ມາຮອດເວລາ 24 ໂມງ ວັນທີ 25 ກຸມພາ 2020, 31ແຂວງໃນທົ່ວປະເທດຈີນ ນອກຈາກແຂວງຫູເປີຍມີຜູ້ຕິດເຊື້ອໄວຣັສໂຄວິດ19 ແລ້ວ 78.064 ກໍລະນີ ປິ່ນປົວດີ 29.745ກໍລະນີ ແລະ ເສຍຊີວິດແລ້ວ 2.715 ກໍລະນີ ປະຈຸບັນໄດ້ມີບັນຫາໃໝ່ທີ່ເກີດຂື້ນ ແລະ ເລັ່ງທວງໃຫ້ເອົາໃຈໃສ່ເຝົ້າລະວັງຄື: ຢູ່ເມືອງ ແດກູສ.ເກົາຫຼີ ມີກໍລະນີຕິດເຊື້ອໂຄວິດ 19 ເພີ່ມຂື້ນຢ່າງວ່ອງໄວ ແລະ ແຜ່ລາມເປັນບໍລິເວນກວ້າງ .
ອິງຕາມຂໍ້ມູນທີ່ໄດ້ຮັບຫຼ້າສຸດແຈ້ງໃຫ້ຮູ້ວ່າ ມີຜູ້ຕິດເຊື້ອພະຍາດແລ້ວ 977 ກໍລະນີ,ໃນນີ້ເສຍຊີວິດແລ້ວ 10 ກໍລະນີ ນອກນີ້ພະຍາດໂຄວິດ 19 ຍັງແຜ່ລາມໄປເຖິງປະເທດຕ່າງໆໃນໂລກ ກວມເອົາ 37 ປະເທດ.
ຮອງສາດສະດາຈານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກໃຫ້ຮູ້ໃນພິທີຖະແຫຼງຂ່າວຈັດຂຶ້ນໃນຕອນເຊົ້າ ວັນທີ 25 ກຸມພາ 2020 ວ່າ : ມາຮອດປະຈຸບັນຢູ່ລາວຍັງບໍ່ພົບຜູ້ເປັນພະຍາດນີ້ເທື່ອ, ແຕ່ລັດຖະບານລາວໄດ້ເອົາໃຈໃສ່ເຝົ້າລະວັງພະຍາດຢ່າງໃກ້ຊິດ ຜ່ານມາມີກໍລະນີສົງໃສ ຈຳນວນ 43 ກໍລະນີ ແຕ່ພາຍຫຼັງເກັບຕົວຢ່າງໄປກວດຢູ່ສູນວິເຄາະແຫ່ງຊາດລາວ ແລະສົ່ງຕົວຢ່າງໄປກວດຢູ່ຫ້ອງວິເຄາະຂອງອົງການອານາໄມໂລກ ປະເທດອົສຕຼາລີແລ້ວ ທັງ 43 ກໍລະນີບໍ່ພົບເຊື້ອພະຍາດໂຄວິດ 19.
ຮອງສາດສະດາຈານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກໃຫ້ຮູ້ຕື່ມວ່າ : ເຖິງວ່າປະເທດລາວຈະບໍ່ມີຜູ້ຕິດເຊື້ອພະຍາດໂຄວິດ 19 ກໍ່ຕາມ ແຕ່ຄະນະສະເພາະກິດກໍ່ຄືກະຊວງສາທາລະນະສຸກໄດ້ຕິດຕາມແລະເຝົ້າລະວັງຢ່າງເຄັງຄັດ ໂດຍສະເໜີໃຫ້ປະເທດທີ່ມີການລະບາດ ກ່ອນຈະອານຸຍາດໃຫ້ຄົນເດີນທາງເຂົ້າມາລາວ ຕ້ອງມີການກວດສຸຂະພາບຢ່າງດີ ຫຼື ສະແກນຫາຜູ້ເປັນໄຂ້ ທີ່ມີອຸ່ນຫະພູມຮ່າງກາຍສູງ ຖ້າພົບເຫັນຂໍໃຫ້ປິ່ນປົວທັນທີເພື່ອໃຫ້ຫາຍດີຈື່ງສາມາດເດີນທາງມາລາວໄດ້ ປະຈຸບັນນີ້ ໜ່ວຍງານສະເພາະກິດກະຊວງສາທາະນະສຸກໄດ້ປັບປຸງການເຝົ້າລະວັງພະຍາດໂຄວິດ19ຂື້ນຕື່ມ ຄື:ບໍ່ສະເພາະແຕ່ຜູ້ທີ່ເດີນທາງມາຈາກເຂດທີ່ມີການລະບາດໃນປະເທດຈີນເທົ່ານັ້ນ ແຕ່ຈະເພີ່ມການເຝົ້າລະວັງຜູ້ທີ່ເດີນທາງມາຈາກປະເທດສ.ເກົາຫຼີ ບັນດາປະເທດໃນເອີຣົບ ແລະ ປະເທດໃກ້ຄຽງທີ່ມີການລະບາດຂອງພະຍາດໂຄວິດ19 ຕື່ມອີກ %
ໂດຍ: ໄພມະນີ ທໍາມະວົງສາ
Lao National Radio
