້ຊິດທັງໝົດ 313 ຄົນ ມາຮອດປະຈຸບັນແມ່ນໄດ້ຄົບກຳນົດການຕິດຕາມ 14 ວັນແລ້ວ.
ການຕິດຕາມປີ່ນປົວຄົນເຈັບຢູ່ໂຮງໝໍ
ມື້ນີ້ກໍ່ມີຂ່າວດີມາແຈ້ງໃຫ້ບັນດາຊາບວ່າຜູ້ຕິດເຊື້ອທີ່ນອນຕິດຕາມຢູ່ໂຮງໝໍ ພວກເຮົາໄດ້ເກັບຕົວຢ່າງມາກວດວິເຄາະຄືນ 7 ຄົນ ແລະ ພົບວ່າມີ 3 ຄົນຢູ່ໂຮງໝໍມິດຕະພາບ ບໍ່ພົບເຊື້ອ 2 ຄັ້ງຕິດຕໍ່ກັນ ເຊິ່ງຈະໄດ້ອອກໂຮງໝໍມື້ນີ້ ,ສະນັ້ນຈຶ່ງຍັງເຫຼືອມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍພຽງແຕ່ 12 ຄົນ.
ຢູ່ໂຮງໝໍແຂວງຫຼວງພະບາງ 1 ຄົນ ເປັນເພດຊາຍ, ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ.
ຢູ່ໂຮງໝໍມິດຕະພາບ ມີ 11 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ.
ຮອດວັນທີ 25 ເມສາ ທົ່ວໂລກມີຜູ້ຕິດເຊື້ອພະຍາດທັງໝົດ 2.832 199ຄົນ ,ເພີ່ມຂຶ້ນ 101.151ຄົນ, ເສຍຊີວິດ 197.191ຄົນ, ປົວຫາຍດີ 786.029ຄົນ,ສະເພາະສະຫະລັດອາເມຣິກາ ມີຜູ້ຕິດເຊື້ອທັງໝົດ 926.969ຄົນ, ເສຍຊີວິດ 52.127ຄົນ (ຫລາຍກວ່າໝູ່ໃນໂລກ) ສປ ຈີນ ມີຜູ້ຕິດຊື້ອສະສົມທັງໝົດ 82.816ຄົນ, ເສຍຊີວິດ 4.632 ຄົນ, ປົວຫາຍດີ 77.346ຄົນ. ສສ ຫວຽດນາມ ມີຜູ້ຕິດເຊື້ອ 270ຄົນ ປົວຫາຍດີ 220 ຄົນ, ບໍ່ມີຜູ້ເສຍຊີວິດ. ໄທ ມີຜູ້ຕິດເຊື້ອ 2.854ຄົນ, ປົວຫາຍດີ 2.490ຄົນ, ເສຍຊີວິດ 50 ຄົນ
