ສະຖານກົງສູນໃຫ່ຍ ສປ ຈີນ ປະຈຳແຂວງຫຼວງພະບາງ ສະເຫຼີມສະຫຼອງບຸນປີໃໝ່ຈີນ

ຕອນຄໍ່າຂອງວັນທີ່ 15 ມັງກອນນີ້, ສະຖານກົງສູນໃຫ່ຍ ສປ ຈີນ ປະຈຳແຂວງຫຼວງພະບາງ ໄດ້ຈັດງານລ້ຽງສະເຫຼີມສະຫຼອງບຸນປີໃໝ່ຈີນຂື້ນ ເພື່ອສົ່ງທ້າຍປີເກົ່າ ແລະຕ້ອນຮັບປີໃໝ່ຈີນປີ 2020, ມີທ່ານ ຫຼີ ຈືກົງ ຫົວໜ້າສະຖານກົງສູນໃຫ່ຍ ສປ ຈີນ ປະຈໍາແຂວງຫຼວງພະບາງ ພ້ອມດ້ວຍ ພັນລະຍາ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍຜູ້ຕາງໜ້າການນໍາແຂວງພາກເໜືອ, ການນຳແຂວງຫຼວງພະບາງ, ພະນັກງານສະຖານກົງສູນຈີນ, ຊາວຈີນຕ່າງດ້າວ, ນັກທຸລະກິດ, ພໍ່ຄ້າຊາວຂາຍ ທີ່ດຳລົງຊີວິດຢູ່ພາຍໃນແຂວງຫຼວງພະບາງ ເຂົ້າຮ່ວມ.

ພິທີ ທ່ານ ຫຼີ ຈືກົງ ໄດ້ຂື້ນມີຄຳເຫັນວ່າ: ໃນໄລຍະໜື່ງປີຜ່ານມາ, ການພັດທະນາສາຍພົວພັນຂອງສອງປະເທດລາວ-ຈີນ ໄດ້ຮັບຄວາມຄືບໜ້າອັນໃຫຍ່ຫຼວງ ແລະປີ 2020 ນີ້, ປະຊາຊົນຈີນ ຈະຫຼຸດພົ້ນອອກຈາກຄວາມທຸກຍາກ ໂດຍສີ້ນເຊີງ ເປັນຄັ້ງທຳອິດໃນປະຫວັດສາດ, ປີ 2021 ຈະເປັນປີຄົບຮອບ 60 ປີ ທີ່ລາວ-ຈີນ ໄດ້ສ້າງສາຍສຳພັນທາງການທູດຮ່ວມກັນ ແລະເປັນປີທີ່ເສັ້ນທາງລົດໄຟລາວ-ຈີນ ຈະສ້າງສຳເລັດ ແລະຈະເປີດການນຳໃຊ້, ຝ່າຍຈີນຍີນດີຮ່ວມມືກັບຝ່າຍລາວ ສືບຕໍ່ຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊະຕາກຳຈີນ-ລາວ ຊຸກຍູ້ສົ່ງເສີມການຮ່ວມມືແຕ່ລະຂົງເຂດ ແລະຄູ່ຮ່ວມມືຍຸດທະສາດຮອບດ້ານລາວ-ຈີນ ໃນຍຸກໃໝ່ ໃຫ້ພັດທະນາກ້າວໄປຂ້າງໜ້າຢ່າງບໍ່ຢຸດຢັ້ງ.

ໂອກາດນີ້ ທ່ານ ຄຳຂັນ ຈັນທະວີສຸກ ໄດ້ກ່າວອວຍພອນປີໃໝ່ຈີນ ທ່ານກ່າວວ່າ: ຂ້າພະເຈົ້າພ້ອມດ້ວຍການນໍາແຕ່ລະຂັ້ນຂອງແຂວງຫຼວງພະບາງ ແລະບັນດາແຂວງພາກເໜືອ ຂໍຖືໂອກາດນີ້ສົ່ງຄຳອວຍພອນໄຊອັນປະເສີດມາຍັງ ທ່ານ ຫຼີ ຈືກົງ ພ້ອມດ້ວຍພະນັກງານສະຖານກົງສູນໃຫຍ່, ຊາວຈີນຕ່າງດ້າວ, ນັກທຸລະກິດ, ພໍ່ຄ້າຊາວຂາຍ ທີ່ດຳລົງຊີວິດຢູ່ພາຍໃນແຂວງຫຼວງພະບາງ ຈົ່ງມີສຸຂະພາບແຂງແຮງ, ມີຄວາມຜາສຸກໃນຄອບຄົວ ແລະປະສົບຜົນສຳເລັດ ຢ່າງໃຫຍ່ຫຼວງ ໃນພາລະກິດຂອງຕົນ, ຂ້າພະເຈົ້າເຊື່ອໝັ້ນວ່າ ປີໃໝ່ນີ້ ພັກ-ລັດຖະບານ ແລະປະຊາຊົນຊາວຈີນ ຈະສືບຕໍ່ຍາດໄດ້ໄຊຊະນະໃໝ່ທີ່ຍີ່ງກວ່າເກົ່າ, ນຳພາປະເທດຊາດຈີນ ກ້າວຂື້ນສັງຄົມນິຍົມຕາມສີສັນຂອງຕົນຢ່າງຮອບດ້ານ, ຄະນະພັກ, ສະພາປະຊາຊົນ, ອົງການປົກຄອງ ແລະປະຊາຊົນບັນດາເຜົ່າ ແຂວງຫຼວງພະບາງ ແລະບັນດາແຂວງພາກເໜືອ ຂໍສະແດງຄວາມຊົມເຊີຍຕໍ່ຜົນງານການປົກປັກຮັກສາ ແລະພັດທະນາປະເທດຊາດທີ່ພັກ-ລັດຖະບານ ກໍ່ຄືປະຊາຊົນຊາວຈີນທຸກຖ້ວນໜ້າ ຍາດມາໄດ້ໃນໄລຍະໜຶ່ງປີຜ່ານມາ.