ວັນທີ 14 ມັງກອນ 2020 ໜ່ວຍພັກຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງຫົງສາ ແຂວງໄຊຍະບູລີ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຢູ່ທີ່ຫ້ອງການດັ່ງກ່າວ ໂດຍການເຂົ້າຮ່ວມເປັນປະທານຂອງສະຫາຍ ແຫຼ້ ອ່ອນສົມບູນ ກຳມະການປະຈຳພັກເມືອງ ຮອງເຈົ້າເມືອງຫົງສາ, ສະຫາຍ ສີພູວົງ ວິໄລແກ້ວ ເລຂາໜ່ວຍພັກຫ້ອງການ ຖວທ ເມືອງ ພ້ອມດ້ວຍຄະນະພັກ, ສະມາຊິກພັກ, ແຂກຖືກເຊີນຈາກໜ່ວຍພັກຮາກຖານອ້ອມຂ້າງເຂົ້າຮ່ວມ.
ອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ X ທີ່ໄດ້ກຳນົດໄວ້ໃນໝວດທີ I ມາດຕາ 2 ຂໍ້ ກ ວ່າດ້ວຍລະບຽບການຮັບສະມາຊິກພັກໃໝ່ ແລະ ຂໍ້ ຂ ວ່າດ້ວຍສະໄໝ ສຳຮອງຂອງສະມາຊິກພັກປະຊາຊົນປະຕິວັດລາວ, ສະຫາຍ ໄກເພັດ ຄຳມຸງແກ້ວ ຄະນະໜ່ວຍພັກຮາກຖານ ກໍ່ໄດ້ຜ່ານມະຕິຕົກລົງຂອງຄະນະປະຈຳພັກເມືອງຫົງສາ ວ່າດ້ວຍການອະນຸມັດຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກປະຊາຊົນປະຕິວັດລາວ ຈຳນວນ 02 ສະຫາຍຄື: ຕົກລົງເຫັນດີໃຫ້ສະຫາຍ ກິດຕິສັກ ບົວໄລ ແລະ ສະຫາຍ ຄຳຫຼ້າ ຄຳວິໄລ ເຂົ້າເປັນສະມາຊິກພັກປະຊາຊົນປະຕິວັດລາວ ໜ່ວຍພັກຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງຫົງສາ ເຊິ່ງໄດ້ກຳນົດໄວ້ໃນກົດລະບຽບຂອງພັກ. ຈາກນັ້ນ, ເລຂາໜ່ວຍພັກ ກໍ່ໄດ້ຂຶ້ນຢັ້ງຢືນ ແລະ ຈັບມື ເພື່ອຮັບຮອງເອົາສະມາຊິກພັກສຳຮອງໃໝ່ຢ່າງເປັນທາງການ.
ໃນຕອນທ້າຍກໍ່ໄດ້ເປັນກຽດຮັບຟັງການໂອ້ລົມຂອງສະຫາຍ ແຫຼ້ ອ່ອນສົມບູນ ກຳມະການປະຈຳພັກເມືອງ ຮອງເຈົ້າເມືອງຫົງສາ ເຊິ່ງສະຫາຍໄດ້ອະທິບາຍເນື້ອໃນຄວາມໝາຍ, ຄວາມສຳຄັນພິທີການຄັ້ງນີ້ ແລະ ໄດ້ໃຫ້ການໂອ້ລົມຕັກເຕືອນໃຫ້ຄຳຄິດເຫັນ ກ່ຽວກັບ ກົດລະບຽບຂອງພັກປະຊາຊົນປະຕິວັດລາວ ໃຫ້ສະມາຊິກພັກສຳຮອງໄດ້ຮັບຮູ້ ແລະ ເຂົ້າໃຈແຈ້ງອີກຕື່ມ
ຂ່າວ-ພາບ: ກິດຕິສັກ ບົວໄລ
