ຫ້ອງວ່າການນາຍົກລັດຖະມົນຕີ ໄດ້ອອກແຈ້ງການສະບັບເລກທີ 98/ຫສນຍ, ລົງວັນທີ 27 ມັງກອນ 2020 ວ່າດ້ວຍທິດຊີ້ນຳກ່ຽວກັບການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ (ໄວຣັສໂຄໂຣນາ) ພ້ອມໄດ້ກຳນົດມາດຕະການໃນການຮັບມືແຕ່ລະດ້ານເຊິ່ງມີລາຍລະອຽດດັ່ງລຸ່ມນີ້:
- ກວດກາຈຸດທີ່ມີຄວາມສ່ຽງ (ຊາຍແດ, ສະນາມບິນ, ສະຖານີລົດໂດຍສານ, ໂຮງໝໍ, ຕະຫຼາດ)
- ກະກຽມຈຸດບໍລິການສາທາລະນະສຸກໃນທົ່ວປະເທດ
- ໂຄສະນາເຜີຍແຜ່ ແລະ ໃຫ້ຂໍ້ມູນ-ຂ່າວສານກ່ຽວກັບວິທີປ້ອງກັນຜ່ານສື່ຕ່າງໆໃຫ້ແກ່ສັງຄົມຢ່າງກວ້າງຂວາງ
- ແຈ້ງເຕືອນໃຫ້ປະຊາຊົນກ່ຽວກັບການອຸປະໂພກ ແລະ ບໍລິໂພກ
- ເກັບກຳສະຖິຕິ ແລະ ຕິດຕາມກວດກາສຸຂະພາບຜູ້ເດີນທາງ
- ຄວບຄຸມລາຄາອຸປະກອນຮັບໃຊ້ສຳລັບການປ້ອງກັນພະຍາດ
- ຄົ້ນຄວ້າ ແລະ ວາງແຜນເພື່ອກະກຽມແກ້ໄຂຜົນກະທົບທີ່ອາດເກີດຂຶ້ນ
- ກະກຽມງົບປະມານຈາກບ້ວງເງິນແຮລັດຖະບານ ເພື່ອນໍາໃຊ້ເຂົ້າໃນວຽກງານທີ່ຈຳເປັນ
ສະຖານະການການລະບາດຂອງພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ (ໄວຣັສໂຄໂຣນາ) ຕາມການລາຍງານຫຼ້າສຸດຂອງຫຼາຍສຳນັກຂ່າວຕ່າງປະເທດລາຍງານວັນນີ້ (29/01/2020) ໃຫ້ຮູ້ວ່າ ມີຈຳນວນຜູ້ເສຍຊີວິດ 132 ຄົນສະເພາະໃນຈີນ ແລະ ຈຳນວນຜູ້ຕິດເຊື້ອສະສົມຢ່າງໜ້ອຍ 5,974 ຄົນ ຈາກຈໍານວນດັ່ງກ່າວຢ່າງໜ້ອຍ 1,109 ຄົນມີອາການຢູ່ໃນຂັ້ນວິກິດ ໂດຍແຂວງ ຫູເປີ່ຍຍັງເປັນພື້ນທີ່ທີ່ມີຄົນເສຍຊີວິດຫຼາຍທີ່ສຸດ ພົບຜູ້ເສຍຊີວິດເພີ່ມຢ່າງໜ້ອຍ 25 ຄົນ ແລະ ຜູ້ຕິດເຊື້ອເພີ່ມອີກຢ່າງໜ້ອຍ 840 ຄົນ ສະເພາະເມື່ອວັນອັງຄານທີ່ຜ່ານມາ.
ຮຽບຮຽງຂ່າວ: ພຸດສະດີ
