ໂຄງການກໍ່ສ້າງ ຂົວຂ້າມນໍ້າຮຸ່ງ 2 ແຫ່ງຄື : ຈຸດ ບ້ານທ່ານາ ຫາ ບ້ານນາຍາວ ແລະ ຈຸດ ບ້ານນາເລົາ ຫາ ບ້ານນາຕໍໃຫ່ຍ ເມືອງໄຊຍະບູລີ ແຂວງໄຊຍະບູລີ. ມີຄວາມຄືບໜ້າສໍາເລັດໄປແລ້ວ 75,30% ແລະ ຄາດວ່າການກໍ່ສ້າງຂົວ 2 ແຫ່ງນີ້ ຈະສໍາເລັດກ່ອນກໍານົດທີ່ຕັ້ງໄວໃນເດືອນມິຖຸນາ ປີ 2021 ໂດຍຈະສໍາເລັດ ໃນເດືອນ ມິຖຸນາ 2020 ນີ້.
ພ້ອມຈະໃຫ້ພໍ່ແມ່ປະຊາຊົນຊາວແຂວງໄຊຍະບູລີກໍ່ຄືແຂກພາຍໃນ ແລະ ຕ່າງປະເທດ ທີ່ມາທ່ຽວໃນງານມະຫາກໍາບຸນຊ້າງທີ່ຈະເປີດຂຶ້ນໃນລະຫວ່າງວັນທີ 22 ກຸມພາ ປີ 2020 ນີ້. ໄດ້ທົດລອງໃຊ້ບໍລິການເປັນເວລາ 3 ວັນ.
ທ່ານ ສົມບູນ ບຸນຈະເລີນ ຫົວໜ້າໂຄງການກໍ່ສ້າງຂົວຂ້າມນໍ້າຮຸ່ງ ໄດ້ໃຫ້ສໍາພາດຕໍ່ນັກຂ່າວ ແຂວງໄຊຍະບູລີ ວ່າໂຄງການກໍ່ສ້າງຂົວຂ້າມນໍ້າຮຸ່ງ ບ້ານທ່ານາ ແລະ ບ້ານນາຕໍແມ່ນໂຄງການບູລິມະສິດໃນແຜນພັດທະນາຂອງແຂວງໄຊຍະບູລີ ປີ 2015 – 2020 ໂດຍແມ່ນກົມຂົວທາງກະຊວງໂຍທາທິການ ແລະ ຂົນສົ່ງເປັນເຈົ້າຂອງໂຄງການ ພະແນກ ຍທຂ ແຂວງໄຊຍະບູລີ ເປັນວິສະວະກອນປະຈໍາສະໜາມ, ບໍລິສັດຮັບເໝົາຫຼັກແມ່ນ MCE ຈາກປະເທດໂອຕິດ ແລະ ຜູ້ຮັບເໝົ້າຕໍ່ຊ່ວງ ແມ່ນລັດວິສະຫະກິດກໍ່ສ້າງຄົມມະນາຄົມ (SECC) ການກໍ່ສ້າງຂົວທັງສອງແຫ່ງ ມູນຄ່າທັງໝົດ 6 ລ້ານ1 ແສນ ເອີໂລ ແມ່ນລັດຖະບານ ສປປລາວ ກູ້ຢືມຈາກລັດຖະບານໂອຕິດ ໂດຍບໍ່ມີດອກເບ້ຍ ຜ່ານທະນາຄານ ຢູນີ ເຄຣດິດ ຂອງໂອຕິດ,
ໂຄງການກໍ່ສ້າງຂົວທັງ 2 ແຫ່ງເປັນຂົວປະສົມເຫຼັກ ແລະຄອນກຼີດເສີມເຫຼັກ ພາກສ່ວນຫລຸ່ມເປັນຄອນກຼີດເສີມເຫຼັກພາກສ່ວນເທິງເປັນຂາງເຫຼັກ ( ອຸປະກອນແມ່ນນໍາເຂົ້າຈາກປະເທດໂອຕຼິດ) ຍຶດດ້ວຍຄອນກຼີດເສີມເຫຼັກໜ້າຂົວປູຢາງ 2 ຊັ້ນຄວາມກວ້າງຂອງຂົວ 10 ແມັດກວ່າ, ປະກອບມີ 2 ຊ່ອງຈໍລະຈອນ ແຕ່ລະຊ່ອງກວ້າງ 3,75 ແມັດ, ມີທາງຍ່າງສອງເບື້ອງໆລະ 1,5 ແມັດ, ລວງຍາວຂອງຂົວ 100 ກວ່າແມັດ, ປະກອບມີ 3 ໄລຍະ 2 ເສົາກາງນໍ້າ ເຊັ່ນ: ໄລຍະຍາວ 28,5 ແມັດ, ໄລຍະ 46,4 ແມັດ ແລະ ໄລຍະ 28,5 ແມັດ, ປະຈຸບັນຂົວສອງແຫ່ງນີ້ພວມຕິດຕັ້ງຮາວກັນຕົກ, ຮາວພະນັກ, ເທຄອນກຼີດທາງຍ່າງຮາວພະນັກ – ລົງໜ້າທາງ ເທເບດຄອດທາງເຂົ້າຂົວ,
ເຊິ່ງມາຮອດປະຈຸບັນຂົວດັ່ງກ່າວມີຄວາມຄືບໜ້າໄປແລ້ວ 75,30% ຄາດວ່າຈະໃຫ້ສໍາເລັດ ແລະ ນໍາໃຊ້ໃນເດືອນມິຖຸນາ ປີ 2020ນີ້. ຖ້າຂົວທັງ 2 ແຫ່ງເປີດນໍາໃຊ້ຈະສ້າງຄວາມສະດວກໃຫ້ຊາວແຂວງໄຊຍະບູລີໄປມາຫາສູ່ແລກປ່ຽນຊື້ຂາຍມີຄວາມສະດວກວ່ອງໄວຂຶ້ນ.
ຂ່າວ: ບຸນທີ.
