ພິທີ ມອບ-ຮັບ ໜ້າທີ່ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ລະຫວ່າງ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນຕອນເຊົ້າວັນທີ 12 ກຸມພາ 2020 ນີ້ ທີ່ໂຮງລະຄອນພະລັກ-ພະລາມ ຫໍພິພິທະພັນແຫ່ງຊາດຫຼວງພະບາງ ໂດຍເປັນປະທານຂອງ ທ່ານ ວົງສະຫວັນ ເທບພະຈັນ ກຳມະການປະຈະພັກແຂວງ ຮອງເຈົ້າແຂວງຫຼວງພະບາງ, ມີ ຫົວໜ້າ-ຮອງຫົວໜ້າພະແນກການຂອງແຂວງ, ພ້ອມດ້ວຍຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ-ນະຄອນ ແລະ ພະນັກງານພາຍໃນພະແນກ ເຂົ້າຮ່ວມ.
ພິທີ ຕາງໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການອະນຸມັດໃຫ້ ທ່ານ ສຸລິທີບ ໜໍ່ຄຸນຜົນ ເລຂາຄະນະພັກຮາກຖານ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ອອກຜັກຜ່ອນຮັບອຸດໜູນບຳນານ ຕາມອາຍຸກະສຽນ ທີ່ໄດ້ກຳນົດໄວ້ໃນກົດໝາຍວ່າດ້ວຍພະນັກງານ-ລັດຖະກອນ, ພ້ອມທັງຜ່ານຂໍ້ຕົກລົງຂອງທ່ານເຈົ້າແຂວງຫລວງພະບາງ ວ່າດ້ວຍການແຕ່ງຕັ້ງ ປອ ນາງ ສຸດາພອນ ຄົມທະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂຶ້ນເປັນຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ຜູ້ໃໝ່. ຈາກນັ້ນ ທ່ານ ສຸລິທີບ ໜໍ່ຄຸນຜົນ ເລຂາຄະນະພັກຮາກຖານ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຜູ້ເກົ່າ ໄດ້ຂຶ້ນຜ່ານຜົນງານການເຄື່ອນໄຫວ ແລະ ການຊີ້ນໍານໍາພາ ແລະຈັດຕັ້ງປະຕິບັດວຽກງານ ໃນໄລຍະ ຜ່ານມາ ທັງກ່າວມອບໜ້າທີ່ ໃຫ້ຫົວໜ້າພະແນກຜູ້ໃໝ່. ຈາກນັ້ນ ໄດ້ມີີການລົງນາມເຊັນບົດບັນທຶກມອບ-ຮັບ ໜ້າທີ່ ໂດຍມີຜູ້ເຂົ້າຮ່ວມເປັນຂີພະຍານ.
ໂອກາດນີ້ ທ່ານ ວົງສະຫວັນ ເທບພະຈັນ ໄດ້ມີຄຳເຫັນກ່ຽວກັບການຍົກຍ້າຍ, ສັບຊ້ອນບ່ອນປະຈຳການຂອງພະນັກງານການນຳ, ພະນັກງານຫຼັກແຫຼ່ງ ເພື່ອກະກຽມຄວາມພ້ອມ ໃຫ້ແກ່ການດຳເນີນກອງປະຊຸມຂອງອົງຄະນະພັກແຕ່ລະຂັ້ນ ໃຫ້ຮັບປະກັນລັກສະນະສືບທອດ-ປ່ຽນແທນ ທາງດ້ານຄຸນນະພາບ, ຕອນທ້າຍ ທ່ານຮອງເຈົ້າແຂວງຫຼວງພະບາງ ໄດ້ເນັ້ນໃຫ້ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຜູ້ໃໝ່ ສືບຕໍ່ະຕິບັດວຽກງານຮອບດ້ານ ແນໃສ່ເຮັດໃຫ້ວຽກງານ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂອງແຂວງຫຼວງພະບາງມີການພັດທະນາດີຂື້ນຕື່ມ.
ຂອບໃຈຂ່າວຈາກ: ອາພຸດເດດ ບຸບຜາ
