ໃຜຍັງບໍ່ທັນໄດ້ເສຍຄ່າທຳນຽມທາງ ປະຈຳປີ 2020 ຮີບຟ້າວໄປຈ່າຍດ່ວນໆໆໆ… ຖ້າບໍ່ຢາກຖືກປັບໃໝ.
ເພື່ອເຮັດໃຫ້ການເກັບຄ່າທຳນຽມປະຈຳປີ 2020 ຖືກຈັດຕັ້ງປະຕິບັດຕາມກຳນົດເວລາ ແລະ ມີຄວາມເປັນເອກະພາບໃນຂອບເຂດທົ່ວປະເທດ ຜູ້ທີ່ເປັນເຈົ້າຂອງພາຫະນະ ບໍ່ວ່າຈະເປັນອົງກອນຂອງພາກລັດ ແລະ ເອກະຊົນ ຫຼືບຸກຄົນ ຄວນປະຕິບັດພັນທະຕໍ່ລັດຖະບານຈ່າຍຄ່າທຳນຽມທາງດັ່ງນີ້:
1.ຜູ້ທີ່ເປັນເຈົ້າຂອງນຳໃຊ້ຍານພາຫະນະ ຕ້ອງໄດ້ເສຍຄ່າທຳນຽມ ປະຈຳປີ ສາມາດເລີ່ມເສຍຕັ້ງແຕ່ເດືອນ ມັງກອນ ຫາເດືອນມີນາ ຂອງທຸກໆປີ, ຖ້າບໍ່ເສຍຕາມເວລາທີ່ທາງການກຳນົດໄວ້ຈະຖືກປັບໃໝຕາມແຕ່ລະກໍລະນີທີ່ໄດ້ກຳນົດໄວ້ໃນ VI ຂໍ້ 2 ຄຳແນະນຳ ສະບັບເລກທີ 3455/ກງ ລົງວັນທີ 10 ຕຸລາ 2017.
2. ໃນກໍລະນີຫາກຍັງບໍ່ໄດ້ເສຍຄ່າທຳນຽມຂອງປີຜ່ານມາ ນອກຈາກໄດ້ເສຍຄ່າທຳນຽມທາງຕາມອັດຕາທີ່ກຳນົດໄວ້ໃນລັດຖະບັນຍັດວ່າດ້ວຍຄ່າທຳນຽມທາງຄືນແລ້ວ ຍັງຈະໄດ້ຖືກປະຕິບັດມາດຕະການປັບໃໝດັ່ງນີ້:
– ຖືກປັບໃໝ 60% ຂອງມູນຄ່າທຳນຽມທາງຕໍ່ປີ ກໍລະນີຍັງບໍ່ໄດ້ເສຍຄ່າທາງນັບແຕ່ປີ 2018
– ຖືກປັບໃໝ 40% ຂອງມູນຄ່າທີ່ຕ້ອງເສຍຄ່າທຳນຽມທາງປະຈຳປີ 2019 ກໍລະນີຍັງບໍ່ໄດ້ເສຍຂອງປີ 2019.
3. ການຊໍາລະເງິນຄ່າທຳນຽມທາງ ປັດຈຸບັນ ກໍສະດວກສະບາຍສາມາດຊໍາລະຜ່ານລະບົບທະນາຄານຕ່າງໆໃນລາວຫຼາຍທະນາຄານໄດ້ແລ້ວ ຫຼື ຈຸດບໍລິການຂອງທະນາຄານຕ່າງໆ.
4. ເຈົ້າໜ້າທີ່ຕໍາຫຼວດຈະລາຈອນ ຈະເຮັດໜ້າທີ່ກວດກາ,ຊຸກຍູ້ ການເສຍຄ່າທຳນຽມທາງ ຕາມທີ່ລັດຖະບານໄດ້ກຳນົດ ແລະ ນຳໃຊ້ມາດຕະການຕໍ່ຜູ້ລະເມີດການເສຍຄ່າທຳນຽມທາງໃນຂອບເຂດທົ່ວປະເທດ.
