ໃນຕອນບ່າຍ ວັນທີ 25 ກຸມພາ 2020, ທີ່ຫ້ອງປະຕິບັດງານເຫດການສຸກເສີນດ້ານສາທາລະນະສຸກ, ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານໝໍ ຣັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫລງຂ່າວຕໍ່ສື່ມວນຊົນວ່າ: ຕໍ່ກໍລະນີຂ່າວລືທີ່ອອກທາງສື່ສັງຄົມອອນລາຍຽວກັບ ການເກີດການແຜ່ລະບາດພະຍາດອັກເສບປອດຈາກເຊື້ອຈຸລະໂລກໂຄໂຣນາ ສາຍພັນໃໝ່ 2019 ຫຼື COVID -19 ຢູ່ຕະຫຼາດຊັງຈຽງ ນະຄອນຫລວງວຽງຈັນ ນັ້ນ, ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຂໍຢັ້ງຢືນວ່າ: ຂ່າວດັ່ງກ່າວ ແມ່ນບໍ່ມີມູນຄວາມເປັນຈິງແຕ່ຢ່າງໃດ, ເປັນພຽງຂ່າວປອມທີ່ຫວັງສ້າງຄວາມວຸ້ນວາຍແກ່ສັງຄົມເທົ່ານັ້ນ.

ໃນຂະນະດຽວກັນ, ຜູ້ບໍລິຫານຕະຫຼາດຊັ່ງຈຽງ ກໍ່ໄດ້ອອກແຈ້ງການເພື່ອຊີ້ແຈງຄວາມຈິງແລ້ວ, ແລະ ທີມງານສຶບສວນເຝົ້າລະວັງຂອງກະຊວງສາທາລະນະສຸກ ກໍ່ໄດ້ລົງໄປຍັງສະຖານທີ່ດັ່ງກ່າວເພື່ອສອບຖາມ ແລະ ສືບຄົ້ນຫາຄວາມເປັນຈິງ, ຊຶ່ງຜົນປະກົດອອກມາວ່າມາຮອດປະຈຸບັນນີ້, ສປປ ລາວ ແມ່ນຍັງບໍ່ທັນເກີດມີກໍລະນີພະຍາດຕິດແປດເກີດຂຶ້ນແຕ່ຢ່າງໃດເທື່ອ; ຄວາມຈິງກ່ຽວກັບເຫດການນີ້ ແມ່ນໄດ້ມີການປິດປະຕູຂອງຕະຫຼາດ ເປັນຊ່ວງໄລຍະເວລາສັ້ນໆ ເພື່ອສະກັດຈັບຄົນຂີ້ລັກທີ່ເຂົ້າໄປລັກເຄື່ອງໃນຕະຫຼາດເທົ່ານັ້ນ. ໃນຂະນະດຽວກັນ, ໃນໄລຍະນີ້ ຜັດມີບາງຂ່າວທີ່ອອກທາງອອນລາຍ ຊຶ່ງໄດ້ເອົາເຫດການຢູ່ບາງປະເທດທີ່ໄດ້ປະກາດຍົກລະດັບຄວາມຮ້າຍແຮງຂອງພະຍາດ ມາສົມທຽບກັບເຫດການຢູ່ປະເທດລາວເຮົາ ເມື່ອສອງອາທິດຜ່ານມາ, ຊຶ່ງຂ່າວດັ່ງກ່າວກໍ່ໄດ້ກໍ່ໃຫ້ເກີດຄວາມເຂົ້າໃຈຜິດ ແລະ ຄວາມວຸ້ນວາຍພໍສົມຄວນ. ດັ່ງທີ່ຊາບນຳກັນແລ້ວວ່າ ຄວາມສ່ຽງ, ຄວາມຮ້າຍແຮງ ແລະ ມາດຕະການປ້ອງກັນພະຍາດໃນແຕ່ລະຂົງເຂດ ແລະ ແຕ່ລະປະເທດແມ່ນມີຄວາມແຕກຕ່າງກັນ.


ສຳລັບ ສປປ ລາວເຮົາ ກໍ່ໄດ້ມີການປະເມີນຄວາມສ່ຽງເປັນແຕ່ລະໄລຍະ ເພື່ອວາງແຜນຮັບມື ແລະ ເຝົ້າລະວັງເຫດການທີ່ອາດເກີດຂື້ນ, ຍ້ອນປະເທດລາວເຮົາແມ່ນຖືວ່າເປັນປະເທດທີ່ມີຄວາມສ່ຽງ,ເຖິງແມ່ນວ່າໃນຕອນນີ້ຈະຍັງບໍ່ທັນພົບກໍລະນີຂອງພະຍາດດັ່ງກ່າວນີ້ກໍ່ຕາມ, ແຕ່ພວກເຮົາກໍ່ມີການວາງມາດຕະການຮອງຮັບທີ່ເໜາະສົມ, ໂດຍສະເພາະ ການກັ່ນກອງຄົນເຂົ້າອອກ, ການໃຫ້ຂໍ້ມູນ, ການກະກຽມຫ້ອງວິເຄາະ ແລະ ອຸປະກອນການແພດເພື່ອຮອງຮັບເຫດການທີ່ອາດຈະເກີດຂື້ນ, ພ້ອມທັງ ມີການເຝົ້າລະວັງ ແລະ ສັ່ງສືບຫາກໍລະນີສົງໃສໃນກຸ່ມຄົນ ແລະ ສະຖານທີ່ຕ່າງໆທີ່ມີຄວາມສ່ຽງ. ທ່ານໝໍ ຣັດຕະນະໄຊ ເພັດສຸວັນ ໃຫ້ຮູ້ຕື່ມອີກວ່າ: ມາຮອດປະຈຸບັນນີ້, ກະຊວງສາທາລະນະສຸກກໍ່ຍັງສືບຕໍ່ກະກຽມຄວາມພ້ອມໃນການໂຕ້ຕອບ ແລະ ຮັບມືກັບພະຍາດຄື: ທີມງານເຝົ້າລະວັງ ແລະ ໂຕ້ຕອບຂອງພວກເຮົາແມ່ນມີຄວາມກຽມພ້ອມ ແລະ ເອົາໃຈໃສ່ສືບຕໍ່ການກວດກາສອບສວນ ແລະ ເກັບຕົວຢ່າງກໍລະນີສົງໃສພາຍໃນໄລຍະເວລາທຸກໆ 24 – 48 ຊົ່ວໂມງ.

ເພື່ອຮັບຂໍ້ມູນຂ່າວສານທີ່ເປັນຈິງ, ຂໍໃຫ້ທຸກຄົນຕິດຕາມຂ່າວຈາກແຫຼ່ງຂ່າວທີ່ເປັນທາງການເທົ່ານັ້ນເຊັ່ນ: ການຖະແຫຼ່ງຂ່າວກ່ຽວກັບມາດຕະການ ແລະ ຄວາມຄືບໜ້າຂອງການປ້ອງກັນພະຍາດ ທີ່ກະຊວງສາທາລະນະສຸກ ແລະ Facebook ສູນຂ່າວສານການແພດສຸຂະ ສຶກສາ (Centre of Information and Education for Health) ຫຼື ສາມາດຕິດຕໍ່ສາຍດ່ວນ ໝາຍເລກ 166 ໄດ້ຕະຫຼອດ 24 ຊົ່ວໂມງ ຫຼື ຈະໂທເຂົ້າໝາຍເລກ 020 540 66777 ກໍ່ໄດ້ເຊັ່ນກັນ.

ສຳລັບພາສາຈີນ ພວກເຮົາກໍ່ມີທີມງານແພດໝໍທີ່ສາມາດເວົ້າພາສາຈີນ ໃຫ້ຂໍ້ມູນໄດ້ຕະຫຼອດເວລາເຊັ່ນກັນ. ມາຮອດວັນທີ 24 ກຸມພາ 2020 ນີ້ ໄດ້ພົບກໍລະນີຕິດເຊື້ອພະຍາດ COVID -19 ທັງໝົດ 77.658 ກໍລະນີ, ໃນນີ້ເສຍຊີວິດແລ້ວທັງໝົດ 2.663 ກໍລະນີ, ປິ່ນປົວຫາຍດີ ແລະ ອອກໂຮງໝໍແລ້ວ 2.589 ກໍລະນີ.

Lao National Radio

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here