ເນື່ອງໃນໂອກາດລະນຶກວັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 110 ປີ (13/7/1909-13/7/2019),

ທ່ານ ນາງ ຍອດແກ້ວມະນີ ສຸພານຸວົງ, ຮອງປະທານສູນກາງແນວລາວສ້າງຊາດ ໄດ້ຖະແຫຼງຂ່າວ ກ່ຽວກັບ ຄຸນງາມຄວາມດີຂອງ ປະທານ ສຸພານຸວົງ ຕັ້ງແຕ່ໄວເດັກ ຈົນເຖິງໄລຍະເວລາທີ່ເພິ່ນໄດ້ກາຍເປັນຜູ້ນຳທີ່ດີເດັ່ນຂອງຊາດລາວ, ປະຊາຊົນລາວວິລະຊົນ.

ທ່ານປະທານ ສຸພານຸວົງ ໄດ້ປະກອບສ່ວນຢ່າງໃຫຍ່ຫຼວງ, ພິລະອາດຫານ ເຂົ້າໃນພາລະກິດຕໍ່ສູ້ປົດປ່ອຍຊາດ ແລະ ພັດທະນາປະເທດຊາດນັບມື້ນັບຈະເລີນກ້າວໜ້າ, ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າມີຄວາມຜາສຸກຍິ່ງໆຂຶ້ນ. ໃນນາມເປັນປະທານປະເທດທ່ານທຳອິດຂອງ ສປປ ລາວ, ປະທານສະພາປະຊາຊົນສູງສຸດທ່ານທຳອິດ ຂອງ ສປປ ລາວ, ປະທານແນວລາວອິດສະຫຼະ, ປະທານແນວລາວຮັກຊາດ, ປະທານແນວລາວສ້າງຊາດທ່ານທຳອິດ ແລະ ໃນບົດບາດທີ່ດີເດັ່ນອື່ນໆອີກ, ປະທານ ສຸພານຸວົງ ໄດ້ເປັນແບບຢ່າງອັນເຫຼື້ອມໃສໃນຄວາມຈົງຮັກພັກດີຕໍ່ພາລະກິດປະຕິວັດ, ຕໍ່ອຸດົມການອັນສູງສົ່ງ, ເຊື່ອໝັ້ນຕໍ່ການນຳພາຂອງພັກຢ່າງສະເໝີຕົ້ນສະເໝີປາຍ, ຍາມໃດກໍ່ຍອມເສຍສະຫຼະສິດຜົນປະໂຫຍດສ່ວນຕົວເພື່ອສ່ວນລວມ, ເພື່ອຊາດ, ເພື່ອປະຊາຊົນຢູ່ສະເໝີ,

ທ່ານມີນ້ຳໃຈຮັກຊາດຮັກປະຊາຊົນຢ່າງດູດດື່ມ, ເປັນແວ່ນແຍງອັນເຫຼື້ອມໃສໃນການດຳລົງຊີວິດແບບລຽບງ່າຍ, ປະຫຍັດມັດທະຍັດ ແລະ ປອດໃສຂາວສະອາດໃນຊົ່ວຊີວິດຂອງທ່ານ. ພ້ອມກັນນັ້ນ, ທ່ານຍັງມີຄວາມຮັກບໍລິສຸດຜຸດຜ່ອງຕໍ່ຄອບຄົວ, ລູກຫຼານ, ພີ່ນ້ອງຮ່ວມຊາດຕະຫຼອດມາ ແລະ ເປັນແບບຢ່າງໃນການດຸໝັ່ນອອກແຮງງານ, ຄົ້ນຄວ້າຮ່ຳຮຽນສະແຫວງຫາຄວາມກ້າວໜ້າຮອບດ້ານ.

ນອກນັ້ນ, ທ່ານຍັງມີນ້ຳໃຈເອື້ອເຟື້ອເພື່ອແຜ່ຕໍ່ເພື່ອນມິດທັງພາຍໃນ ແລະ ຕ່າງປະເທດ ຜູ້ທີ່ຮັກຫອມສັນຕິພາບ, ຮັກຄວາມເປັນທຳ ແລະ ມີນ້ຳໃຈສາກົນອັນສູງສົ່ງຕໍ່ເພື່ອນມິດຍຸດທະສາດພິເສດຢ່າງເດັດດ່ຽວໜຽວແໜ້ນ…

ຖືໂອກາດນີ້, ພວກເຮົາທຸກຄົນ ຂໍສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ທ່ານ ແລະ ຂໍຮ່ຳຮຽນເອົາແບບຢ່າງທີ່ດີງາມຂອງທ່ານຕະຫຼອດໄປ.

ສະນັ້ນ, ຄອບຄົວສຸພານຸວົງ ພ້ອມດ້ວຍການຈັດຕັ້ງພັກ-ລັດ ໄດ້ຮ່ວມກັນຈັດຕັ້ງກອງບຸນ 2 ກອງຂຶ້ນ ເພື່ອລະນຶກເຖິງວັນຄ້າຍວັນເກີດ 110ປີ ຂອງປະທານ ສຸພານຸວົງ (ພ້ອມດ້ວຍພັນລະຍາ) ໃນລະຫວ່າງວັນທີ 12-13/7/2019, ທີ່ ອະນຸສອນສະຖານປະທານສຸພານຸວົງ (ບ້ານໂພນສະອາດ).

ຂ້າພະເຈົ້າຮູ້ສຶກເປັນກຽດທີ່ໄດ້ຕາງໜ້າຄອບຄົວສຸພານຸວົງ ແຈ້ງຂ່າວບຸນດັ່ງກ່າວໃຫ້ຊາບໂດຍທົ່ວເຖິງກັນນັບແຕ່ມື້ນີ້ເປັນຕົ້ນໄປ (ນະຄອນຫຼວງວຽງຈັນ, ວັນທີ 8/7/2019).

LEAVE A REPLY

Please enter your comment!
Please enter your name here