ໃນຕອນເຊົ້າວັນທີ 12 ມີນາ 2020 ນີ້, ໄດ້ເກີດເຫດການໄຟໄໝ້ ກຸຕິວັດສຸລິຍານຸພາໂວ ມັງຄະຣາມ (ວັດນາເຫຼັກ), ບ້ານນາເຫຼັກ ເມືອງ ແລະ ເມືອງສາລະວັນ ໄດ້ເຮັດໃຫ້ໄຟໄໝ້ກຸດຕິ ໝົດກ້ຽງ ທັງຫຼັງ. ໜ່ວຍງານດັບເພີງແຂວງສາລະວັນ ໄດ້ເຂົ້າສະກັດໄຟ ບໍ່ໃຫ້ລຸກລາມໄປບ່ອນອື່ນ.
ພຣະອາຈານ ສົມເດັດ ຕວນ ລຸນນະວົງສາ ເຈົ້າອະທິການວັດນາເຫຼັກ ໄດ້ເລົ່າວ່າ: ເຫດການດັ່ງກ່າວໄດ້ເກີດຂຶ້ນໃນເວລາ 9:00 ໂມງ ຂອງວັນທີ 12 ມີນານີ້ ແລະ ໄຟໄດ້ລຸກລາມໄໝ້ຢ່າງໄວວາ. ໂຊກດີບໍ່ມີຜູ້ໃດໄດ້ຮັບບາດເຈັບ, ເນື່ອງຈາກພຣະສົງ-ສຳມະເນນ ຈຳນວນໜື່ງໄດ້ໄປໂຮງຮຽນ. ເຊີ່ງໃນເບື້ອງຕົ້ນໄດ້ຍິນສຽງ ຫຼັງຈາກໄປເບີ່ງເຫັນວ່າ ໄຟໄດ້ລຸກລາມໄໝ້ ຢ່າງໄວວາ, ຮຸນແຮງ ແລະ ບໍ່ສາມາດເອົາຫຍັງໄດ້ທັນ, ຍ້ອນວ່າກຸຕິ ຫຼັງນີ້ ໃຊ້ເປັນບ່ອນເກັບເຄື່ອງກອງບຸນ (ສາງເກັບເຄື່ອງ). ນອກນັ້ນຍັງມີອຸປະກອນ, ເຄື່ອງໃຊ້ຕ່າງໆ ແລະ ຜ້າຫົ່ມ, ໝອນ, ມຸ້ງ ແລະອື່ນໆ ຂອງສາມະເນນ ເປັນຈຳນວນຫຼາຍ ກໍ່ຖືກໄຟໄໝ້ໝົດກ້ຽງ ແລະ ຍ້ອນສະພາບອາກາດຮ້ອນອົບເອົ້າຕື່ມອີກ. ຈື່ງໄດ້ໂທໃສ່ໜ່ວຍງານດັບເພີງ ມາສະກັດກັ້ນໄຟ ບໍ່ໄດ້ລຸກລາມໄປບ່ອນອື່ນ. ກຸດຕິດັ່ງກ່າວ ເປັນກຸດຕິ 2 ຊັ້ນ, ເຄີ່ງໄມ້ເຄີ່ງປູນ ເຊີ່ງມີຄວາມຊຸດໂຊມຫຼາຍພໍສົມຄວນແລ້ວ ແລະ ມີອາຍຸການນຳໃຊ້ດົນນານ 10 ກວ່າປີອີກ, ທາງວັດມີແຜນຈະມ້າງກຸດຕິດັ່ງກ່າວແລ້ວ ແຕ່ເກີດເຫດໄຟໄໝ້ ກ່ອນ, ພຽງແຕ່ 20 ກວ່ານາທີ ເທົ່ານັ້ນ ໄຟໄດ້ໄໝ້ໝົດ ແລະ ກໍສາມາດຄວບຄຸ້ມໄຟໄດ້.
ສຳລັບຄວາມເສຍຫາຍແມ່ນຫຼາຍສົມຄວນ, ຄາດຄະເນໃນເບື້ອງຕົ້ນ 200 ລ້ານກວ່າກີບ, ສ່ວນສາເຫດ, ໜ່ວຍງານທີ່ກ່ຽວຂ້ອງ ຄາດຄະເນວ່າ: ແມ່ນໄຟຟ້າລັດວົງຈອນ
ຂໍຂອບໃຈພາບຈາກ: ວິໄລວອນ ສິດທິໄຊ
