ສຳນັກຂ່າວຕ່າງປະເທດລາຍງານ ໃນວັນທີ່ 21 ມັງກອນ 2020 ວ່າ ຄະນະກຳມະການສາທາລະນະສຸກແຫ່ງເມືອງອູ່ຮັ່ນ ໃນມົນທົນຫູເປີ່ຍ ທາງພາກກາງຂອງຈີນ ອອກຖະແຫຼງການເມື່ອວັນອັງຄານ ເລື່ອງຜູ້ເສຍຊີວິດຄົນທີ່ 4 ຈາກການຕິດເຊື້ອໄວຣັດໂຄໂຣນາສາຍພັນໃຫ່ມ ເປັນຊາຍອາຍຸ 89 ປີ ມີໂຣກປະຈຳໂຕຄືເບົາຫວານ ໂຣກຫົວໃຈ ແລະຄວາມດັນໂລຫິດສູງ ເລີ່ມມີອາການເມື່ອວັນທີ່ 13 ມັງກອນ ແຕ່ເຂົ້າຮັບການຮັກສາທີ່ໂຮງຫມໍໃນອີກ 5 ວັນຕໍ່ມາ ດ້ວຍອາການຜິດປົກກະຕິທີ່ລະບົບທາງເດີນຫາຍໃຈ ແລະເສຍຊີວິດເມື່ອວັນທີ່ 19 ມັງກອນທີ່ຜ່ານມາ
ຖະແຫຼງການຍັງລະບຸດ້ວຍວ່າ ເຈົ້າຫນ້າທີ່ສາທາລະນະສຸກໃນພື້ນທີ່ 15 ຄົນຕິດເຊື້ອງຊະນິດນີ້ແລ້ວ ຫນື່ງໃນນັ້ນມີອາການວິກິດ ແລະຍັງມີຜູ້ຕ້ອງສົງໄສຕິດເຊື້ອອີກຢ່າງນ້ອຍ 1 ຄົນ ແມ່ນວ່າທາງການເມືອງອູ່ຮັ່ນຍັງບໍ່ໄດ້ໃຫ້ຂໍ້ມູນຊັດເຈນວ່າເຈົ້າຫນ້າທີ່ໄດ້ຮັບເຊື້ອຢ່າງໃດ ແຕ່ນາງແພດ ຊົ່ງ ຫນານຊານ ຜູ້ຊ່ຽວຊານດ້ານໂຣກປອດແລະລະບົບທາງເດີນອາຫານ ຊື່ງໄດ້ຮັບມອບຫມາຍຈາກຄະນະກຳມະການສາທາລະນະສຸກແຫ່ງຊາດຂອງຈີນ ໃຫ້ເປັນຫົວຫນ້າຄະນະທຳງານກ່ຽວກັບການແຜ່ລະບາດຂອງເຊື້ອໄວຣັດໂຄໂຣນາສາຍພັນໃຫ່ມ ກ່າວວ່າຜົນການກວດສອບການຕິດເຊື້ອຂອງຜູ້ປ່ວຍຢ່າງນ້ອຍ 2 ຄົນໃນມົນທົນກວາງຕຸ້ງພົບຄວາມເຊື່ອມໂຍງວ່າເປັນການຕິດເຊື້ອຈາກສະມາຊິກໃນຄອບຄົວດຽວກັນ ແລະມີເຈົ້າຫນ້າທີ່ສາທາລະນະສຸກຕິດເຊື້ອນຳອີກຫລາຍຄົນ
ລາຍງານຂອງສຳນັກຂ່າວຊິນຫົວ ເວລາ 18:00 ນາທີ ຕາມເວລາທ້ອງຖິ່ນຂອງວັນຈັນ ລະບຸຈຳນວນຜູ້ປ່ວຍຈາກເຊື້ອໄວຣັດໂຄໂຣນາສາຍພັນໃຫ່ມທົ່ວປະເທດໄວ້ທີ່ຢ່າງຫນ້ອຍ 217 ຄົນ ຈາກຈຳນວນດັງກ່າວ 198 ຄົນຢູ່ທີ່ເມືອງອູ່ຮັ່ນ ຊື່ງເປັນເມືອງທຳອິດທີ່ພົບການແຜ່ລະບາດເມື່ອເດືອນທັນວາປີຜ່ານມາ ສ່ວນທີ່ເຫລືອພົບໃນເມືອງອື່ນຂອງຈີນ ລວມເຖິງເມືອງໃຫ່ຍຢ່າງນະຄອນປັກກິ່ງ ແລະເມືອງຊຽງໄຮ້ ຕະຫລອດຈົນມົນທົນທີ່ມີປະຊາກອນອາໄສຢູ່ຫລາຍ ບໍ່ວ່າຈະເປັນມົນທົນກວາງຕຸ້ງ ມົນທົນເສສວນ ແລະມົນທົນຢູນນານ ແລະ ປະທານາທິບໍດີສີ ຈິ້ນຜິງ ສັ່ງໃຫ້ທຸກຝ່າຍເລັ່ງຄວບຄຸມສະຖານະການນີ້ທີ່ຖືເປັນວາລະລະດັບປະເທດ
ດ້ານອົງການອານາໄມໂລກ (ດັບເບິລຢູເອຊໂອ) ມີກຳນົດປະຊຸມສຸກເສີນໃນວັນພຸດທີ່ 22 ມັງກອນນີ້ ເພື່ອຕັດສິນໃຈວ່າ ຈະປະກາດໃຫ້ສະຖານະການ ການແຜ່ລະບາດຂອງເຊື້ອໄວຣັດໂຄໂຣນາສາຍພັນໃຫ່ມຈາກເມືອງອູ່ຮັ່ນເປັນ ພາວະສຸກເສີນ ດ້ານສາທາລະນະສຸກລະຫວ່າງປະເທດ ຫລືບໍ່ ເນື່ອງຈາກເຊື້ອໄວໂຣກແຜ່ກະຈາຍອອກຈາກຈີນສູ່ຢ່າງນ້ອຍ 3 ປະເທດແລ້ວຄືໄທ ຍີ່ປຸ່ນ ແລະເກົາຫຼີໃຕ້
ສ່ວນ ສປປລາວ ກໍ່ມີແຈ້ງການ ໃຫ້ມີການສະກັດກັ້ນ ຕາມດ່ານສາກົນ ຢ່າງເຂັ້ມງວດ
