ທ່ານ ປອ. ບຸນຈັນ ສິນທະວົງ ລັດຖະມົນຕີກະຊວງ ໂຍ​ທາ​ທິ​ການ ແລະ ຂົ​ນ​ສົ່ງ, ພ້ອມດ້ວຍຄະນະ, ໄດ້ເຂົ້າຮ່ວມກອງປະຊຸມປະຈຳປີ ຄັ້ງທີ 82 ຂອງຄະນະກຳມາທິການຂົນສົ່ງທາງບົກ (Inland Transport Committee “ITC”) ອົງການສະຫະປະຊາຊາດປະຈໍາ ເອີຣົບ (UNECE) ທີ່ເຊີແນວ, ປະເທດສະວິດ, ໃນລະຫວ່າງວັນທີ 23-29 ກຸມພາ 2020.

ກອງປະຊຸມປະຈຳປີ ຄັ້ງທີ 82 ຂອງຄະນະກຳມາທິການຂົນສົ່ງທາງບົກ (Inland Transport Committee “ITC”) ອົງການສະຫະປະຊາຊາດ (ສປຊ) ປະຈຳເອີຣົບ (UNECE) ທີ່ເຊີແນວ ປະເທດສະວິດ. ກອງ​ປະ​ຊຸມໄດ້ແບ່ງອອກເປັນ 3 ພາກຄື:

Featured Your Business Here

ພາກທີ 1: ສໍາມະນາຍ່ອຍ 2 ຫົວຂໍ້ຄື: ພາຫະນະມືສອງ “ນໍາໃຊ້ແລ້ວ” ແລະ ຄວາມປອດໄພທາງຫຼວງ, ພາກທີ 2: ກອງປະຊຸມລະດັບລັດຖະມົນຕີ ຂອງຄະນະກໍາມະທິການຂົນສົ່ງທາງບົກພາຍໃຕ້ຫົວຂໍ້ “ຄວາມທ້າທ້າຍດ້ານສິ່ງແວດລ້ອມ ຂອງການຂົນສົ່ງແບບຢືນຍົງ”.

ພາກທີ 3: ກອງປະຊຸມສາມມັນປະຈໍາປີ.

ກອງປະຊຸມຄັ້ງນີ້​ຍັງໄດ້ພິຈາລະນາ ຮັບຮອງເອົາຖະແຫລງການທີ່ມີຊື່ວ່າ: “ເພີ່ມທະວີທາງເລືອກໃນການຂົນສົ່ງແບບຍືນຍົງ ເພື່ອຮັບມືກັບສິ່ງທ້າທາຍດ້ານ ສະພາບດິນຟ້າອາກາດ ແລະ ສິ່ງແວດລ້ອມໂລກ ໂດຍການຮ່ວມມືກັນຈັດຕັ້ງປະຕິບັດ” (Enhancing Sustainable Inland Transport Solutions to Global Climate and Environmental Challenges –A United Call to Action-); ອົງການ UNECE ໄດ້ແຈ້ງຂ່າວໃຫ້ ສປປ ລາວ ຊາບວ່າ: “ພາຍຫລັງທີ່ຄະນະຜູ້ແທນ ກະຊວງ ຍທຂ ໄດ້ພົບປະກັບທ່ານ ນາງ  Olga Algayerova ເລຂາທິການໃຫຍ່ UNECE ແລະ ທ່ານ Jean Todt ທູດພິເສດ  UN ດ້ານຄວາມປອດໄພທາງຫລວງ ໃນກອງປະຊຸມປີ 2019, ໃນນີ້ ກະຊວງ ຍທຂ ໄດ້ສົ່ງບົດສະເໜີ 3 ໂຄງການ ເພື່ອຂໍທຶນຊ່ວຍເຫລືອລ້າຈາກກອງທຶນຄວາມປອດໄພ ອົງການ ສປຊ (United Nations Road Safety Fund “UNRSF”). ຜ່ານການພິຈາລະນາ ຂອງ UNRSF ໄດ້ເຫັນດີໃຫ້ທຶນຊ່ວຍເຫລືອລ້າ 1 ໂຄງການ ມູນຄ່າ 570,000 USD ເພື່ອປັບປຸງລະບົບການຄຸ້ມຄອງການຂັບຂີ່ ຢູ່ ສປປ ລາວ, ຊຶ່ງເປັນໂຄງການທີ່ໄດ້ຄະແນນອັນດັບ 1​ ຂອງໂລກ ໃນ 10 ໂຄງການ ແລະ ຈະສືບຕໍ່ພິຈາລະນາໃຫ້ການຊ່ວຍເຫລືອຕື່ມ 2 ໂຄງການທີ່ຍັງເຫລືອ”.

ສປປ ລາວ ໄດ້ຂຶ້ນປະກອບຄຳເຫັນຕໍ່ກອງປະຊຸມຢູ່ໃນວາລະທີ 3: ການຮ່ວມມືສາກົນ ເພື່ອຊອກຫາວິທີການແກ້ໄຂ ບັນຫາສິ່ງແວດລ້ອມ ແລະ ບົດບາດຂອງກຳມາທິການຂົນສົ່ງທາງບົກ ໃນລະດັບເວທີຂອງ ອົງການ ສປຊ (Session III: International cooperation for climate and environment solutions and the role of the ITC as the United Nations Platform for Inland Transport) ໂດຍການສະເໜີຮ່າງຍຸດທະສາດການເຕີບໂຕສີຂຽວ ຂອງ ສປປ ລາວ ໂດຍລວມ ຊຶ່ງສະຖາບັນ ເຕີບໂຕສີຂຽວສາກົນ (Global Green Growth Institute “GGGI”) ໃຫ້ການຊ່ວຍເຫລືອ, ໄດ້ລົງເລິກບັນຫາທີ່ພົວພັນກັບຂະແໜງ ຄົມມະນາຄົມ-ຂົນສົ່ງ ທີ່ກະຊວງ ຍທຂ ໄດ້ວາງວິໄສທັດ 2030 ແລະ ແຜນການ 5 ປີ ມີບັນດາໜ້າວຽກຕົ້ນຕໍດັ່ງນີ້: ສ້າງໂຄງລ່າງພື້ນຖານທີ່ທົນທານຕໍ່ສິ່ງແວດລ້ອມ; ຫລຸດຜ່ອນຜົນກະທົບຕໍ່ສັງຄົມ-ສິ່ງແວດລ້ອມທຳມະຊາດ ທີ່ເກີດຈາກການກໍ່ສ້າງ, ຫລຸດຜ່ອນ ມົນລະພິດ ແລະ ອາຍພິດເຮືອນແກ້ວ ຈາກການສົ່ງເສີມການໃຫ້ນຳໃຊ້ການຂົນສົ່ງສາທາລະນະໃນຕົວເມືອງ ແລະ ການນຳໃຊ້ຍານພາຫະນະໂດຍນຳໃຊ້ພະລັງງານສະອາດ ເຊັ່ນ: ລົດໄຟຟ້າ; ຫລຸດຜ່ອນການຈະລາຈອນແອອັດ; ສົ່ງເສີມການທ່ອງທ່ຽວ ແລະ ການຂົນສົ່ງສະອາດ ເຂົ້າໃນການທ່ອງທ່ຽວ ແລະ ສ້າງພື້ນຖານໂຄງລ່າງ ທີ່ ປອດໄພ ແລະ ສະດວກສະບາຍ ໃຫ້ສັງຄົມ. ຮັບຮອງເອົາຖະແຫລງການ ”ເພີ່ມທະວີທາງເລືອກໃນການຂົນສົ່ງແບບຍືນຍົງເພື່ອຮັບມືກັບສິ່ງທ້າທາຍດ້ານດິນຟ້າອາກາດ ແລະ ສິ່ງແວດລ້ອມໂລກ ໂດຍການຮ່ວມມືກັນຈັດຕັ້ງປະຕິບັດ”.

ໃນການພົບປະ 2 ຝ່າຍໄດ້ຮັບໝາກຜົນອັນດີງາມດັ່ງນີ້: ທ່ານ ລັດ​ຖະ​ມົນ​ຕີກະ​ຊວງ ​ຍ​ທ​ຂ ພ້ອມ​ຄະ​ນະ​​ ເຂົ້າພົບປະກັບທ່ານ Jean Todt ທູດພິເສດສຳລັບຄວາມປອດໄພທາງຫລວງ ຂອງເລຂາທິການໃຫຍ່ອົງການ ສປຊ ຄັ້ງວັນທີ 26/2/2020: ໃນການພົບປະສອງຝ່າຍ ສປປ ລາວ ໄດ້ສະແດງຄວາມຂອບໃຈສຳລັບການສະໜັບສະໜູນ ແລະ ໃຫ້ທຶນຊ່ວຍເຫລືອລ້າ ເພື່ອປັບປຸງວຽກງານ ຄວາມປອດໄພທາງຫລວງ ແລະ ສະເໜີໃຫ້ສືບຕໍ່ຊ່ວຍເຫລືອ ສປປ ລາວ ຕໍ່ໄປ. ທ່ານ Jean Todt ຊຸກຍູ້ໃຫ້ ສປປ ລາວ ເຂົ້າເປັນພາຄີສົນທິສັນຍາ ສປຊ ວ່າດ້ວຍຄວາມປອດໄພທາງຫລວງ (UN Road Safety Convention) ອີກດ້ວຍ.

LEAVE A REPLY

Please enter your comment!
Please enter your name here