ສຳນັກຂ່າວ CNN ລາຍງານວ່າລັດຖະບານມົນຖົນຢູນນານຂອງຈີນ ອອກຖະແຫຼ່ງໃນມື້ອາທິດທີ່ 1 ມີນາ 2020 ວ່າຊາຍຊາວຈີນຄົນໜຶ່ງຖືກສານຕັດສິນລົງໂທດປະຫານຊີວິດ ຈາກຄວາມຜິດຖານຄາດຕະກຳເຈົ້າໜ້າທີ່ສູນຄວບຄຸມພະຍາດ 2 ນາຍທີ່ດ່ານກວດໄວຣັສໂຄໂຣນາໃນຖະໜົນສາຍໜຶ່ງ
ຂ່າວລະບຸວ່າ ຊາຍຄົນນີ້ຂັບລົດຕູ້ຄັນນ້ອຍໄປເຖິງດ່ານກວດດັ່ງກ່າວ ແລະ ບໍ່ຍອມປະຕິບັດຕາມຂັ້ນຕອນທີ່ເຈົ້າຫນ້າທີ່ແນະນຳ ຈາກນັ້ນຜູ້ໂດຍສານອີກຄົນກໍລົງຈາກລົດ ແລະ ພະຍາຍາມເຄື່ອນຢ້າຍເຄື່ອງກີດຂວາງຖະໜົນ ເຖິງແມ່ນວ່າເຈົ້າຫນ້າທີ່ຈະພະຍາຍາມເຕືອນພວກເຂົາແລ້ວກໍຕາມ
ເຈົ້າຫນ້າທີ່ທ່ານໜຶ່ງຈຶ່ງເລີ່ມບັນທຶກເຫດການທີ່ເກິດຂື້ນເພື່ອເປັນຫຼັກຖານ ເຮັດໃຫ້ຄົນຂັບລົດຕູ້ບໍ່ພໍໃຈຢ່າງຫຼາຍ ກ່ອນຈະຈັບມີດພົກອອກມາແທງເຈົ້າຫນ້າທີ່ທ່ານນັ້ນເຂົ້າທີ່ໜ້າເອິກ ແລະທ້ອງ ຈາກນັ້ນຈຶ່ງແທງເຈົ້າຫນ້າທີ່ອີກທ່ານເປັນພະຍາຍາມເຂົ້າມາຫ້າມ ເຮັດໃຫ້ທັງຄູ່ເສຍຊີວິດ
ຫຼັງຈາກນັ້ນຊາຍຜູ້ກໍ່ເຫດກໍ່ເດີນທາງເຂົ້າມາມອບຕົວ ແຕ່ສານຕັດສິນໃຈບໍ່ລຸດຜ່ອນໂທດໃຫ້ເຂົາ “ເຖິງວ່າຈຳເລຍຈະຍອມມອບຕົວ ແລະ ໃຫ້ການຮັບສາລະພາບຄວາມຜິດທັງໝົດ ແຕ່ທ່ານໃຊ້ວິທີທີ່ໂຫດຮ້າຍຮຸນແຮງໃນການຄາດກຳເຈົ້າຫນ້າທີ່ 2 ນາຍ ຈາກສູນຄວບຄຸມ ແລະ ປ້ອງກັນໂຣລະບາດ ໃນຊ່ວງທີ່ກຳລັງເກີດໂຣລະບາດ ຊຶ່ງຜົນທີ່ຕາມມານັ້ນຮ້າຍແຮງຢ່າງຢິ່ງ” ຖະແຫຼ່ງການລັດຖະບານມົນຖົນຢູນນານລະບຸ
“ດັ່ງນັ້ນ ສານຈຶ່ງຕັດສິນໃຈບໍ່ລຸດຜ່ອນໂທດ ແລະ ມີຄຳພິພາກສາຕາມທີ່ກົດຫມາຍກຳນົດ” ຖະແຫຼ່ງການລະບຸ ຂະນະທີ່ຜູ້ໂດຍສານອີກຄົນກຳລັງຖືກສອບສວນໃນຄວາມຜິດອື່ນ.
