ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໄດ້ເປີດຮັບໂຄງການວິຊາການ ປີ 2020 ເພື່ອຊ່ວຍເຫຼືອວິສາຫະກິດຂະໜາດນ້ອຍ ແລະ ກາງ (ວນກ) ໃນ ສ ປປ ລາວ.
ຈຸດປະສົງເພື່ອເປັນການສະໜັບສະໜູນທຶນຮອນໃຫ້ແກ່ໜ່ວຍງານພາກລັດ ແລະ ພາກເອກະຊົນໃນການຈັດຕັ້ງປະຕິບັດວຽກງານສົ່ງເສີມ ວນກ ທັງຢູ່ຂັ້ນສູນກາງ ແລະ ທ້ອງຖິ່ນ ຊຶ່ງກຸ່ມເປົ້າໝາຍທີ່ຈະໄດ້ຮັບການຊຸກຍູ້, ສົ່ງເສີມ ຕ້ອງເປັນ ວນກ ທີ່ຂຶ້ນທະບຽນຖືກຕ້ອງຕາມກົດໝາຍ, ຄົນສັນຊາດລາວເປັນເຈົ້າຂອງ, ເປັນສະມາຊິກສະພາການຄ້າ ແລະ ອຸດສາຫະກຳ ຫຼື ສະມາຄົມ ຫຼື ກຸ່ມທຸລະກິດໃນຂະແໜງການວິຊາຊີບໃດໜຶ່ງ.
ທຶນທີ່ຈະໄດ້ຮັບຕ້ອງຈັດຕັ້ງປະຕິບັດກິດຈະກຳຕ່າງໆເຊັ່ນ: ການຝຶກອົບຮົມ; ການສໍາມະນາດ້ານວິຊາການ; ການວາງສະແດງ; ການຈັດຈ້າງຜູ້ຊ່ຽວຊານດ້ານຕ່າງໆ; ການປັບປຸງ ຫຼື ຍົກລະດັບເຕັກໂນໂລຊີ, ການພັດທະນາຜະລິດຕະພັນ ແລະ ການຫຸ້ມຫໍ່; ການປັບປຸງມາດຖານຄຸນນະພາບ; ການທັດສະນະສຶກສາແລກປ່ຽນບົດຮຽນ ຂອງຜູ້ປະກອບກິດຈະການ ແລະ ການປັບປຸງທຸລະກິດດ້ານອື່ນໆ.
ການເປີດຮັບໂຄງການຈະເປັນ 03 ຄັ້ງຄື: ຄັ້ງທີ 01 ໃນລະຫວ່າງວັນທີ 25 ກຸມພາ ຫາວັນທີ 31 ມີນາ 2020; ຄັ້ງທີ 02 ວັນທີ 01 – 30 ມິຖຸນາ 2020; ຄັ້ງທີ 03 ວັນທີ 01-30 ກັນຍາ 2020.
ລາຍລະອຽດເພິ່ມເຕີມ: ສາມາດພົວພັນໄດ້ທີ່ ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ເບີໂທລະສັບ 021 414 064 ຕໍ່ 306 ຫຼື 021 410 005 /020 5433 2004 ສາມາດດາວໂຫຼດແບບຟອມໄດ້ທີ່ເວັບໄຊ www.dosmep.org
