ໃນວັນທີ 6 ມີນາ 2020, ທີ່ຫໍວັດທະນະທຳບັນດາເຜົ່າຫຼັກ 7 ນະຄອນປາກເຊ, ແຂວງຈຳປາສັກ, ໄດ້ຈັດພິທີມອບ – ຮັບໜ້າທີ່ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຈຳປາສັກ ລະຫວ່າງ ທ່ານ ບົວທອງ ສຸວັນນະສານ, ກຳມະການອົງຄະນະພັກແຂວງ ຫົວໜ້າພະແນກ ຖວທ ຜູ້ເກົ່າ ແລະ ທ່ານ ໂສມ ບຸດຕະກຸນ, ກຳມະການອົງຄະນະພັກແຂວງ, ຫົວໜ້າພະແນກ ຖວທ ແຂວງ ຜູ້ໃໝ່, ໂດຍການເຂົ້າຮ່ວມຂອງທ່ານ ນິພອນ ວຽງປະເສີດ, ຮອງເລຂາຄະນະບໍລິຫານງານອົງຄະນະພັກແຂວງ ແລະ ຫົວໜ້າຄະນະຈັດຕັ້ງແຂວງ.

ບັນດາການນຳຈາກພະແນກການຕ່າງໆໃນຂົງເຂດວັດທະນະທຳ – ສັງຄົມ,ແຂວງ, ຫ້ອງການ ຖວທ 9 ເມືອງ, 1 ນະຄອນ, ພ້ອມດ້ວຍ ການນຳ, ສະມາຊິກພັກ ແລະ ພະນັກງານ ຂະແໜງວິຊາການອ້ອມຂ້າງພະແນກ ຖວທ ແຂວງ ກໍ່ເຂົ້າຮ່ວມເຊັ່ນກັນ.

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ

ໃນພິທີ, ທ່ານ ບົວທອງ ສຸວັນນະສານ, ກຳມະການອົງຄະນະພັກແຂວງ, ຫົວໜ້າພະແນກ ຖວທ ຜູ້ເກົ່າ ໄດ້ຂຶ້ນກ່າວມອບໜ້າທີ່ ໂດຍຍົກໃຫ້ເຫັນຜົນງານວຽກງານ ຖວທ ພາຍໃຕ້ການນໍາພາຂອງຕົນໃນໄລຍະຜ່ານມາ, ເປັນຕົ້ນ ແມ່ນວຽກງານສື່ມວນຊົນທີ່ໄດ້ນໍາພາ ໂດຍສຸມໃສ່ໂຄສະນາເຫດການສຳຄັນຂອງພັກ-ຊາດ ແລະ ສາກົນ; ເນື້ອໃນຂອງສື່ມວນຊົນທຸກປະເພດແມ່ນໄດ້ສ່ອງແສງຄວາມເປັນຈິງ, ບໍ່ວ່າຈະເປັນເຫດການທີ່ເກີດຂື້ນທັງພາຍໃນ, ຕ່າງແຂວງ ແລະ ຕ່າງປະເທດ, ສ້າງຄວາມຮັບຮູ້ ແລະ ຄວາມເຂົ້າໃຈຕໍ່ເຫດການ, ສະພາບ ແລະ ການເຄື່ອນໄຫວ ໃນຊີວິດການເມືອງ, ເສດຖະກິດ, ວັດທະນະທຳ-ສັງຄົມພາຍໃນແຂວງ, ແລະ ຮັບປະກັນຄວາມໝັ້ນຄົງດ້ານຂໍ້ມູນຂ່າວສານ ໃຫ້ສະລະຄວາມຮູ້, ສືກສາອົບຮົມປຸກລະດົມ ແລະ ການບັນເທີງໃຫ້ໄປເຖິງເປົ້າໝາຍພາຍໃນແຂວງ, ຕ່າງແຂວງ ແລະ ຕ່າງປະເທດ ໂດຍຜ່ານຫຼາຍປະຕູ, ຫຼາຍເວທີ, ຫຼາຍເຄືອຂ່າຍ ແລະ ຫຼາຍເສັ້ນທາງດ້ວຍຄວາມວ່ອງໄວ, ຊັດເຈນ, ທົ່ວເຖິງກວ່າເກົ່າ.

ໃນປະຈຸບັນ, ທົ່ວແຂວງມີໂທລະໂຄ່ງທັງໝົດ 599 ຊຸດ ແລະ ໄດ້ຊຸກຍູ້ບັນດາເມືອງໃຫ້ສ້າງຫໍຂ່າວ ແລະ ຕິດຂ່າວເຄື່ອນໄຫວຂອງການນຳໃນແຕ່ລະຂັ້ນ, ໂດຍທົ່ວແຂວງມີຫໍຂ່າວທັງໝົດ 10 ຈຸດ, ທີ່ປະຈຳຢູ່ 9 ເມືອງ 1 ນະຄອນ ທົ່ວແຂວງ, ພ້ອມທັງ ມີສະຖານີວິທະຍຸ 5 ແຫ່ງ 6 ຄື້ນຄື: ສະຖານີວິທະຍຸກະຈາຍສຽງແຂວງຈຳປາສັກ, ສະຖານີວິທະຍຸກະຈາຍສຽງເມືອງໂພນທອງ, ສະຖານີວິທະຍຸກະຈາຍສຽງເມືອງຊະນະສົມບູນ, ສະຖານີວິທະຍຸກະຈາຍສຽງເມືອງປາກຊ່ອງ, ສະຖານີວິທະຍຸກະຈາຍສຽງເມືອງສຸຂຸມາ ແລະ ສະຖານີວິທະຍຸກະຈາຍສຽງເມືອງໂຂງ.

ປະຈຸບັນ, ອາຄານວິທະຍຸແຂວງຫຼັງໃໝ່ ແລະ ຫຼັກອັງແຕນແມ່ນໄດ້ກໍ່ສ້າງສຳເລັດແລ້ວ ລໍຖ້າແຕ່ປັບປຸງລະບົບເຕັກນິກເທົ່ານັ້ນ; ສະເພາະສະຖານີວິທະຍຸກະຈາຍສຽງແຂວງຈຳປາສັກ ແມ່ນໄດ້ກະຈາຍສຽງໃນຄື້ນ 100.7 ແລະ 104.7 MKH ອອກອາກາດ 13 ຊົ່ວໂມງເຄີ່ງຕໍ່ວັນ ກຳລັງແຮງສົ່ງກວມພື້ນທີ່ 70% ໃນທົ່ວແຂວງ, ພ້ອມນີ້ ຍັງມີໂທລະພາບດີຈິຕ້ອນ 2 ແຫ່ງ, ອານາຣອກ 1 ແຫ່ງ, ມີໜັງສືພິມລາຍສັບປະດາ 1 ແຫ່ງຄື ໜັງສືພິມຈຳປາໃໝ່. ນອກຈາກນີ້, ພະແນກຖວທ ແຂວງຍັງມີຜົນງານດ້ານວັດທະນະທຳ, ທ່ອງທ່ຽວ ແລະ ອື່ນໆອີກຢ່າງຫຼວງຫຼາຍເຊັ່ນດຽວກັນ.

ໃນພິທີ, ທ່ານ ບົວທອງ ສຸວັນນະສານ, ຫົວໜ້າພະແນກ ຖວທ ແຂວງຈຳປາສັກ ຜູ້ເກົ່າຍັງໄດ້ເຊັນມອບໜ້າທີ່ຫົວໜ້າພະແນກ ຖວທ ໃຫ້ທ່ານ ໂສມ ບຸດຕະກຸນ ເປັນຜູ້ຮັບໜ້າທີ່ຕໍ່ໄປຢ່າງເປັນທາງການ. ໃນໂອກາດນີ້, ທ່ານ ນິພອນ ວຽງປະເສີດ, ຮອງເລຂາອົງຄະນະພັກແຂວງ ແລະ ຫົວໜ້າຄະນະຈັດຕັ້ງແຂວງຈຳປາສັກ ຍັງໄດ້ໂອ້ລົມຕໍ່ຜູ້ເຂົ້າຮ່ວມພິທີ, ໂດຍທ່ານໄດ້ເນັ້ນໃຫ້ຫົວໜ້າພະແນກ ຖວທ ຜູ້ໃໝ່ ແລະ ຜູ້ເກົ່າທີ່ໄປຮັບໜ້າທີ່ໃໝ່ ຈົ່ງສືບຕໍ່ເສີມຂະຫຍາຍມູນເຊື້ອຜົນງານຂອງຕົນໃຫ້ຫຼາຍຂຶ້ນ ເພື່ອຍາດຜົນສຳເລັດໃໝ່ໃຫຍ່ຫຼວງກວ່າເກົ່າ. ສໍາລັບທ່ານ ບົວທອງ ສຸວັນນະສານ, ກຳມະການອົງຄະນະພັກແຂວງ, ຫົວໜ້າພະແນກ ຖວທ ຜູ້ເກົ່າ ແມ່ນຈະໄປຮັບໜ້າທີ່ໃໝ່ເປັນຫົວໜ້າໂຮງຮຽນການເມືອງ-ການປົກຄອງແຂວງຈໍາປາສັກຕໍ່ໄປ.

ຂໍຂອບໃຈຂ່າວ: ປະພິດ ສີສົມບູນ

LEAVE A REPLY

Please enter your comment!
Please enter your name here