ເພື່ອຈະສືບຕໍ່ປະຕິສັງຂອນອົງພະທາດທີ່ວັດບ້ານແທ່ນຄຳຄືນ. ຫຼັງຈາກ, ທີ່ໄດ້ພຸຜັງລົງມາໃຫ້ກັບຄືນສູ່ສະພາບເດີມ ແລະ ເພື່ອເປັນການປົກປັກຮັກສາມໍລະດົກອັນລ້ຳຄ່າ ຄູ່ບ້ານຄູ່ເມືອງ ທັງເປັນເອກະລັກວັດທະນະທຳອັນດີງາມຂອງຊາດລາວ ກໍຄືຂອງຊາວເມືອງຫົງສາ ໃນຕອນເຊົ້າຂອງວັນທີ 16 ມັງກອນ 2020 ກົງກັບມື້ ແຮມ 7 ຄ່ຳ ເດືອນ 2 ລາວ ປີກຸນ ພສ 2562
ເຊິ່ງເປັນເລີກງາມຍາມດີ ໃນການຈັດພິທີສິລິມຸງຄຸນໃສ່ໃຈອົງພະທາດຢູ່ວັດບ້ານແທ່ນຄຳ ເມືອງຫົງສາ ແຂວງໄຊຍະບູລີ. ໂດຍເປັນກຽດເຂົ້າຮ່ວມຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ພ້ອມດ້ວຍບັນດາການນຳຂອງເມືອງ, ມີພະເຖລະນຸເຖລາ ແລະ ປະຊາຊົນເຂົ້າຮ່ວມ.
ໃນພິທີດັ່ງກ່າວ, ກໍ່ໄດ້ມີການໃສ່ບາດຍາດນ້ຳ, ສູດອັນເຊີນສິ່ງສັກສິດມາສະທິດຢູ່ໃນພະທາດ. ຫຼັງຈາກນັ້ນ, ກໍ່ໄດ້ນຳເອົາວັດຖຸສິ່ງຂອງທີ່ຊາວບ້ານນຳມາກາບໄຫວ້ບູຊາ ລົງບັນຈຸໃສ່ໃນພະທາດ. ເພື່ອເປັນສິລິມຸງຄຸນ.
ນອກນັ້ນ, ຍັງໄດ້ສະແດງເຖິງຄວາມເອົາໃຈໃສ່ຂອງການນຳພັກ-ລັດຂັ້ນຕ່າງໆ ທີ່ໄດ້ເອົາໃຈໃສ່ຕິດຕາມຊຸກຍູ້ ແລະ ປົກປັກຮັກສາມໍລະດົກຂອງບ້ານ-ເມືອງ ກໍຄື: ຂອງຊາດ ໃຫ້ຄົງຢູ່ຄູ່ບ້ານຄູ່ເມືອງຕະຫຼອດໄປ;
ຂ່າວ-ພາບ: ກິດຕິສັກ ບົວໄລ (ນັກຂ່າວເມືອງຫົງສາ)
