ສຳນັກຂ່າວ ຢູໂຣບນິວ ລາຍງານວ່າ ສຳນັກງານປ້ອງກັນພົນລະເຮືອນຂອງປະເທດອິຕາລີ ເປີດເຜີຍວ່າເມື່ອມື້ພະຫັດ ທີ່ 5 ມີນາ 2020 ທີ່ຜ່ານມາພົບຜູ້ເສຍຊີວິດຈາກການຕິດເຊື້ອໂຄວິດ-19 ໃນປະເທດເພີ່ມຂຶ້ນອີກ 41 ຄົນໃນຊ່ວງ 24 ຊັ່ວໂມງທີ່ຜ່ານມາເຮັດໃຫ້ຈຳນວນຜູ້ຕິດເຊື້ອລ່າສຸດຢູ່ທີ່ 148 ຄົນແລ້ວ
ທ່ານ ແອງເຈໂລ ບໍເຣນລີ ຫົວໜ້າສຳນັກງານປ້ອງກັນພົນລະເຮືອນອິຕາລີກ່າວວ່າ ຜູ້ເສຍຊີວິດທີ່ພົບໃໝ່ຢູ່ໃນອາຍຸລະຫວ່າງ 66 – 99 ປີ ສ່ວນໃຫຍ່ມີສະພາບຮ່າງກາຍອ່ອນແອ ແລະມີບັນຫາດ້ານສຸກຂະພາບ ຂະນະດຽວກັນຍອດຜູ້ຕິດເຊື້ອສະສົມໃນປະເທດກໍເພີ່ມຂຶ້ນເປັນ 3,858 ຄົນແລ້ວ ໂດຍ 1,790 ຄົນໃນຈຳນວນນີ້ກຳລັງຖືຮັກສາທີ່ໂຮງໝໍ ແລະ 351 ຄົນຢູ່ໃນຫ້ອງໄອຊີຢູ
ຜູ້ເສຍຊີວິດສ່ວນໃຫຍ່ຍັງຄົງຢູ່ໃນພາກເໜືອຂອງປະເທດ ໂດຍມີຜູ້ເສຍຊີວິດເຖິງ 98 ຄົນ ແລະ ຜູ້ປ່ວຍອີກ 2,251 ຄົນຢູ່ໃນ Lombardy ໃນຂະນະທີ່ໃນ Emilia-Romagna ມີຜູ້ເສຍຊີວິດແລ້ວ 30 ຄົນ ແລະ ຕິດເຊື້ອອີກ 698 ຄົນ
ລັດຖະບານອິຕາລີພະຍາຍາມໃຊ້ມາດຕະການຕ່າງໆ ເພື່ອຮັບມືກັບການລະບາດຂອງເຊື້ອ ໂດຍລ່າສຸດໃນມື້ພະຫັດ ພວກເຂົາໄດ້ຮຽກຮ້ອງໃຫ້ປະຊາຊົນຢູ່ຫ່າງຈາກກັນ ແລະ ກັນຢ່າງນ້ອຍ 1 ແມັດ, ຈຳກັດການເຂົ້າບ້ານພັກຄົນຊະລາ ແລະ ຜູ້ປ່ວຍ ແລະ ຮຽກຮ້ອງໃຫ້ຜູ້ສູງໄວຢ່າອອກນອກອາຄານໂດຍບໍ່ຈຳເປັນ
ໃນພື້ນທີ່ອື່ນໆ ໃນຢູໂຣບ ສະຖານນະການການລະບາດກໍຍັງບໍ່ມີທ່າທີສະຫງົບລົງ ໂດຍລາສະອານາຈັກລາຍງານການພົບຜູ້ເສຍຊີວິດເພຣາະໄວຣັສມໍລະນະຕົວນີ້ເປັນຄົນທໍາອິດຂອງປະເທດແລ້ວ ເປັນຊາຍຊະລາທີ່ມີບັນຫາສຸກຂະພາບຊຶ່ງເຂົ້າໂຮງໝໍມື້ຄືນວັນພຸດທີ່ຜ່ານມາ ຂະນະທີ່ຜູ້ຕິດເຊື້ອທົ່ວປະເທດລ່າສຸດຢູ່ທີ່ 116 ຄົນ
