ວັນທີ 13 ກຸມພາ 2020 ສປປ ລາວ ເພີ່ມທະວີການເຝົ້າລະວັງ ແລະ ຕອບໂຕ້ພະຍາດ COVID-19 ກະຊວງສາທາລະນະສຸກໄດ້ຈັດສຳມະນາກ່ຽວກັບການຍົກລະ ດັບຄວາມພ້ອມວຽກງານເຝົ້າລະວັງ ແລະ ຕອບໂຕ້ຕໍ່ການລະບາດຂອງພະຍາດອັກເສບປອດສາຍພັນໃໝ່ (COVID-19) ໃຫ້ແກ່ທີມງານຕອບໂຕ້ໄວຂັ້ນແຂວງຂຶ້ນລະຫວ່າງວັນທີ 13-14 ກຸມພາ 2020 ທີ່ໂຮງແຮມຄຣາວພາຊານະຄອນຫຼວງວຽງຈັນໂດຍການສະໜັບສະໜູນຂອງອົງການ DTRT USCDD ແລະ ອົງການອະນາໄມໂລກ.
ທ່ານ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາກະຊວງສາທາລະນະສຸກໄດ້ກ່າວໃນການສໍາມະນາຄັ້ງນີ້ວ່າ: ການຈັດກອງປະຊຸມສຳມະນາໃນຄັ້ງນີ້ຂຶ້ນເພື່ອພັດທະນາລະບົບການເຝົ້າລະວັງ ແລະ ເພື່ອກຽມຄວາມພ້ອມຕອບໂຕ້ຕໍ່ກໍລະນີທີ່ອາດຈະມີການລະບາດເກີດຂຶ້ນທັງແນ່ໃສ່ໃຫ້ພະນັກງານທີ່ກ່ຽວຂ້ອງເຂົ້າໃຈເຖິງສະຖານະການໃນໂລກ ແລະ ຍຸດທະສາດການຕອບໂຕ້ກັບເຊື້ອໄວຣັສໂຄໂຣນາສາຍພັນໃໝ່ 2019 ໃນ ສປປ ລາວ ທັງໃຫ້ເຂົ້າໃຈຂຶ້ນຕື່ມ ກ່ຽວກັບກົນໄກການປະສານງານທີ່ມີຢູ່ແລ້ວໂດຍສະເພາະສູນປະຕິບັດງານສຸກເສີນ ແລະ ຂະບວນການຄັດກອງທີ່ດ່ານສາກົນເຂົ້າ-ອອກຕ່າງໆ ເພີ້ມທະວີໃນການທົບທວນຄືນບັນດາຄຳແນະນຳຕ່າງໆກ່ຽວກັບການນຳໃຊ້ນິຍາມກໍລະນີເພື່ອຄັດກອງການສອບສວນ ແລະ ການຕິດຕາມກໍລະນີສົງໃສໃຫ້ແກ່ທີມງານຕອບໂຕ້ໄວຂັ້ນແຂວງ ແລະ ໃຫ້ເຂົ້າໃຈຂຶ້ນຕື່ມກ່ຽວກັບບັນດາຂໍ້ແນະນຳໃນການະຕິບັດຕົວຈິງໃນການເກັບຕົວຢ່າງເພື່ອສົ່ງວິເຄາະສຳລັບເຊື້ອພະຍາດນີ້.
ນອກນັ້ນກໍເພື່ອຍົກສູງສະຕິຕື່ນຕົວກ່ຽວກັບການຄຸ້ມຄອງກໍລະນີການປ້ອງກັນ ແລະ ຄວບຄຸມການຕິດເຊື້ອ ແລະ ປະຕິບັດການນຸ່ງເຄື່ອງປ້ອງກັນຕົວເອງຢ່າງເໝາະສົມສຳລັບການຄັດກອງກໍລະນີການສອບສວນກໍລະນີ ແລະ ໃນຫ້ອງວິເຄາະ.
