ລາຍງານຈາກ Lao National Radio ໃຫ້ຮູ້ວ່າ ປະຈຸບັນ ສປປ ລາວ ມີຄວາມພ້ອມໃນການປ້ອງກັນການລະບາດຂອງເຊື້ອພະຍາດອັກເສບປອດຢ່າງເຕັມທີ່. ດຣ ພອນປະດິດ ສັງໄຊຍະລາດ ຫົວຫນ້າສູນວິເຄາະ ແລະ ລະບາດວີທະຍາ ກະຊວງສາທາລະນະສຸກ ຢັ້ງຢືນວ່າ: ປະຈຸບັນ, ສປປ ລາວເຮົາ ແມ່ນມີອຸປະກອນການແພດພຽງພໍໃນຂັ້ນພື້ນຖານ ແລະ ໄດ້ມາດຕະຖານສາກົນຕາມທີ່ອົງການອະນາໄມໂລກກຳນົດອອກເພື່ອກວດຫາເຊື້ອພະຍາດອັກເສບປອດ ເຊີ່ງເກີດຈາກເຊື້ອຈຸລະໂລກສາຍພັນໃໝ່ ຫລື ໂຄໂຣນາໄວຣັດ ທີ່ກຳລັງແຜ່ລະບາດໃນປະຈຸບັນ ຢູ່ສປ ຈີນ ແລະ ຫລາຍປະເທດໃນໂລກ;
ພ້ອມກັນນີ້, ທ່ານຍັງໄດ້ກ່າວຮັບປະກັນວ່າ ທຸກຂັ້ນຕອນໃນການກວດຫາເຊື້ອພະຍາດດັ່ງກ່າວແມ່ນປະຕິບັດຕາມຫລັກການໆແພດສາກົນທີ່ວາງອອກຢ່າງເຂັ້ມງວດ ແລະ ບໍ່ມີການປົກປິດຂໍ້ມູນຄວາມຈິງແຕ່ຢ່າງໃດທັງສິ້ນ.
ໃນໂອກາດໃຫ້ສຳພາດຕໍ່ສື່ມວນຊົນ ກ່ຽວກັບການຈັດຕັ້ງປະຕິບັດວຽກງານກວດຫາເຊື້ອພະຍາດອັກເສບປອດເຊີ່ງເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂຣນາໄວຣັດຢ່ຫ້ອງປະຊຸມສູນວິເຄາະ ແລະ ລະບາດວີທະຍາ, ນະຄອນຫລວງວຽງຈັນ ໃນຕອນເຊົ້າວັນທີ 3 ກຸມພາ 2020, ດຣ ພອນປະດິດ ສັງໄຊຍະລາດ, ຫົວຫນ້າສູນວິເຄາະ ແລະ ລະບາດວີທະຍາ ໃຫ້ຮູ້ວ່າ: ພາຍຫລັງໄດ້ຮັບແຈ້ງການຂອງກະຊວງສາທາລະນະສຸກກ່ຽວກັບການປ້ອງກັນພະຍາດອັກເສບປອດເຊິ່ງເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂຣນາໄວຣັດ, ສູນວິເຄາະ ແລະ ລະບາດວີທະຍາ ກໍ່ໄດ້ກະກຽມອຸປະກອນການແພດ ແລະ ບຸກຄະລາກອນແພດໝໍ ເພື່ອກຽມຄວາມພ້ອມດ້ານຕ່າງໆ
ໃນການວິໃຈຫາເຊື້ອພະຍາດນີ້ຢ່າງເຂັ້ມງວດ ໂດຍປະຕິບັດຕາມມາດຕະຖານດຽວກັນກັບບັນດາປະເທດໃກ້ຄຽງ, ພ້ອມທັງໄດ້ຢັ້ງຢືນວ່າ ທຸກໆຜົນການວິໃຈກ່ຽວກັບພະຍາດນີ້ ແມ່ນໄດ້ຕາມມາດຕະຖານສາກົນ. ດຣ ພອນປະດິດ ສັງໄຊຍະລາດ, ຍັງໃຫ້ຮູ້ຕື່ມວ່າ: ປັດຈຸບັນ, ສູນວິເຄາະ ແລະ ລະບາດວີທະຍາ, ກະຊວງສາທາລະນະສຸກ ກຳລັງເລັ່ງກວດກາຫາເຊື້ອພະຍາດອັກເສບປອດເຊິ່ງເກີດຈາກເຊື້ອຈຸລະໂລກສາຍພັນໃຫມ່ຫລື ໂຄໂຣນາໄວຣັດ ຈາກທັງໝົດ 11 ກໍລະນີສົງໃສທີ່ເດີນທາງມາຈາກເຂດທີ່ມີຄວາມສ່ຽງ ແລະ ມາຮອດຕອນນີ້ ໄດ້ຮັບການຢັ້ງຢືນຕົວຈິງແລ້ວວ່າ ທັງໝົດນີ້ບໍ່ເປັນພະຍາດດັ່ງກ່າວ.
ສຳລັບວຽກງານທີ່ຈຳເປັນອີກວຽກງານໜຶ່ງທີ່ສູນວິເຄາະ ແລະ ລະບາດວີທະຍາ ກຳລັງຈັດຕັ້ງປະຕິບັດໃນປະຈຸບັນ ແມ່ນການປະສານສົມທົບກັບບັນດາໂຮງໝໍແຂວງພາກເຫນືອ, ໂດຍສະເພາະ ໂຮງໝໍແຂວງຫລວງພະບາງ ແລະ ແຂວງຫລວງນ້ຳທາ ໃນການຂະຫຍາຍຈຸດຕິດຕັ້ງອຸປະກອນກວດຫາເຊື້ອພະຍາດອັກເສບປອດສາຍພັນໃຫມ່ ເພື່ອປ້ອງກັນບໍ່ໃຫ້ພະຍາດນີ້ເຂົ້າມາລະບາດໃນປະເທດລາວເຮົາໄດ້ຢ່າງເດັດຂາດ.
---------------
ຢ່າລືມກົດຕິດຕາມເພຈ All in LAOS
------------------------------
