ໃນຕອນເຊົ້າວັນທີ 8 ກຸມພາ 2020 ກົງກັບວັນເສົາ (ວັນບຸນມາຄະບູຊາ) ເພັງ 15 ຄໍ່າເດືອນສາມ ພສ 2563 ຊາວພຸດຈາກທຸກສາລະທິດໄດ້ຮ່ວມກັນທໍາບຸນຕັກບາດທີ່ສະຖານບູຮານວັດພູຈໍາປາສັກ.

ໃນພິທີ ພຣະອາຈານ ມະຫາ ສຸວັນ ຈັນທະຣາຊ ປະທານອົງການພຸດທະສາສະໜາສໍາພັນລາວ ແຂວງຈໍາປາສັກ ໄດ້ນໍາພາຄະນະສົງຈໍານວນ 500 ອົງ ແລະອອກຕົນຍາດໂຍມທັງຫຼາຍໄຫວ້ພຣະຣັດຕະນະໄຕ,ຮັບສິນ,ຮັບພອນ,ຮັບການຖວາຍທານ ທີ່ເປັນປັດໄຈຕ່າງໆ ຈາກນີ້ກໍໄດ້ຍ່າງບິນທະບາດ ຈາກບໍລິເວນໂຮງຊາວລົງຮອດແຄມໜອງສະ ໂດຍມີອອກຕົນຍາດໂຍມຮ່ວມໃສ່ບາດຢ່າງຫຼວງຫຼາຍ.

ປອ ບຸນຖອງດີວິໄຊ ເຈົ້າແຂວງຈໍາປາສັກພ້ອມດ້ວຍພັນລະຍາ,ທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກພ້ອມພັນລະຍາ,ບັນດາການນໍາແຂວງ,ເມືອງ,ພະແນກການກົມກອງອ້ອມຂ້າງ ແລະຊາວພຸດລາວ,ນັກທ່ອງທ່ຽວພາຍໃນ ແລະຕ່າງປະເທດເຂົ້າຮ່ວມຢ່າງຫຼວງຫຼາຍ.

ການທໍາບຸນຕັກບາດທີ່ສະຖານບູຮານວັດພູຈໍາປາສັກ ເປັນການສືບທອດຮີດຄອງປະເພນີວັດທະນະທໍາອັນດີງາມຂອງຊາດ ທີ່ຊາວເມືອງກໍຄືແຂວງຈໍາປາສັກສືບທອດມາແຕ່ບູຮານນະການ ໃຫ້ຄຽງຄູຢູ່ກັບຄົນລາວຕະຫຼອດໄປ ຈາກນີ້ກໍເປັນການອຸທິດສ່ວນກຸສົນ ແລະສີລິມົງຄົນໃຫ້ແກ່ຕົນເອງ ແລະຄອບຄົວໃຫ້ຢູ່ດີມີສຸກ ທັງເປັນການເຜີຍແຜ່ວັດທະນະທໍາ ແລະດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມວັດພູມໍລະດົກໂລກແຫ່ງທີ 2 ຂອງລາວໃຫ້ນັບມື້ຫຼາຍຂຶ້ນ ອີກດ້ວຍ.ຜູ້ເຂົ້າຮ່ວມທໍາບຸນຕັກບາດ ແລະທ່ຽວຊົມໃນງານບຸນ ຍັງໃຫ້ສໍາພາດເປັນສຽງດຽວກັນວ່າ: ມີຄວາມຮູ້ສຶກພູມໃຈທີ່ໄດ້ມາທໍາບຸນຕັກບາດໃນຄັ້ງນີ້ເພາະຖືເປັນໂອກາດດີທີ່ໄດ້ທໍາບຸນ ແລະທ່ອງທ່ຽວ ໄປພ້ອມໆກັນ.

ລາຍງານໂດຍ: ເກດສະໜາ ແກ້ວສຸວັນນະແສງ