ໃນວັນທີ 24 ເມສາ 2020, ພົຕ ທອງເຫຼັກ ມັງໜໍ່ເມກ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ລົງຊີ້ນຳວຽກງານປ້ອງກັນໄລຍະເຝົ້າລະວັງການແຜ່ລະບາຍພະຍາດໂຄວິດ-19 ຢູ່ກອງບັນຊາການ ປກສ ນະຄອນຫຼວງວຽງຈັນ ໂດຍທ່ານກ່າວເນັ້ນໃຫ້ກອງບັນຊາການ ປກສ ນະຄອນຫຼວງວຽງວຽງຈັນ ເພີ່ມທະວີໃນການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີ ເລກທີ 06/ນຍ ໃຫ້ເຂັ້ມງວດຂຶ້ນກວ່າເກົ່າ ໂດຍໃຫ້ເອົາໃຈໃສ່ໃນການກວດກາລາດຕະເວນຕາມເສັ້ນທາງ ແລະ ກວດກາການເຂົ້າ-ອອກເມືອງ ໃນຂອບເຂດທີ່ຕົນຮັບຜິດຊອບ; ພ້ອມທັງສົມທົບກັບຄະນະສະເພາະກິດ, ອົງການປົກຄອງທ້ອງຖິ່ນທຸກຂັ້ນ ແລະ ພາກສ່ວນທີ່ກ່ຽວຂ້ອງ ສືບຕໍ່ໂຄສະນາເຜີຍແຜ່ໃຫ້ປະຊາຊົນເຂົ້າໃຈກ່ຽວກັບຜົນຮ້າຍ ແລະ ຜົນກະທົບຈາກພະຍາດໂຄວິດ-19 ໂດຍສະເພາະຜູ້ທີ່ຖືກກັກກັນຢູ່ເຮືອນ, ຢູ່ບ້ານ ຫຼື ສູນ ແລະ ຜູ້ທີ່ໄປ-ມາຫາກັນ ຕ້ອງເຂົ້າໃຈສະພາບການໃຫ້ດີ, ບໍ່ໃຫ້ປະໝາດເດັດຂາດ ໄລຍະນີ້ໃຫ້ງົດອອກຈາກບ້ານຈົນເຖິງວັນທີ 03 ພຶດສະພາ 2020, ທຸກຄົນຕ້ອງມີຄວາມຮັບຜິດຊອບຕໍ່ຕົນເອງ, ຄອບຄົວ, ສັງຄົມ ແລະ ປະເທດຊາດ.
ໃນໂອກາດນີ້ ພັທ ສຸກພະຈັນ ບຸດດາຄໍາ ຮັກສາການຫົວໜ້າກອງບັນຊາການ ປກສ ນວ ກໍ່ໄດ້ລາຍງານການຈັດຕັ້ງປະຕິບັດ 10 ແຜນວຽກໃນໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີ-ດ້ານອ່ອນ ແລະ ຂໍ້ຄົງຄ້າງ ໃນການປະຕິບັດໜ້າທີ່ຕາມພາລະບົດບາດທີ່ໄດ້ຮັບຜິດຊອບ. ນອກນັ້ນ, ບັນດາຄະນະກອງບັນຊາການ ປກສ ນວ ກໍ່ໄດ້ປະກອບຄໍາຄິດເຫັນ ໂດຍຍົກໃຫ້ເຫັນບາງບັນຫາທີ່ພົ້ນເດັ່ນເປັນຕົ້ນ ແມ່ນການແກ້ໄຂປະກົດການຫຍໍ້ທໍ້, ການລົງເຮັດບົດທຶກກ່າວເຕືອນຜູ້ທີ່ລະເມີດ, ບັນດາຫົວໜ່ວຍທຸລະກິດ ທີ່ຍັງດື້ດ້ານລະເມີດຄໍາສັ່ງ 06/ນຍ. ໃນຕອນທ້າຍ ພົຕ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງ ປກສ ໄດ້ຕາງໜ້າໃຫ້ກະຊວງປ້ອງກັນຄວາມສະຫງົບ ມອບເງິນຈໍານວນ 50 ລ້ານກີບ ແລະ ຜ້າອັດປາກ 50 ກັບ ໃຫ້ ປກສ ນະຄອນຫຼວງວຽງຈັນ ເພື່ອຊຸກຍູ້ການປະຕິບັດໜ້າທີ່ຂອງກໍາລັງປ້ອງກັນຄວາມສະຫງົບ ນວ, ຕາງໜ້າຮັບໂດຍ ພັທ ສຸກພະຈັນ ບຸດດາຄໍາ ຮັກສາການຫົວໜ້າກອງບັນຊາການ ປກສ ນວ.
ຂ່າວ: ລັດຕະນະ, ປກສ ນວ
