ພັທ ສຸສິວັນ ລາດຊະວົງ ຫົວໜ້າຫ້ອງຕຳຫຼວດ ກອງບັນຊາການປ້ອງກັນຄວາມສະຫງົບ ນະຄອນ ຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວ ປກສ ນວ ໃນວັນທີ 29 ມັງກອນ 2020 ວ່າ: ໃນປີ 2020ນີ້; ພະແນກຕ້ານການຄ້າມະນຸດ ກໍຄືຫ້ອງຕຳຫຼວດ ກອງບັນຊາການປ້ອງກັນຄວາມສະຫງົບ ນະ ຄອນຫຼວງວຽງຈັນ ຈະສຸມໃສ່ 8 ວຽກ ເພື່ອສະກັດກັ້ນ ແລະ ຕ້ານການຄ້າປະເວນີ ເຮັດໃຫ້ການຄ້າປະເວນີໃນນະ ຄອນຫຼວງວຽງຈັນ ຫຼຸດໜ້ອຍຖອຍລົງເປັນກ້າວໆ.
ໃນ 8 ວຽກທີ່ຈະສຸມໃສ່ມີ:

1. ສຸມໃສ່ວຽກງານເກັບກໍາສະຖິຕິເປົ້າໝາຍຄ້າມະນຸດ ຄ້າ-ຂາຍປະເວນີ ແລະ ອາດຊະຍາກຳອື່ນໆ ຕາມໂຮງແຮມ, ເຮືອນພັກ, ຮ້ານອົບນວດ, ຮ້ານຄາລາໂອເກະ, ຮ້ານເສີມສວຍ, ຈຸດຫຼ່ໍແຫຼມພື້ນທີ່ສັບສົນໃຫ້ລະອຽດຊັດເຈນ ໃນການຕິດຕາມ ແລະ ຄຸ້ມຄອງເປົ້າໝາຍດັ່ງກ່າວ.

2. ສຸມໃສ່ວຽກງານໂຄສະນາປູກຈິດສຳນຶກ ໃຫ້ພໍ່-ແມ່ປະຊາຊົນ, ພະນັກງານລັດຖະກອນ, ນັກຮຽນ, ນັກສຶກສາ ໃຫ້ຮັບຮູ້ລະບຽບກົດໝາຍ ແລະ ຜົນຮ້າຍ ຂອງການຄ້າມະນຸດຢ່າງທົ່ວເຖິງ.

3. ສຸມໃສ່ການດໍາເນີນຄະດີທີ່ຍັງຄ້າງຄາໃຫ້ສໍາເລັດ, ປະຕິບັດໜ້າທີ່ຕາມພາລະບົດບາດ ເຮັດຕາມຫຼັກການລວມສູນປະຊາທິປະໄຕ ຮັບປະກັນສາມດ້ານເປັນຕົ້ນ ດ້ານການເມືອງ, ດ້ານກົດໝາຍ ແລະ ວິຊາສະເພາະ, ຮັບປະກັນໄດ້ຄວາມຍຸຕິທຳ ເພື່ອປົກປ້ອງຜູ້ຖືກເຄາະຮ້າຍ ຕາມສິດ ແລະ ນຳຜູ້ກະທຳຜິດມາລົງໂທດຕາມກົດໝາຍ.

4. ຈັດຕັ້ງປະຕິບັດຕາມຄຳສັ່ງເລກທີ 245/ນຍ ໄປຈັດຕັ້ງຜັນຂະຫຍາຍຢູ່ແຕ່ລະເມືອງ ໃຫ້ທົ່ວເຖິງ ໂດຍສະເພາະແມ່ນການແຕ່ງຕັ້ງຄະນະກຳມະການຕ້ານການຄ້າມະນຸດ.

5. ຂຶ້ນແຜນລົງແກ້ໄຂບັນດາເປົ້າໝາຍຄ້າມະນຸດ, ຄ້າ-ຂາຍປະເວນີ ໃນນະຄອນຫຼວງວຽງຈັນເປັນຕົ້ນ: ໂຮງແຮມ, ເຮືອນພັກ, ຮ້ານກິນດື່ມ, ສະຖານທີ່ສັບສົນ ແລະ ຈຸດຫຼ່ໍແຫຼມ ຕາມຄວາມອາດສາມາດຂອງຕົນ.

6. ສຸມໃສ່ເຮັດວຽກງານຕິດຕາມກວດກາຄົນເຂົ້າ-ອອກດ່ານສາກົນ, ດ່ານທ້ອງຖິ່ນ ແລະ ສະຖານ ທີ່ຕ່າງໆ ໃນນະຄອນຫຼວງວຽງຈັນ.

7. ປະສານສົມທົບຢ່າງກົມກຽວ ກັບພາກສ່ວນກຽວຂ້ອງ ເຮັດໜ້າທີ່ຊ່ວຍເຫຼືອຜູ້ຖືກເຄາະຮ້າຍ ໃຫ້ທັນເວລາ ແລະ ມີຄວາມປອດໄພ ຕາມສິດຂອງຜູ້ຖືກເຄາະຮ້າຍ.

8. ເຮັດວຽກງານສຶກສາອົບຮົມ ຜູ້ທີ່ມີຄວາມສ່ຽງທີ່ຈະຕົກເປັນເຫຍື່ອການຄ້າມະນຸດ ໃຫ້ຮັບຮູ້
-ເຂົ້າໃຈກ່ຽວກັບຜົນຮ້າຍ ຂອງການຄ້າມະນຸດ ໂດຍສະເພາະແມ່ນກຸ່ມສ່ຽງທີ່ພວມຈະອອກເດີນທາງ ໄປອອກແຮງງານຢູ່ຕ່າງປະເທດ.


ສຳລັບຜົນງານໃນໄລຍະຜ່ານມາ ພັທ ສຸສິວັນ ລາດຊະວົງ ໄດ້ໃຫ້ຮູ້ວ່າ: ໃນປີ 2019 ພະແນກຕ້ານການຄ້າມະນຸດ ໄດ້ລົງໂຄສະນາໃຫ້ປະຊາຊົນ ກຸ່ມທີ່ມີຄວາມສ່ຽງຕົກເປັນເຫຍື່ອການຄ້າມະນຸດ ໄດ້ຮັບຮູ້ເຖິງຜົນຮ້າຍ ແລະ ໄພອັນຕະລາຍ ຂອງການຄ້າປະເວນີ. ນອກນີ້ຍັງໄດ້ລົງເກັບກຳສະຖິຕິບັນດາໂຮງແຮມ, ເຮືອນພັກ, ຮ້ານອາຫານກິນດື່ມຕ່າງໆ.

ໃນນີ້, ໂຮງແຮມ ຈຳນວນ 250 ແຫ່ງ ແມ່ນມີຄ້າ-ຂາຍປະເວນີ 18 ແຫ່ງ; ຮ້ານເສີມສວຍ-ກາເຟ ຈໍານວນ 888 ຮ້ານ ແມ່ນມີຄ້າ-ຂາຍປະເວນີ 2 ຮ້ານ; ເຮືອນພັກ 262 ຫຼັງ ແມ່ນມີຄ້າ-ຂາຍປະເວນີ 2 ຫຼັງ; ຮ້ານອາຫານ-ຮ້ານກິນດື່ມ ຈຳນວນ 918 ຮ້ານ ແມ່ນມີຄ້າ-ຂາຍປະເວນີ 84 ຮ້ານ; ຮ້ານຄາລາໂອເກະ ຈໍານວນ 107 ຮ້ານ ແມ່ນມີຄ້າ-ຂາຍປະເວນີ 03 ຮ້ານ ແລະ ມີພື້ນທີ່ສັບສົນ 11 ຈຸດ; ພ້ອມນີ້, ໄດ້ນຳຕົວຜູ້ຄ້າປະເວນີ ມາສຶກສາອົບຮົມ ແລະ ເຮັດບົດບັນທຶກ ຈຳນວນ 84 ຄົນ ແລະ ຜູ້ຂາຍປະເວນີ 554 ຄົນ; ໃນນີ້ມີຄົນຕ່າງປະເທດ 12 ຄົນ ( ຫວຽດນາມ )

ຕໍ່ກັບຜູ້ຄ້າປະເວນີເຈົ້າໜ້າທີ່ ໄດ້ດຳເນີນຕາມລະບຽບກົດໝາຍ; ສຳລັບຄົນຕ່າງປະເທດ ແມ່ນໄດ້ມອບໃຫ້ຫ້ອງສັນຕິບານ ປກສ ນວ ສົ່ງກັບປະເທດເຂົາເຈົ້າ ຕໍ່ການປະຕິບັດໜ້າທີ່ຜ່ານມາ ແມ່ນພົບຄວາມຫຍຸ້ງຍາກບາງດ້ານເປັນຕົ້ນ: ພະນັກງານວິຊາການບໍ່ທັນພຽງພໍກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານ; ພະນັກງານວິຊາການຈຳນວນໜື່ງ ຍັງຂາດປະສົບການວຽກງານດັ່ງກ່າວ; ອຸປະກອນ, ທຶນຮອນ ແລະ ເຄື່ອງມືຮັບໃຊ້ວຽກງານວິຊາສະເພາະ ຍັງບໍ່ທັນພຽງພໍກັບຄວາມຮຽກຮ້ອງຕ້ອງການ; ການລົງມ້າງເປົ້າໝາຍ ສ່ວນຫຼາຍເປັນເພດຍິງ; ເຊິ່ງສະຖານທີ່ຮອງຮັບຍັງບໍ່ທັນພຽງພໍ.


ໃນໂອກາດນີ້, ທ່ານຫົວໜ້າຫ້ອງຕຳຫຼວດ ປກສ ນວ ໄດ້ຮຽກຮ້ອງໃຫ້ບັນດາຜູ້ປະກອບການ, ນັກທຸລະກິດ ທີ່ປະກອບອາຊີບຮ້ານກິນດື່ມ, ເຈົ້າຂອງໂຮງແຮມ ແລະ ເຮືອນພັກ, ຈົ່ງມີສະຕິລະວັງຕົວ ເຄື່ອນໄຫວໃຫ້ຖືກຕ້ອງຕາມລະບຽບກົດໝາຍ, ບໍ່ໃຫ້ເອົາທຸລະກິດທີ່ຖືກກົດໝາຍມາບັງໜ້າ ແອບແຝງການຄ້າຂາຍປະເວນີ ແລະ ຄ້າມະນຸດ ເພື່ອຫາຜົນປະໂຫຍດເຂົ້າຕົວເອງ, ທີ່ສໍາຄັນຂໍຮຽກຮ້ອງໃຫ້ປະຊາຊົນຈົ່ງມີສະຕິລະວັງຕົວຕໍ່ກົນອຸບາຍຕ່າງໆ ເພື່ອບໍ່ໃຫ້ຕົກເປັນເຫຍື່ອຂອງພວກຄ້າປະເວນີ, ຖ້າຫາກພົບເຫັນບັນຫາດັ່ງກ່າວ ສາມາດແຈ້ງຕໍ່ເຈົ້າໜ້າທີ່ພະແນກຕ້ານການຄ້າມະນຸດ ຫ້ອງຕຳຫຼວດ ປກສ ນວ ໄດ້ໂດຍກົງ.

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here