ກະຊວງສາທາລະນະສຸກ ສປປ ລາວ ມອບໃບຍ້ອງຍໍແກ່ຄະນະຊ່ຽວຊານແພດ ສປ ຈີນທີ່ມາຊ່ວຍຕ້ານການລະບາດຂອງພະຍາດໂຄວິດ-19 ຢູ່ ສປປ ລາວ
CRI-FM93: ວັນທີ 10 ເມສາ 2020 ນີ້, ກະຊວງສາທາລະນະສຸກ ສປປ ລາວ ໄດ້ຈັດພິທີສະຫຼຸບຜົນງານຂອງຄະນະຊ່ຽວຊານແພດ ສປ ຈີນທີ່ມາຊ່ວຍຕ້ານການລະບາດຂອງພະຍາດໂຄວິດ-19 ຢູ່ ສປປ ລາວ, ພ້ອນກັນນັ້ນ, ກໍໄດ້ມອບໃບຍ້ອງຍໍໃຫ້ແກ່ຄະນະຊ່ຽວຊານແພດ ສປ ຈີນ ເພື່ອຍ້ອງຍໍຊົມເຊີນຄະນະດັ່ງກ່າວທີ່ໄດ້ປະກອບສ່ວນເຂົ້າໃນການປ້ອງກັນ ແລະຄວບຄຸມການແຜ່ລະບາດພະຍາດໂຄວິດ19 ຢູ່ ສປປ ລາວ.
ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກກ່າວວ່າ: ຄະນະຊ່ຽວຊານແພດ ສປ ຈີນໄດ້ໃຫ້ການປຶກສາ, ແນະນໍາ ແລະນໍາພາຄະນະແພດຂອງ ສປປ ລາວທັງຢູ່ສູນກາງ ແລະບັນດາແຂວງໃນການປ້ອງກັນ, ຄວບຄຸມການລະບາດ ລວມໄປເຖິງການຄຸ້ມຄອງກໍລະນີຜູ້ສົງໄສ ແລະການປິ່ນປົວຄົນເຈັບທີ່ເປັນພະຍາດໂຄວິດ-19 ຢ່າງມີຄວາມຮັບຜິດຊອບ, ມີຄວາມຕັ້ງໃຈ ແລະເຮັດວຽກຢ່າງເຕັມກໍາລັງ ຢ່າງບໍ່ຮູ້ອິດຮູ້ເມື່ອຍ ເຮັດວຽກທັງເວັນທັງຄືນ ເພື່ອຊ່ວຍເຫລືອຄະນະແພດຂອງລາວ ກໍ່ຄືປະຊາຊົນລາວ ດ້ວຍນໍ້າໃຈມິດຕະພາບ, ຄວາມຮັກແພງ ແລະ ຄູ່ຮ່ວມຊາຕາກໍາດຽວກັນ ຕາມທິດທາງຂອງການນໍາສອງປະເທດ.
ທ່ານຍັງກ່າວຕື່ມວ່າ: ການມາຊ່ວຍເຫລືອ ສປປ ລາວ ຂອງຄະນະຊ່ຽວຊານແພດ ສປ ຈີນໃນຄັ້ງນີ້ ແມ່ນມີຄຸນຄ່າ ແລະປະໂຫຍດຫລາຍ, ໄດ້ຊ່ວຍໃຫ້ພວກເຮົາປັບປຸງ, ຍົກລະດັບມາດຕະການໃນການປ້ອງກັນ, ຄວບຄຸມການລະບາດຂອງພະຍາດ ລວມໄປເຖິງວິທີການຄຸ້ມຄອງກໍລະນີຜູ້ສົງໄສ ແລະການປິ່ນປົວຄົນເຈັບທີ່ເປັນພະຍາດ ໂຄວິດ–19. ນອກນັ້ນ, ທາງລັດຖະບານ ສປ ຈີນ ຍັງໄດ້ສົ່ງຢາ, ເຄື່ອງມື ແລະ ອຸປະກອນການແພດ ເປັນຈໍານວນຫຼວງຫຼາຍມາໃຫ້ ສປປ ລາວ. ທັງໝົດນີ້, ເຮັດໃຫ້ພວກເຮົາມີຄວາມໝັ້ນໃຈ ແລະຮູ້ສຶກມີກໍາລັງໃຈໃນການ ຄວບຄຸມ ແລະຕອບໂຕ້ຕໍ່ການລະບາດຂອງພະຍາດ ໂຄວິດ–19 ຢູ່ ສປປ ລາວ ແລະເຊື່ອໝັ້ນວ່າ ພວກເຮົາຈະສາມາດຄວບຄຸມ ແລະເອົາຊະນະພະຍາດນີ້ໄດ້.
---------------
ຢ່າລືມກົດຕິດຕາມເພຈ All in LAOS
------------------------------
