ສະຖານີໂທລະທັດຊີຊີທີວີ (CCTV) ຂອງທາງການຈີນລາຍງານມື້ນີ້ວ່າ ເມືອງອູ່ຮັ່ນປິດໂຮງໝໍຊົ່ວຄາວແຫ່ງທໍາອິດຫຼັງຈາກອະນຸຍາດໃຫ້ຜູ້ປ່ວຍທີ່ຫາຍດີແລ້ວຊຸດສຸດທ້າຍຈຳນວນ 34 ຄົນ ກັບບ້ານ ໂຮງໝໍຊົ່ວຄາວທີ່ເລັ່ງສ້າງຂຶ້ນທັງໝົດ 16 ແຫ່ງ ຊ່ວຍໃຫ້ເມືອງມີຕຽງຮອງຮັບຜູ້ປ່ວຍເພີ່ມຂຶ້ນຈາກ 5,000 ຕຽງເປັນ 23,000 ຕຽງ ຖືຮັກສາໄປແລ້ວ 12,000 ຄົນ ມົນຖົນຫູເປີຍທີ່ເປັນສູນກາງການລະບາດແຈ້ງພົບຜູ້ປ່ວຍ ໃໝ່ບໍ່ເຖິງ 200 ຄົນເປັນເທື່ອທໍາອິດນັບຕັ້ງແຕ່ເດືອນມັງກອນ ໂດຍພົບ 196 ຄົນເມື່ອມື້ອາທິດ ລຸດລົງ ຫລາຍ ຈາກມື້ວັນເສົາທີ່ພົບ 570 ຄົນ ໃນຈຳນວນນີ້ 193 ຄົນແມ່ນຄົນທີ່ອາໄສຢູ່ໃນເມືອງອູ່ຮັ່ນ 193 ຄົນ ນ້ອຍທີ່ສຸດນັບຕັ້ງແຕ່ວັນທີ 26 ມັງກອນ ຂະນະທີ່ຜູ້ປ່ວຍໃໝ່ທັງຈີນແຜ່ນດິນໃຫຍ່ມີ 202 ຄົນ ນ້ອຍທີ່ສຸດນັບຕັ້ງແຕ່ວັນທີ 22 ມັງກອນ ສ່ວນຍອດຜູ້ເສຍຊີວິດຈົນເຖິງຂະນະນີ້ຢູ່ 2,912 ຄົນ ເພີ່ມຂຶ້ນ 42 ຄົນ ທັງໝົດຢູ່ໃນຫູເປີຍ ໃນຈຳນວນນີ້ 32 ຄົນຢູ່ໃນອູ່ຮັ່ນ
ຢ່າງໃດກໍດີ ປະທານາທິບໍດີ ສີ ຈິ້ນຜິງຂອງຈີນເຕືອນເມື່ອມື້ວັນອາທິດທີ່ຜ່ານມາວ່າ ຈີນຢັງຕ້ອງເຝົ້າລະວັງການລະບາດໃນໄລຍະຍາວ ຊ່ອງຫວ່າງທາງກົດໝາຍ ແລະ ກົນໄກການຮັບມືເຫດສຸກເສີນ ເນື່ອງຈາກພົບຜູ້ປ່ວຍໃໝ່ຊາວຈີນສອງຄົົນທີ່ຫາກໍ່ເດີນທາງກັບມາຈາກອີຣ່ານ ປະເທດທີ່ມີຜູ້ປ່ວຍເພີ່ມຂຶ້ນຢ່າງວ່ອງໄວ ໜັງສືພິມ GlobalTimes ລາຍງານມື້ນີ້ວ່າ ພົບຜູ້ປ່ວຍໜຶ່ງຄົນໃນມົນຖົນເຈີ້ຈຽງ ທາງຕະເວັນອອກ ເປັນຜູ້ເດີນທາງມາຈາກອິຕາລີ ຊຶ່ງມີຜູ້ປ່ວຍເພີ່ມຂຶ້ນຢ່າງວ່ອງໄວເຊັ່ນກັນ.
