ໃນລະຫວ່າງວັນທີ 29 ມັງກອນ ຫາ 8 ກຸມພາ 2020, ພະແນກຕໍາຫຼວດຕ້ານການຄ້າມະນຸດ ຫ້ອງຕໍາຫຼວດ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ໄດ້ລົງມ້າງບັນດາຮ້ານອາຫານ ແລະ ຮ້ານກິນດື່ມ ທີ່ແອບແຝງການຄ້າຂາຍປະເວນີ ຢູ່ໃນ 3 ເມືອງນະຄອນຫຼວງວຽງຈັນຄື: ເມືອງໄຊເຊດຖາມີ 2 ຮ້ານ, ເມືອງໄຊທານີມີ 2 ຮ້ານ, ເມືອງສີສັດຕະນາກມີ 1 ຮ້ານ. ໃນນີ້, ໄດ້ກັກຕົວເຈົ້າຂອງຮ້ານ 5 ຄົນຄື: ຮ້ານ ທ້າວພອນສຸກ, ຮ້ານ ທ້າວອານຸສິດ, ຮ້ານ ນາງສານ, ຮ້ານ ນາງນວນ ແລະ ຮ້ານນາງແຫຼ້; ສາວບໍລິການຂາຍປະເວນີ 15 ຄົນມາສືບສວນ-ສອບສວນ ເພື່ອປະກອບສໍານວນສໍາເນົາ ແລ້ວນໍາສົ່ງໃຫ້ໄອຍະການ ເພື່ອໃຫ້ສານຕັດສິນລົງໂທດຕາມກົດໝາຍ.
ພັທ ທອງພັນ ທິລະສັກ ຫົວໜ້າພະແນກຕໍາຫຼວດຕ້ານການຄ້າມະນຸດ ຫ້ອງຕໍາຫຼວດ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວ ປກສ ນວ ໃນຕອນບ່າຍວັນທີ 19 ກຸມພາ 2020 ວ່າ: ໂດຍອີງຕາມແຈ້ງການເລກທີ 525/ຫວນວ, ລົງວັນທີ 15 ຕຸລາ 2018 ຂອງຫ້ອງວ່າການນະຄອນຫຼວງວຽງຈັນ ກ່ຽວກັບການຈັດຕັ້ງກໍາລັງວິຊາສະເພາະລົງເກັບກໍາເປົ້າໝາຍ ແລະ ແກ້ໄຂບັນຫາໂສເພນີ ຢູ່ໃນ ນວ. ດັ່ງນັ້ນ, ພະແນກຕໍາຫຼວດຕ້ານການຄ້າມະນຸດ ນວ ຈຶ່ງໄດ້ລົງເຄື່ອນໄຫວກວດກາຄືນ ບັນດາຮ້ານທີ່ເຄີຍສຶກສາອົບຮົມມາແລ້ວວ່າມີການຢຸດເຊົາຫຼືບໍ, ແຕ່ຜ່ານການຕິດຕາມກວດກາຄືນເຫັນວ່າ ສ່ວນຫຼາຍແມ່ນຍັງບໍ່ຢຸດເຊົາແຕ່ມີລັກສະນະປ່ຽນຮູບການໃໝ່ໄປເລື້ອຍໆ; ເຊິ່ງຜ່ານການສືບສວນ-ສອບສວນ ພວກກ່ຽວໄດ້ໃຫ້ການຮັບສາລະພາບວ່າ:
ໄດ້ເຊົ່າສະຖານທີເພື່ອເປີດຮ້ານອາຫານ, ຮ້ານກິນດື່ມແລ້ວຮັບເອົາສາວບໍລິການ ເພື່ອມາເສີບອາຫານ ແລະ ເຄື່ອງດື່ມ; ແຕ່ໃນການທີ່ຮັບເອົາສາວບໍລິການເຂົ້າມາຮ້ານແມ່ນຈະບໍ່ມີເງິນເດືອນໃຫ້ແຕ່ໃຫ້ກິນ ແລະ ພັກເຊົາຢູ່ນໍາເຈົ້າຂອງຮ້ານເລີຍ, ສ່ວນຄ່າຕອບແທນແມ່ນເປັນເງິນສ່ວນແບ່ງຈາກການຂາຍເບຍແກ້ວລະ 2,000 ກີບ; ເຊິ່ງຍິງສາວດັ່ງກ່າວຈະອາໄສສະຖານທີ່ຂອງຮ້ານເປັນບ່ອນພົວພັນ ແລະ ຄ້າຂາຍປະເວນີ ເວລາມີແຂກເຂົ້າມາໃຊ້ບໍລິການຈໍານວນໜຶ່ງ ແມ່ນອາໄສສະຖານທີ່ພັກເຊົ່າເປັນການຊົ່ວຄາວ, ບາງຄັ້ງກໍໄປໃຊ້ບໍລິການຢູ່ບ້ານພັກ, ສ່ວນເຈົ້າຂອງຮ້ານແມ່ນຈະເກັບຄ່າບໍລິການຊົ່ວຄາວແມ່ນ 50,000 ກີບຕໍ່ຄັ້ງ, ຖ້າເປັນຄ້າງຄືນແມ່ນ 100,000 ກີບຕໍ່ຄັ້ງຕໍ່ຄົນ.
ຕໍໍ່ກັບຄະດີດັ່ງກ່າວປັດຈຸບັນ ເຈົ້າໜ້າທີ່ຕໍາຫຼວດແມ່ນພວມປະກອບສໍານວນສໍາເນົາ ກຽມສົ່ງໃຫ້ໄອຍະການ ເພື່ອໃຫ້ສານຕັດສິນລົງໂທດຕາມກົດໝາຍ.
ໃນໂອກາດນີ້, ທ່ານຫົວໜ້າພະແນກຕໍາຫຼວດຕ້ານການຄ້າມະນຸດ ໄດ້ຮຽກຮ້ອງໃຫ້ບັນດາພໍ່ແມ່ປະຊາຊົນບັນດາເຜົ່າ, ຊາວຕ່າງດ້າວ, ຊາວຕ່າງປະເທດທີ່ໄດ້ດໍາລົງຊິວິດປະກອບອາຊີບດໍາເນີນທຸລະກິດ, ຄ້າຂາຍຢູ່ໃນນະຄອນຫຼວງວຽງຈັນ ຈົ່ງເພີ່ມທະວີເອົາໃຈໃສ່ປະຕິບັດໃຫ້ຖືກຕ້ອງຕາມລະບຽບກົດໝາຍທີ່ວາງຢ່າງເຂັ້ມງວດ ແລະ ຮຽກຮ້ອງໃຫ້ບັນດາຊາຍໜຸ່ມ, ຍິງສາວທີ່ມາຈາກຕ່າງແຂວງ, ນັບທັງໃນຕົວເມືອງ ຢູ່ນະຄອນຫຼວງວຽງຈັນ ທີ່ມີຈຸດປະສົງຊອກຫາວຽກເຮັດງານທໍາ ຈົ່ງມີສະຕິເຄົາລົບກົດໝາຍ ແລະ ຮີດຄອງປະເພນີອັນດີງາມຂອງຊາດລາວໄວ້ ບໍ່ດັ່ງນັ້ນຈະຕົກເປັນເຫຍື່ອຂອງການຄ້າມະນຸດ-ຄ້າໂສເພນີ.
ຂ່າວ: ບົວແກ້ວ
