ໃນຕອນເຊົ້າວັນທີ 22/2/2020 ຢູ່ເດີ່ນສະຫນາມຫລວງຂອງແຂວງພາຍຫລັງມີການຄົບງັນມາແຕ່ທີ 18 ກຸມພາ 2020 ເປັນຕົ້ນມາ, ພາຍໃຕ້ການເປັນປະທານຈັດງານຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ຮອງປະທານປະເທດ, ມີການນຳຂັ້ນສູງພັກ-ລັດທີ່ມາຈາກສູນກາງ, ການນຳແຂວງໄຊຍະບູລີ, ພະເຖລານຸເຖລະ, ພ້ອມດ້ວຍມວນຊົນທັງພາຍໃນແລະຕ່າງປະເທດຈຳນວນຫລາຍ.

ໂອກາດນີ້ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ທັງເປັນປະທານຈັດງານບຸນຊ້າງຄັ້ງນີ້ໃຫ້ຮູ້ວ່າ: ການຈັດງານມະຫາກຳບຸນຊ້າງເພື່ອແນໃສ່ອະນຸລັກຮັກສາຊ້າງທີ່ເປັນມູນມໍລະດົກຂອງຊາດທີ່ເປັນມິ່ງບ້ານຂວັນເມືອງຂອງຄົນລາວ ເປັນການຮັກສາວັດທະນະທຳ, ຮີດຄອງປະເພນີອັນດີງາມຂອງຊາດ ກໍ່ຄືຂອງປະຊາຊົນແຂວງໄຊຍະບູລີ ທີ່ມີວິທີການດຳລົງຊີວິດຕິດພັນກັບຊ້າງມາແຕ່ສະໄຫມກ່ອນ ໃຫ້ນັກທ່ອງທ່ຽວທັງພາຍໃນແລະຕ່າງປະເທດໄດ້ຮັບຮູ້

ພ້ອມທັງເປັນເວທີສະແດງຄວາມສາມາດແລະທັກສະການຄວບຄຸມຊ້າງຂອງຄວນຊ້າງ, ການສະແດງກິດຈະກຳຕ່າງໆຂອງຊ້າງຕື່ມອີກ, ໂອກາດດຽວກັນນີ້ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ຕາງຫນ້າໃຫ້ປະຊາຊົນພາຍໃນແຂວງຂຶ້ນ ມີຄຳເຫັນສະແດງຄວາມຂອບໃຈທຸກພາກສ່ວນທີ່ໃຫ້ການສະຫນັບສະຫນູນເຮັດໃຫ້ການຈັດງານຄັ້ງນີ້ດຳເນີນໄປດ້ວຍຜົນສຳເລັດພ້ອມທັງກ່າວເປີດງານມະຫາກຳບຸນຊ້າງ ຄັ້ງທີ 14 ປະຈຳປີ 2020 ຢ່າງເປັນທາງການ.

ສຳລັບງານມະຫາກຳບຸນຊ້າງຄັ້ງທີ 14 ປະຈຳປີ 2020 ຢູ່ແຂວງໄຊຍະບູລີ ຈັດຂຶ້ນຢ່າງຍິ່ງໃຫຍ່ຄືທຸກໆປີຜ່ານມາພາຍໃນງານມີການສະແດງສີນລະປະວັນນະຄະດີ ທີ່ເປັນເອກະລັກຂອງປະຊາຊົນຊາວແຂວງໄຊຍະບູລີ, ຮັບຊົມສະແດງການເດີນສວນສະຫນາມຂອງກ້ອນກຳລັງຕ່າງໆມາຈາກ 11 ເມືອງທົ່ວແຂວງ, ຂະບວນແຮ່ພາຂັວນຊ້າງ, ຂະບວນແຫ່ຊ້າງຈຳນວນ 72 ໂຕ ໃນນີ້ມີຊ້າງເຜືອກ 1ໂຕ, ທ່ຽວຊົມພິພິທະພັນຊ້າງ, ການສະແດງຊ້າງຄຳຮູ້, ປະກວດຊ້າງງາມ, ພິທີບາສີສູ່ຂວັນຊ້າງ, ຂີ່ຊ້າງຊົມເທດສະບານແຂວງ ແລະກິດຈະກຳສຳຄັນຈຳນວນຫນຶ່ງ,

ນອກນີ້ພາຍໃນງານຍັງມີການງວາງສະແດງສິນຄ້າອຸປະໂພກບໍໂພກຈຳນວນຫລາຍ, ສິນຄ້າໂອດ໋ອບທີ່ມີຊື່ສຽງຈາກພາຍໃນແລະຕ່າງປະເທດຈຳນວນ 132 ຮ້ານ, ແລະຈະສິ້ນສຸດໃນວັນທີ 28 ກຸມພາ 2020. ນອກຈາກນີ້ທຸກໆຄໍ່າຄືນພາຍໃນງານຍັງມີການຄົບງັນສະແດງສິນລະປະວັນນະຄະດີ ທີ່ເປັນເອກະລັກຂອງປະຊາຊົນຊາວແຂວງ ໄຊຍະບູລີ ເຊິ່ງສາມາດດຶງດູດນັກທ່ອງທ່ຽວທັງພາຍໃນແລະຕ່າງປະເທດໃຫ້ມາທ່ຽວຊົມຫລາຍສົມຄວນ.

ຂ່າວ: ເດດອາລຸນ ແກ້ວວິໄລວົງ