ລັດຖະມົນຕີກະຊວງສາທາລະນະສຸກ ຮຽກຮ້ອງໃຫ້ທຸກຄົນໃນສັງຄົມບໍລິໂພກຂໍ້ມູນຂ່າວສານຜ່ານທາງສື່ສັງຄົມອອນລາຍຢ່າງມີສະຕິ ໂດຍສະເພາະຂໍ້ມູນຂ່າວສານກ່ຽວກັບຊ່ອງທາງ ການຕິດເຊື້ອ ພະຍາດໂຄວິດ-19 ເນື່ອງຈາກວ່າ ເມື່ອບໍ່ດົນມານີ້ ມີສື່ສັງຄົມອອນລາຍອອກຂ່າວຜ່ານທາງເຟກສບຸກວ່າ: ພະຍາດໂຄວິດ-19 ແມ່ນສາມາດຢູ່ນຳ ທະນາບັດໄດ້ເຖີງ 9 ວັນ, ເຊີ່ງສ້າງຄວາມວິຕົກກັງວົນໃນການດຳລົງຊີວິດຂອງຄົນໃນສັງຄົມຫລາຍສົມຄວນ.
ທ່ານຮອງສາດສະດາຈານ ດ໋ອກເຕີ. ບຸນກອງ ສີຫາວົງ, ລັດຖະມົນຕີ ກະຊວງສາ ທາລະນະສຸກໃຫ້ສຳພາດວ່າ: ຕໍ່ກັບເຫດການທີ່ເກີດຂື້ນ, ເຈົ້າຫນ້າທີ່ກ່ຽວຂ້ອງຂອງລາວ ໄດ້ປະສານສົມທົບກັບຜູ້ຊ່ຽວຊານດ້ານນີ້ໂດຍສະເພາະ ແລະ ໄດ້ຮັບການຢັ້ງຢືນວ່າ ພະຍາດໂຄວິດ-19 ຍັງບໍ່ຖືກຮັບການຮັບຮອງຢ່າງເປັນທາງການວ່າ ສາມາດຢູ່ນຳທະນາບັດໄດ້ເຖີງ 9 ວັນ ເພາະພະຍາດນີ້ຖ້າບໍ່ໄດ້ຢູ່ຮ່າງກາຍຂອງຄົນ ຫລື ສັດ ຈະສະຫລາຍໂຕ ຫລື ຕາຍ ໃນເວລາພຽງ 20 ນາທີ ເທົ່ານັ້ນ; ດັ່ງນັ້ນ ຈຶ່ງເປັນໄປບໍ່ໄດ້ທີ່ພະຍາດໂຄວິດ-19 ຈະສາມາດຝັງເຊື້ອຢູ່ໃນທະນາບັດເປັນໄລຍະເວລາ 9 ວັນ, ແຕ່ຖ້າຫາກພະຍາດນີ້ຈະສາມາດຕິດຕໍ່ຜ່ານ ທາງທະນາບັດໄດ້ ກໍ່ຕໍ່ເມື່ອຄົນທີ່ເປັນພະຍາດ ໂຄວິດ-19 ຈັບບາຍທະນາບັດ ແລ້ວສົ່ງຕໍ່ໃຫ້ອີກບຸກຄົນໜຶ່ງໂດຍກົງເທົ່ານັ້ນຈື່ງສາມາດຕິດໄດ້.
ທ່ານລັດຖະມົນຕີກະຊວງສາທາລະນະສຸກ ໃຫ້ສຳພາດຕື່ມວ່າ: ໃນໄລຍະຜ່ານມາ, ໄດ້ມີສື່ສັງຄົມອອນລາຍພະຍາຍາມສ້າງກະແສປັ່ນປວນຫລາຍຄັ້ງກ່ຽວກັບຂ່າວລືວ່າ ຢູ່ລາວມີຄົນເປັນພະຍາດໂຄວິດ-19 ແລ້ວ ເປັນຕົ້ນ: ກໍລະນີພົບຜູ້ຕິດເຊື້ອພະຍາດໂຄວີດ-19 ຢູ່ໂຮງຫມໍມິດຕະພາບ, ແຂວງຜົ້ງສາລີ ລວມເຖີງຢູ່ ແຂວງສະຫວັນນະເຂດ, ຫລ້າສຸດແມ່ນເຫດການຢູ່ຕະຫລາດຊັງຈຽງ, ນະຄອນຫວງວຽງຈັນ ລວມເຖີງເຫດການອື່ນໆ ເຮັດໃຫ້ສັງຄົມເກີດຄວາມບໍ່ສະຫງົບ ແລະ ເກີດມີຫາງສຽງວິພາກວິຈານໄປທາງລົບຕໍ່ການປະຕິບັດຫນ້າທີ່ຂອງເຈົ້າຫນ້າທີ່ທີ່ກ່ຽວຂ້ອງຂອງລາວທີ່ກຳລັງປະຕິບັດຫນ້າທີ່ປ້ອງກັນ ແລະ ສະກັດກັ້ນການແຜ່ລະບາດຂອງພະຍາດນີ້ຢ່າງແຂງແຮງ ຮຽກຮ້ອງໃຫ້ທຸກຄົນໃນສັງຄົມເຊື່ອຫມັ້ນ ຕໍ່ການປະຕິບັດຫນ້າທີ່ຂອງລາວ ເພາະທຸກໆການຈັດຕັ້ງປະຕິບັດໜ້າທີ່ວຽກງານໃນການປ້ອງກັນ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ແມ່ນປະຕິບັດຕາມມາດຕະຖານດຽວກັນກັບສາກົນທຸກຂັ້ນຕອນ
ພ້ອມທັງເນັ້ນຫນັກໃຫ້ທຸກຄົນໃນສັງຄົມຫລີກລ່ຽງການເດີນທາງໄປເຂດທີ່ມີການລະບາດ ຂອງເຊື້ອພະຍາດ ແລະ ຊຸມຊົນແອອັດ, ຄວນໃສ່ຜ້າອັດປາກ, ຫລີກລ່ຽງການສຳຜັດຄົນທີ່ເປັນໄຂ້, ເປັນໄອ, ເຈັບຄໍ, ຫາຍໃຈຍາກ, ຫລີກລ່ຽງການສຳຜັດເປັນ ຫລື ຕາຍ ໂດຍສະເພາະສັດປ່າທຸກຊະນິດ, ຖ້າມີອາການເປັນໄຂ້, ເປັນໄອ ແລະ ຮູ້ ສຶກບໍ່ສະບາຍຄວນໄປພົບແພດໝໍ, ແລະ ໂດຍດ່ວນ ແລະ ຖ້າພົບເຫັນມີກໍລະນີສົງໃສວ່າບຸກຄົນໃດມີອາການຄ້າຍຄືເປັນພະຍາດດັ່ງກ່າວໃຫ້ໂທຫາສາຍດ່ວນໝາຍເລກ 166 ຫລື ໂທລະສັບໝາຍເລກ 020 54066777 ຕະຫລອດ 24 ຊົ່ວໂມງ.
ຂ່າວ: ເດດອາລຸນ ແກ້ວວິໄລວົງ
