ຊາອຸ ເພສ ເອເຈນຊີ ສື່ທາງການຂອງຊາອຸດີອາຣະເບຍ ລາຍງານວ່າ ກະຊວງສາທາລະນະສຸກແຫ່ງຊາດຂອງຊາອຸ ປະກາດໃນມື້ຈັນທີ່ 2 ມີນາ 2020 ວ່າຜົນກວດຈາກຫ້ອງທົດລອງຢືນຢັນການພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ ຫລື ໂຄວິດ-19 ຄົນທໍາອິດຂອງປະເທດ ໂດຍເປັນພົນລະເມືອງຊາຍທີ່ເດີນທາງກັບມາຈາກອີຣ່ານ ຜ່ານລາຊາອານາຈັກບາເຣນ
ກະຊວງສາທາລະນະສຸກຢືນຢັນດ້ວຍວ່າ ຜູ້ຕິດເຊື້ອຄົນນີ້ບໍ່ຍອມເປີດເຜີຍຕອນເດີນທາງມາເຖິງຊາອຸ ວ່າໄປອິີຣ່ານມາດ້ວຍ ອີຣ່ານເປັນປະເທດທີ່ໄວຣັສໂຄວິດ-19 ແພ່ລະບາດໜັກທີ່ສຸດໃນຕະເວັນອອກກາງ ແລະ ມີຜູ້ເສຍຊີວິດແລ້ວເຖີງ 66 ຄົນ ຫລາຍທີ່ສຸດຮອງຈາກປະເທດຈີນຊຶ່ງເປັນຈຸດກຳເນີດເຊື້ອ
“ພາຍໃຕ້ກອບມາດຕະການປ້ອງກັນໄວ້ກ່ອນທີ່ກຳລັງດຳເນີນຢູ່ທາງກະຊວງໄດ້ສົ່ງທີມຄວບຄຸມການຕິດເຊື້ອໄປກວດສອບພົນລະເມືອງຄົນນີ້ທັນທີ ແລະ ເກັບຕົວຢ່າງສົ່ງໄປຢັງຫ້ອງທົດລອງ ຊຶ່ງຕົວຢ່າງຢືນຢັນວ່າ ຊາຍຄົນນີ້ຕິດເຊື້ອໄວຣັສດັ່ງກ່າວ” ກະຊວງສາທາລະນະສຸກຊາອຸ ຢ່າງໃດກໍຕາມ ກະຊວງສາທາລະນະສຸກພະຍາຍາມສ້າງຄວາມຫມັ້ນໃຈກັບປະຊາຊົນບໍ່ໃຫ້ກັງວົນເລື່ອງການແພ່ກະຈາຍຂອງເຊື້ອ ໂດຍລະບຸວ່າຜູ້ຕິດເຊື້ອຄົນນີ້ຖືກແຢກດ່ຽວທີ່ໂຮງໝໍແລ້ວທັງໝົດທັງຫາຕົວຜູ້ຕິດຕໍ່ກັບຊາຍຄົນນີ້ໄດ້ທັງໝົດແລ້ວ ຊຶ່ງມີການເກັບຕົວຢ່າງຈາກຄົນເຫຼົ່ານີ້ໄປກວດສອບທີ່ສູນຄວບຄຸມແລະປ້ອງກັນພະຍາດແຫ່ງຊາດແລ້ວ.
